Ni xi akakoo̱ 22 - Xo̱jo̱n eén Néná

¹ Kó akóna ngo ndejèꞌ xi tsjie, kui xi tjiín ndáfoaa̱ kjo̱a̱mindyioo̱n xi tikón ꞌna̱ ꞌna̱ xikoó ngo chi̱tsen, kó ki̱a̱ jatjoni nínga tikón kui Néná xí botixómaá ko̱jo cho̱tsa̱nga̱a̱.

² Ngamasiee̱n ndi̱yàtié xi jee̱ kui na̱xi̱ńdaá, ko̱jo nga̱ndee̱ kui ndejeèꞌ, kamáxchá ngo yaá kjo̱a̱mindyioo̱n, kui xi xki̱ sá tsjá to, tiejó ndi̱yà nga ngo nó, kó xka̱a̱ kui yaá, kuí boá xi tsꞌendáyà chiꞌii̱n xota̱ na̱xi̱ńdá xí tjín nga̱sondiee̱.

³ Kó nginijánjín kꞌuié ki̱a̱a̱ ngo xi chꞌo ka̱tso̱o̱ Néná. Kó Néná xí botixómaá ko̱jo cho̱tsa̱nga̱a̱ ki̱a̱ kꞌuijñá na̱xi̱ńdaá, kó mosoo̱ ki̱a̱ sa̱ꞌínseén,

⁴ kó sku̱i̱e̱ kje̱n, kó jaꞌeén ki̱a̱ kjótꞌaa̱ xtjien.

⁵ Kó kui ngi̱ndiee̱ nginijánjín ka̱majñó, kó xi kꞌuíndo ki̱a̱a̱, ngiti̱ ka̱machjiénjiín ndiꞌí xí tsꞌentsíjen ko̱jo tsi ndiꞌií tsꞌueé, ngatꞌa̱ Néná kui xi Ndi̱a̱ná tsja̱á ndiꞌií, kó kuí xota̱ xi̱ꞌba̱ xi ko̱tíxoma ngatsjéni̱xtjii̱n.

Jè tikón tiña ni̱xtjin nga kji̱ndi̱bá Kristoo̱

⁶ Kó kui ndítsjiee̱, bi̱ katsóna: –Kui eén, én xí ꞌniátakón, ko̱jo én xí ja̱koxi̱ boá, kó Ndi̱a̱ná kui Néná, kui xi a̱si̱énni̱xtjii̱n já chji̱ni̱e̱ꞌe̱én, kuí boá xi katsangiya ndítsjiee̱ tsi̱ꞌe̱ nga ko̱ko̱ó mosoo̱ ni xi je tsá ka̱ma.

⁷ –¡Je tsá ndibá an! ¡Achichíra̱tsjaa̱ kui xi sa̱ꞌínseén kui én xí Néná tsáyà xi kjitꞌa kui xo̱jo̱o̱n!

⁸ Juaa̱ boá an, kó án boá xi kamábe an, kó tsintꞌie an kui nii̱. Kó ngije kamábe an ko̱jo ngije tsintꞌie an, asientꞌáa̱ tikóna tꞌa se kui ndítsjie xi akóna kui nii̱ tsi̱ꞌe̱ nga sa̱ꞌindikón án katsaki.

⁹ Ta̱nga kui bi̱ katsóna: –Jmí ngata̱ bo̱a̱jín niꞌín, ngatꞌa̱ ti̱ mosoo̱ Néná boá an nga xikoó jí, ko̱jo já ntsꞌie xi já chji̱ni̱e̱ꞌe̱én, ko̱jo xikoó ngayeje xota̱ xi tsꞌenseén ni xi kjitꞌa kui xo̱jo̱o̱n. ¡Néná boá xi ti̱ꞌindikín jí!

¹⁰ Kó ti̱ bi̱ katsóna nga: –Ngata̱ chjeꞌétjéꞌmájín ji kui én xí Néná tsáyà xi kjitꞌa kui xo̱jo̱o̱n, ngatꞌa̱ jè má kjachó ni̱xtjin nga kjo̱tjosón ni xi kjitꞌa.

