Ni xi akakoo̱ 19 - Xo̱jo̱n eén Néná

Bi̱ tsꞌén akakoo̱ Juaa̱ kótsꞌèn kiniꞌántsjaá Néná ndiꞌakꞌajmi jàn

¹ Jaskan ngije kamá kui nii̱, tsintꞌie an ngo nda̱ xi ꞌniú askjandáyà xi kjindibáni ndiꞌakꞌajmii̱ xi xikoó tsi nda̱a̱ kjín xota̱, xi bi̱ katsó: ¡Nganiꞌántsjaá Ndi̱a̱ná! Kjo̱a̱ꞌnaxiéꞌaá, ko̱jo kjo̱a̱jee̱, ko̱jo ngaꞌniuú tsi̱ꞌe̱ Néná boá.

² Ngatꞌa̱ kuí boá xi kixi̱ ko̱jo xi ja̱koxi̱ nga tsꞌénjéná, ngatꞌa̱ je katsꞌénjeé na̱ masiee̱n, kui xi ta̱ngatꞌanii̱ kjo̱a̱tondoo̱ nga katsꞌénkjatsón ngayeje tꞌanangii̱, kó Néná jè katsꞌéngojo̱ jiín nga kiniꞌánkꞌién mosoo̱.

³ Sꞌe̱ ti̱ bi̱ ti̱ katsó nginí ingo ndi̱yà: –¡Nganiꞌántsjaá Néná! Kó ṉdi̱i̱ kui naa̱ ngatsjéni̱xtjin nga ko̱e̱je̱nijíngí nkꞌa jàn.

⁴ Kó nga kan nijón xota̱ xi xchaá ko̱jo nga nijón kui xi síndoo̱ kixindyiaxtien ngaskande tꞌanangii̱, kó katsꞌéndikón Néná xí botixómaá, kó bi̱ katsó nga tsíchji̱a̱: –¡Bo̱a̱ kjiꞌi! ¡Nganiꞌántsjaá!

⁵ Kó kje̱n nínga tikón xi botixómaá kandaꞌyáni ngo nda̱, xi bi̱ katsó: ¡Ti̱ꞌantsjàjnúu̱ Néná, ngayeje xi mosoo̱, ko̱jo xi bendikón, xi xchá xí kjindí!

⁶ Ti̱ tsintꞌie an ngo ni xi xikoó nda̱a̱ kjín xota̱, xikó má tsꞌén fonie ndáfoaa̱ ndejeèꞌ nga ꞌbóka, ko̱jo tsi xikótsꞌèn ꞌniú fonie cho̱ꞌo̱o̱n, xi bi̱ katsó: ¡Nganiꞌántsjaá Néná! Ngatꞌa̱ jè ítsꞌi̱yanii̱ nga ko̱tíxoma Ndi̱a̱ná, Néná xí tjiín ngaꞌniuú.

⁷ Tsja ngatamaná, nga tsie máná kjo̱a̱tsja, kó ko̱e̱ꞌée̱ kjo̱a̱je, ngatꞌa̱ jè jachó chi̱bo̱a̱a̱ nga ku̱i̱xan ndií cho̱tsa̱nga̱a̱, kó chjo̱ón jè tikónnda:

⁸ Jè katseꞌéndieè tsi̱ꞌe̱ nga ko̱a̱ja̱ ńjño xi nda, ko̱jo xi tsjie, ko̱jo xi ꞌna̱. Ngatꞌa̱ kuí ńjño ndaa̱ xi bokó nga ni xi kixi̱ katsꞌeén xota̱ na̱xi̱ńdá tsjiee̱.

Nga xi̱ni̱e̱ ṉño̱ ndiꞌibixaa̱n cho̱tsa̱nga̱a̱

⁹ Kó kui ndítsjiee̱ bi̱ katsóna: –Títꞌe ji xo̱jo̱n kui nii̱: Achichíra̱tsjaa̱ kui xi kiꞌmíyaà tsi̱ꞌe̱ nga ko̱e̱je̱ ndiꞌibixaa̱n cho̱tsa̱nga̱a̱. Kó bi̱ katsó ngase: –Én xí ja̱koxi̱i̱ Néná boá xi̱ꞌbi̱.

¹⁰ Kó asientꞌáa̱ tikóna ngi̱ndie se kui ndítsjiee̱, tsi̱ꞌe̱ nga sa̱ꞌindikón án katsaki, ta̱nga kui bi̱ katsóna: –Jmí ngata̱ bo̱a̱jín niꞌín ji, ngatꞌa̱ mosoo̱ Néná boá an nga, xikoó ji, ko̱jo xikoó ntsꞌie xi ꞌniú ꞌniátakón ni xi katsꞌén Kjisoo̱. ¡Néná boá xi ti̱ꞌindikín jí! Ngatꞌa̱ én xi akóyá Kjisoo̱, kuí boá xi tsꞌénkíchji̱a̱ chji̱ni̱e̱ꞌe̱én Néná.

