Ni xi akakoo̱ 21 - Xo̱jo̱n eén Néná

Ndiꞌakꞌajmi tja̱tsi̱e̱e̱ ko̱jo nga̱sondie tja̱tsi̱e̱e̱

¹ Kó kamábe an ngo ndiꞌakꞌajmi xi tja̱tsi̱e̱, ko̱jo ngo nga̱sondie xi tja̱tsi̱e̱, ngatꞌa̱ ndiꞌakꞌajmi ko̱jo nga̱sondie xi tjoón je ngiti̱ jmíjín, kó ndáchíkoón je kichajá.

² Kó kamábe an na̱xi̱ńdáꞌniú tsjiee̱, na̱xi̱ńdáꞌniú Jerusale̱n tja̱tsi̱e̱e̱, xi tsꞌénfotjajenni ndiꞌakꞌajmii̱ ngindyi̱ko̱n Néná, nga je tikónnda nga kiniꞌánchoo̱n xikó maá ngo na̱ xi ku̱i̱xan nga je tikónnda nga ku̱i̱xanjo̱ xi̱ꞌii̱n.

³ Kó tsintꞌie an ngo nda̱ xi ꞌniú askjandáyà xi kjindibáni nínga tikón xi botixómaá, xi bi̱ katsó: Kꞌi̱e̱ tikón kui ngi̱ndie ndikón nínga Néná tikónjo̱ xotaa̱, kó kuí ki̱a̱ kꞌuijñájo̱, kó kuí boá xi xota̱ na̱xi̱ńdaá ka̱ma, kó ti̱kuíní Néná xi kꞌuijñájo̱ nga xikoó nga kui xi Nee̱ ka̱ma.

⁴ Kó kuí boá xi sa̱ꞌínxíjón ngayeje ndándyíkon xi kjo̱tjoo̱ ndyi̱ko̱n kui xotaa̱, kó ngiti̱ jmíjín xi ko̱yà ngase, ti̱nde ngiti̱ jmíjín xi skja̱ndá ngase, ti̱nde ngiti̱ jmíjín xi ni̱ma̱ ka̱tso̱ ngase, ti̱nde ngiti̱ jmíjín xi on ka̱ma ngasee̱, ngatꞌa̱ ni xi kisꞌie ngasꞌe̱ jè ngiti̱ jmíjín.

⁵ Kó kui xi botixómaá, bi̱ katsó: –Ngayeje nii̱ xi tjítsꞌen tja̱tsi̱e̱ an. Kó ti̱ bi̱ ti̱ katsóna nga: –Títꞌe xo̱jo̱n, ngatꞌa̱ ja̱koxi̱ boá kuí eén, kó ka̱ma si̱ꞌanꞌniátakón.

⁶ Kó bi̱ katsóna: –Jè kamá ngayeje nii̱. Án boá xi alfaa̱ ko̱jo xi omengaa̱, xi tjón ko̱jo xi fetꞌaa̱. Kó xi xíndaá, án xí ta̱ tsjañáa̱ nga kꞌuí ndáfoaa̱ kjo̱a̱mindyioo̱n.

⁷ Kui xi sa̱ꞌiín, sa̱ko̱ó ngayeje kui nii̱, kó án xí ka̱ma an Nee̱, kó kuí xi ndína ka̱ma.

⁸ Ta̱nga kui xota̱ xi tsiendikoón, ko̱jo kui xi sꞌijinjiín Néná, ko̱jo xi chꞌokoo̱n, ko̱jo xi tsꞌenkꞌién ini̱ma̱a̱, ko̱jo xi tondoo̱, ko̱jo xi ndyi̱tsꞌèn kjo̱a̱tjiꞌe, ko̱jo xi ndyi̱tsꞌèntsjàjo̱ a̱sie̱én ngo ne xi tsꞌénda xotaa̱, ko̱jo ngayeje xota̱ xi ndiso, kui xi̱ꞌba̱ ki̱a̱ stso̱ba̱a̱ nga ko̱e̱je̱ ngi̱jin ndáchíkón ndiꞌí xí ta̱nisién ꞌniú jee̱ nínga tjítí ndso̱ko̱a̱n asufree̱, kuí ni xi̱ꞌbi̱ xi xi ma joó kjo̱a̱bo̱yaa̱.