¹¹ Xióchíi̱n xota̱ xi kixi̱jiín, kixi̱jín ngatamara, kó xota̱ xi ni xi tsjiejín ndyi̱tsꞌe̱én, ngatsꞌénrá ni xi tsjiejín, ta̱nga kui xi kixi̱i̱, ngatsꞌénrá kjo̱a̱kixi̱i̱, ko̱jo kui xota̱ xi tsjiee̱, ngatsꞌéntsjiera ngase yojoo̱.

¹² Tsitsíjin, jè tsꞌéndibá an, kó jè yaꞌa an ni xi je katsꞌen an, tsi̱ꞌe̱ nga tsjàa̱ nga ngo nga ngo xotaa̱ ta̱ xikó kjiꞌi ni xi katsꞌén.

¹³ Án boá xi alfaa̱ ko̱jo xi omengaa̱, xi tjón ko̱jo xi fetꞌaa̱, xi ítjatsꞌennii̱ ko̱jo xi fetꞌaa̱.

¹⁴ Achichíra̱tsjaa̱ xi ndyi̱moniè ńjñoo̱ tsi̱ꞌe̱ nga kꞌuieé kjo̱a̱nda nga ka̱ma skji̱ni̱e̱ too̱ yaá kjo̱a̱mindyioo̱n, kó ka̱maa̱ kꞌo̱sꞌienni nga̱ntjo̱a̱a̱ na̱xi̱ńdáꞌniuú.

¹⁵ Ta̱nga ndi̱tsén jàn kꞌuíndo ngayeje xota̱ xi ndajín, ko̱jo xi ndyi̱tsꞌèn kjo̱a̱tjiꞌe, kui xi ta̱xkiya ndyi̱tsꞌèntsjàjo̱ yojoo̱, xi ndyi̱tsꞌènkꞌién ini̱ma̱, xi ndyi̱tsꞌèntsjàjo̱ a̱sie̱én ngo ne xi tsꞌénda xotaa̱, ko̱jo kui xi ndyi̱tsꞌèntjó ko̱jo xi ndyi̱tsꞌèn kjo̱a̱ndiso.

¹⁶ –An, Kjisoo̱, katsangiya an ndítsjiena tsi̱ꞌe̱ nga ka̱tso̱yaa̱ ngayeje kui nii̱ ngayeje xota̱ na̱ngo̱xi̱i̱. Án boá xi ja̱ma̱a̱ ko̱jo xi xota̱ tji̱e̱e̱ Ndabii̱, án boá xi ńño ꞌna̱ xi ꞌbíjñá nga ndibáꞌásie̱én.

¹⁷ Kó A̱si̱énni̱xtjii̱n Néná, ko̱jo chjo̱ón cho̱tsa̱nga̱a̱, bi̱ tsó: –¡Ja̱bíꞌi̱n! Kó xi ku̱i̱ntꞌie̱é, bi̱ nga tsó: –¡Ja̱bíꞌi̱n! Kó xi xíndaá, ngatjandibá, kó xi mejeén, ta̱ ngatjeꞌekjaꞌá ndáfoaa̱ kjo̱a̱mindyioo̱n.

¹⁸ Ngayeje xi ndyi̱ntꞌiè kui én xí Néná tsáyà xi kjitꞌa kui xo̱jo̱o̱n, tsꞌénxiyàa̱ kui nii̱: Tsi tjín xi ko̱ósoón ngasee̱ kui nii̱, Néná ko̱ósoón tsi̱ꞌe̱ nga sa̱ꞌínꞌoón kui ngayeje kjo̱a̱ni̱ma̱ xi kjitꞌa kui xo̱jo̱o̱n,

¹⁹ kó tsi tjín xi kjo̱a̱ꞌáxín chií én xí Néná tsáyà xi kjitꞌa kui xo̱jo̱o̱n, Néná kjo̱a̱ꞌáxiín ngi̱ndie xi tsoboaá kui, ki̱a̱ xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjin ko̱jo na̱xi̱ńdáꞌniú tsjie xi kjitꞌa kui xo̱jo̱o̱n.

²⁰ Kui xi tsꞌéntsáyà kui nii̱, bi̱ tsó: –Jo̱o̱n, jè tsá ndibá án. Bo̱a̱ kjiꞌi. ¡Ja̱bíꞌi̱n, Ndi̱a̱ Kjisoo̱!

²¹ Ndi̱a̱ná Jesukristoo̱ ngatsjájnú ngayeje kjo̱a̱ndaa̱. Bo̱a̱ kjiꞌi.