Nda̱ xi tjísón ndi̱je̱e̱ tiboaa̱

¹¹ Kó kamábe an nga tji̱e̱nti̱xa̱ ndiꞌakꞌajmii̱, kó ngo ndi̱je̱ tiboa tikón ki̱a̱a̱, kó kui nda̱ xi tikónsoón kuí xí ꞌmí xi ꞌNiátakón ko̱jo xi Ja̱koxi̱i̱, ngatꞌa̱ nga kixi̱ atíxoma nga askjantjé.

¹² Ndyi̱ko̱n ꞌna̱ kamá xikoó tsi ngo ndiꞌí, kó achichí kjín korona̱ kisꞌińdoo̱ to̱ko̱, kó ngo jaꞌén kisitꞌaa̱, xi ta̱ ngototo kui xi be,

¹³ kó ngo ńjño tsꞌényajá xi jín katsꞌeni, kó jaꞌeén kuí xí ꞌmí: EÉN NÉNÁ.

¹⁴ Kó ki̱a̱ kijítji̱ngii̱ ngayeje jájuún ndiꞌakꞌajmii̱, xi ndyi̱yajá ńjño nda xi tiboa ko̱jo xi tsjie, kó ndi̱je̱ tiboa síndosoón ngayejee̱.

¹⁵ Kó tsꞌoa jatjoni ngo ki̱cha̱ xi yojó, tsi̱ꞌe̱ nga sa̱ꞌínꞌoón xota̱ na̱xi̱ńdaá, kó kuí boá xi tajá tsꞌén ko̱tíxomaa̱ xotaa̱, kó sa̱ꞌínkjindibánié kjo̱a̱xcha̱án Néná xí tjiín ngaꞌniuú.

¹⁶ Kó nga̱són ńjñoo̱ ko̱jo nga̱són ti̱ꞌmi̱í kjitꞌa ngo jaꞌén xi bi̱ tsó: REE̱ NGAYEJE RE KO̱JO NDI̱A̱A̱ NGAYEJE NDI̱A̱.

¹⁷ Kó kamábe an ngo ndítsjie xi sikónkixi̱són nga̱soón tsꞌueé, kó bi̱ katsó nga ꞌniú askjandáyaá ngayeje ni̱sie xi fítji̱e̱n ndiꞌakꞌajmii̱: –¡Ja̱bíjnúꞌun, kó ngatamatikójnú kui sꞌueé tsi̱ꞌe̱ nga xi̱ni̱e̱jnú nichinie xi tsja̱ajnú Néná,

¹⁸ tsi̱ꞌe̱ nga xi̱ni̱e̱jnú yojoo̱ já ree̱, ko̱jo yojoo̱ ngito̱ko̱o̱ jájuún, ko̱jo yojoo̱ xota̱ xi ꞌniú, ko̱jo yojoo̱ ndi̱je̱ ko̱jo xi ꞌbíndosoón, ko̱jo yojoo̱ ngayeje xota̱ xi tjimándé ko̱jo xi moso̱ xi kastiñá, ko̱jo xi xchá xí kjindí!

¹⁹ Kó kamábe an cho̱ chꞌokjiꞌii̱ ko̱jo ngayeje já re xi chji̱a̱ni tꞌanangii̱ ko̱jo jájuún, xi kamátikó tsi̱ꞌe̱ nga skjánjo̱ kui xi tikónsoón ndi̱je̱e̱ ko̱jo jájuún.

²⁰ Kó kui cho̱ chꞌokjiꞌii̱ kandobá, ko̱jo kui nda̱ chji̱ni̱e̱ꞌén ndísoó kui xi kjín kjo̱a̱ndikón katsꞌén ngindyi̱ko̱n, kui kjo̱a̱ndikón xí katsꞌénkjién, kui nda̱ chji̱ni̱e̱ꞌe̱én ndísoó nga índisojo̱ xota̱ xi katsjandiè nga ikꞌíjñaá chi̱bo̱a̱a̱ kui cho̱ chꞌokjiꞌii̱, ko̱jo nga katsꞌéndikón a̱sie̱én, kó kui cho̱ chꞌokjiꞌii̱, ko̱jo nda̱ chji̱ni̱e̱ꞌe̱én ndísoó, ikichijmijin tikón ngi̱jii̱n ndáchíkón ndiꞌí xí ta̱nisién ꞌniú je nínga tjítíngajo̱ ndso̱ko̱a̱n asufree̱.

²¹ Kó xi ngasee̱ ki̱cha̱ xi jatjoni tsꞌoa kui xi tjísoón ndi̱je̱e̱ kiniꞌánkjiesónni, kó ngayeje ni̱sie xi kjinie yojo siee̱n, ngaskande tsꞌajón maá nga iskjinie yojoo̱ kui xotaa̱.