Na̱xi̱ńdá Jerusale̱n tja̱tsi̱e̱e̱

⁹ Kó kjindibákónna ngo kui xi yito ndítsjie xi ndyi̱yaꞌa chi̱tsen xí tjikítsie má kjo̱a̱ni̱ma̱ xi fetꞌaa̱, kó bi̱ katsóna: –Ja̱bíꞌi̱n, kokòo̱ chjo̱on xí ku̱i̱xanjo̱ cho̱tsa̱nga̱a̱.

¹⁰ Kó A̱si̱énni̱xtjii̱n Néná kijíjo̱na ngo tji̱ngi̱ xi je ko̱jo xi nkꞌa, kó akóna na̱xi̱ńdáꞌniú tsjie xi ꞌmí Jerusale̱n, kui xi tsꞌénfotjajenni ndiꞌakꞌajmii̱, ngindyi̱ko̱n Néná,

¹¹ kui na̱xi̱ńdáꞌniuú ꞌna̱ kamá ta̱ngatꞌanii̱ kjo̱a̱jee̱ Néná, ꞌna̱ kamáyà xikó maá ngo ndi̱jo̱ xi tsjakjiꞌi, xikoó ngo ndi̱jo̱ xi ꞌmí jaspe̱, ꞌna̱ kamá xikoó ngo chi̱tsen,

¹² nga ngo foaꞌatjiyajoo̱n kui na̱xi̱ńdáꞌniuú kisꞌijñaa̱ ngo xó xí je ko̱jo xi nkꞌa xi kisꞌijñaa̱ tiejó nga̱ntjo̱a̱, kó nga ngo nga ngo kui nga̱ntjo̱a̱a̱ kisꞌijña ngo ndítsjie, kó ki̱a̱ nga̱ntjo̱a̱a̱ kisitꞌaa̱ jaꞌeén nga tiejó tji̱e̱e̱ xota̱ xi chji̱a̱ni Israee̱l.

¹³ Ján nga̱ntjo̱a̱a̱ kisꞌijña xtji̱e̱e̱n nínga fotjo tsꞌueé, ján kisꞌijña xtji̱e̱e̱n nínga ta̱ꞌii̱n, ján kisꞌijña xtji̱e̱e̱n nínga na̱ngi, kó ti̱ ján kisꞌijña xtji̱e̱e̱n nínga ꞌbosꞌien tsꞌueé.

¹⁴ Kó xoó kui na̱xi̱ńdáꞌniuú tiejó ndi̱jo̱ kisꞌijña ngindiee̱, kó ki̱a̱ kisitꞌa jaꞌeén nga tiejó já apostroo̱ cho̱tsa̱nga̱a̱.

¹⁵ Kui xi tsꞌénchji̱a̱jona ngo yáxá xí to̱nsinié yaꞌa xi chꞌíchi̱bo̱a̱joni na̱xi̱ńdáꞌniuú, ko̱jo nga̱ntjo̱a̱a̱, ko̱jo xoó.

¹⁶ Ta̱ ngo chi̱bo̱a̱ kamá kui na̱xi̱ńdáꞌniuú nga tiyá, ko̱jo nga ndojó, kó kui yáxaá tsꞌachi̱bo̱a̱joni kui na̱xi̱ńdáꞌniuú: Kó jó mi̱ jó úchán kilometro̱ kamá, kó ti̱ bo̱a̱ ti̱ kjiꞌi nga tiyaá, ko̱jo nga ndojoó, ko̱jo nga nkꞌaa̱.

¹⁷ Kó ti̱ tsꞌachi̱bo̱a̱ xoó na̱xi̱ńdáꞌniuú: Kó ichítié ko̱jo tjiꞌún metro̱ kamá, nga chi̱bo̱a̱a̱ xota̱ xi katsꞌénkjién kui ndítsjiee̱.

