Ni xi akakoo̱ 7 - Xo̱jo̱n eén Néná

Kui xi úchán ko̱jo yichán nijón mi̱ xota̱ xi yajátꞌaa̱ chi̱bo̱a̱a̱

¹ Ngije kamá kui nii̱, kamábe an nijón ndítsjie xi ndyi̱a̱kixi̱ nga nijón tji̱ngi̱i̱ nga̱sondiee̱, nga ndyi̱ꞌbíchjaá nga nijón tjo̱o̱ tsi̱ꞌe̱ nga ngiti̱ ko̱ótsiéjín nga̱són tꞌanangii̱, ti̱nde nga̱soón ndáchíkoón, ti̱nde nga̱soón ngo yá xí tjín kuí nga̱sondiee̱.

² Ti̱ kamábe an ingo ndítsjie xi kjindibáni xtji̱e̱e̱n nínga fotjo tsꞌueé, xi tikoón chi̱bo̱a̱a̱ seyoo̱ kui Néná xí tikoón, kó kui ndítsjiee̱ ꞌniú askjandáyà nga tsíchji̱a̱a̱ xi ngi nijón ndítsjie xi je katseꞌeé ngaꞌniú, tsi̱ꞌe̱ nga sa̱ꞌínꞌoón tꞌanangii̱ ko̱jo ndáchíkoón, kó bi̱ katsoó:

³ –¡Ngata̱ niꞌánꞌónjínjnúu̱ tꞌanangii̱, ko̱jo ndáchíkoón, ko̱jo yaá, tji̱e̱nga kji̱e̱ ꞌbíjñájiín chi̱bo̱a̱a̱ seyoo̱ xtjien xota̱ xi mosoo̱ Néná!

⁴ Kó tsintꞌie an kótjín kamá xi kiniꞌánkaꞌa kui chi̱bo̱a̱a̱: Úchán ko̱jo yichán nijón mi̱ ma xi chji̱a̱ni tji̱e̱e̱ xota̱ xi chji̱a̱ni Israee̱l.

⁵ Akjatꞌaa̱ chi̱bo̱a̱a̱ kui xi tiejó mi̱ tji̱e̱e̱ xota̱ xi chji̱a̱ni Jundáa̱, ko̱jo tiejó mi̱ tji̱e̱e̱ xota̱ xi chji̱a̱ni Rubee̱n, ko̱jo tiejó mi̱ tji̱e̱e̱ xota̱ xi chji̱a̱ni Ngaa̱nd,

⁶ ko̱jo tiejó mi̱ tji̱e̱e̱ xota̱ xi chji̱a̱ni Asee̱r, ko̱jo tiejó mi̱ tji̱e̱e̱ xota̱ xi chji̱a̱ni Neftalii̱, ko̱jo tiejó mi̱ tji̱e̱e̱ xota̱ xi chji̱a̱ni Manasee̱,

⁷ ko̱jo tiejó mi̱ tji̱e̱e̱ xota̱ xi chji̱a̱ni Simeoo̱n, ko̱jo tiejó mi̱ tji̱e̱e̱ xota̱ xi chji̱a̱ni Lebii̱, ko̱jo tiejó mi̱ tji̱e̱e̱ xota̱ xi chji̱a̱ni Isakaa̱r,

⁸ ko̱jo tiejó mi̱ tji̱e̱e̱ xota̱ xi chji̱a̱ni Sabuloo̱n, ko̱jo tiejó mi̱ tji̱e̱e̱ xota̱ xi chji̱a̱ni Kosiee̱, ko̱jo tiejó mi̱ tji̱e̱e̱ xota̱ xi chji̱a̱ni Benjaa̱.

Xota̱ kjín xi ndyi̱yajá ńjño tiboaa̱

⁹ Ngije kamá kui nii̱, askotsijen an kó kamábe an achichí ꞌniú kjín xota̱ xi ngaskande nde ta̱ꞌyajín xi kamaá íxki̱, xota̱ xi chji̱a̱ni ngayeje na̱xi̱ńdá, ko̱jo ngayeje xtín xota̱, ko̱jo ngayeje to̱ko̱ya én, ko̱jo ngayeje nangi, ndyi̱a̱kixi̱ kui xotaa̱ kje̱n nínga tikón xi botixómaá, ko̱jo kje̱n cho̱tsa̱nga̱a̱, nga ndyi̱yajá ńjño tiboa, kó xka̱jèn ndyi̱yaꞌa ngi̱ya tsja.

¹⁰ Kó ngayejee̱ nga ꞌniú tsíchji̱a̱, nga bi̱ katsó: ¡Néná ko̱jo cho̱tsa̱nga̱a̱ kuí xí botixómá, kó kuí xí ꞌboxiéꞌáná!

¹¹ Kó ngayeje ndítsjie xi ndyi̱a̱kixi̱ nga ngo foaꞌatjiyajoo̱n kje̱n nínga tikón xi botixómaá, ko̱jo xota̱ xi xchaá, ko̱jo kui xi síndoo̱, kixindyiaxtien nínga tikón xi botixómaá ngaskande nga kisitꞌaa̱ xtjien tꞌanangii̱, kó katsꞌéndikón Néná,

¹² nga bi̱ katsó: ¡Bo̱a̱ kjiꞌi! Kjo̱a̱niꞌánchikonñeé, ko̱jo kjo̱a̱jee̱, ko̱jo kjo̱a̱kjínkoón, ko̱jo kjo̱a̱ndokꞌóchji̱í, ko̱jo kjo̱a̱yandikoón, ko̱jo ngaꞌniuú nga botíxomaa̱, ko̱jo ngaꞌniuú, ngateꞌeé Néná ngatsjéni̱xtjin. ¡Bo̱a̱ kjiꞌi!

¹³ Kósꞌe̱ ngo kui xota̱ xi xchaá, bi̱ katsó nga asíyána: –Kui xota̱ xi ndyi̱yajá ńjño tiboaa̱, ꞌyá kuí bo̱a̱, kó ñá kjindibáni.

¹⁴ –Jí xí yé ji, Ndi̱a̱. Kixiáa̱n. Kó bi̱ katsóna kui: –Kuí bí xota̱ xi je jaꞌajin nga kamá kui kjo̱a̱ni̱ma̱a̱, kó kui jè anié ńjñoo̱, kó jiín cho̱tsa̱nga̱a̱ katsꞌéntiboani.

¹⁵ Kuíni nga ki̱a̱ síndo kje̱n nínga tikón kui Néná xí botixómaá, kó nga jñó nga ni̱xtjin nga ndyi̱tsꞌènseén Néná ki̱a̱ na̱ngo̱xi̱i̱, kó kuí xi botixómaá, skoón nga ki̱a̱ kꞌuijñájo̱ ngi̱ndie ndikoón.

¹⁶ Ngiti̱ jmí kjo̱a̱ni̱ma̱ kjo̱a̱ꞌatiojín nga ka̱ma bojó, ko̱jo nga ka̱ma xíndaá, ti̱nde sa̱ꞌínchjánjiín ndoboaá, ti̱nde sa̱ꞌínniꞌínjiín sibeé,

¹⁷ ngatꞌa̱ kui cho̱tsa̱nga̱ kui xi botixómaá, kuí boá xi nda̱ xi koo̱n cho̱tsa̱nga̱a̱ ka̱ma, kó kuí boá xi kjo̱jo nínga tjitjó ndáfoaa̱ kjo̱a̱mindyioo̱n, kó Néná sa̱ꞌínxíjón ngayeje ndándyíkon xi kjo̱tjoo̱ ndyi̱ko̱n.