¹⁸ Kó xoó kui na̱xi̱ńdáꞌniuú ndi̱jo̱ xi ꞌmí jaspe̱ kamándani, kó na̱xi̱ńdáꞌniuú to̱nsinié soboá soboá kamándani, xikó maá ngo chi̱tsen xí kuí soboá.

¹⁹ Ndi̱jo̱ xi kamándani ngindiee̱ xoó kui na̱xi̱ńdáꞌniuú ngayeje to̱ko̱ya ndi̱jo̱ xi tsjakon xi ikꞌíndoo̱: Ndi̱jo̱ xi tjoón, ndi̱jo̱ jaspe̱ ikꞌíjñaá, xi ma joó ndi̱jo̱ safiro̱, xi ma jaán ndi̱jo̱ ángata̱, xi ma nijoón ndi̱jo̱ esmeralnda̱,

²⁰ xi ma uún ndi̱jo̱ ónise̱, xi ma juu̱n ndi̱jo̱ kornalina̱, xi ma yitoo̱ ndi̱jo̱ krisólito̱, xi ma jii̱n ndi̱jo̱ berilo̱, xi ma nijaa̱n ndi̱jo̱ topasio̱, xi ma tiee̱ ndi̱jo̱ krisópraso̱, xi ma tiengoo̱ ndi̱jo̱ jasinto̱, kó xi ma tiejoó ndi̱jo̱ amatista̱.

²¹ Kó nga tiejó nga̱ntjo̱a̱a̱ kuí boá xi tiejó to ixkiìꞌ, nga ngo nga ngo nga̱ntjo̱a̱a̱ ngo to ixkìꞌ kamándani. Kó ndi̱yàtieé kui na̱xi̱ńdáꞌniuú to̱nsinié soboá soboá xi kamándani, xikoó tsi ngo chi̱tsen xí ꞌna̱.

²² Kó nde ngo na̱ngo̱xi̱ kamábejín an ki̱a̱ na̱xi̱ńdáꞌniuú, ngatꞌa̱ Ndi̱a̱ná xí tjiín ngaꞌniuú kuí boá xi na̱ngo̱xi̱i̱ ko̱jo xi cho̱tsa̱nga̱a̱.

²³ Kó kui na̱xi̱ńdáꞌniuú jmí tsꞌué ti̱nde jmí sá chjiénjiín xi sa̱ꞌíntsijee̱n, ngatꞌa̱ ndiꞌií kjo̱a̱jee̱ Néná xí tjítsꞌéntsíjee̱n, kó cho̱tsa̱nga̱a̱ boá xi ndiꞌí xí tsꞌentsíjee̱n.

²⁴ Kó ngayeje xota̱ na̱xi̱ńdaá kꞌuitsómá nga sa̱ꞌíntsijee̱n ndiꞌí xí fotjoni kui na̱xi̱ńdáꞌniú jàn, kó ngayeje ree̱ tꞌanangii̱ kjo̱e̱ꞌéjoo̱ kjo̱a̱jee̱ kui na̱xi̱ńdaá.

²⁵ Kó nga̱ntjo̱a̱a̱ jmíni̱xtjin si̱chjá nga ni̱xtjii̱n, kó ka̱ma jñójín,

²⁶ kó kjo̱a̱cho̱o̱n ko̱jo kjo̱a̱yandikoón ngayeje na̱xi̱ńdaá kjo̱joo̱ kui.

²⁷ Kó jmíjín kótsꞌèn nga kꞌo̱sꞌien ni xi ndajín, ti̱nde ka̱májín kꞌo̱sꞌien xota̱ xi ndyi̱tsꞌèn ni xi ta̱nisién ꞌniú chꞌokjiꞌi ko̱jo tsi kjo̱a̱ndiso, ta̱kuítsí xi kꞌo̱sꞌien kui xi kjitꞌa jaꞌeén xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjii̱n kui xi tikoón cho̱tsa̱nga̱a̱.