Ni xi akakoo̱ 17 - Xo̱jo̱n eén Néná

Nga kiniꞌánjeé na̱ masiee̱n

¹ Kó ngo kui ndítsjie xi yitoo̱, kui xi ndyi̱yaꞌa nga yito chi̱tse̱én, kjindibákónna, kó bi̱ katsóna: –Ja̱bíꞌi̱n, tsi̱ꞌe̱ nga kokòo̱ xikótsꞌèn ka̱majeé kui na̱masien xi tikónsón nga̱són ndáfoaa̱,

² kui xi ngayeje já ree̱ kui tꞌanangii̱ je kisꞌiejo̱, kó ngayeje xotaa̱ kui tꞌanangii̱ je katsꞌejo̱ binoo̱ kjo̱a̱tondoo̱.

³ Kó jaskan kui ni xi akóna kui A̱si̱énni̱xtjii̱n Néná, kui ndítsjiee̱ kijíjo̱na ngo nangi kixí, kó ki̱a̱ kamábe an ngo na̱ xi tikónsoón ngo cho̱ chꞌokjiꞌi xi iní a̱sie̱én, kui xi ngayeje yojoo̱ nga kjitꞌaa̱ jaꞌén nínga chꞌo tjítsoó Néná. Yito ma to̱ko̱ ko̱jo tie ndi̱ja̱ xi tjiín kui cho̱o̱.

⁴ Kó kui naa̱ ńjño xi iní ꞌniú, ko̱jo xi iní nda yajá, kó yajáyaá ni to̱nsinié xi ndi̱jo̱ tsjakon ko̱jo to ixkìꞌ, kó ngi̱ya tsja tsꞌényaꞌa ngo chi̱tsen xí to̱nsinié xi tjikítsie má ni xi ta̱nisién ꞌniú chꞌokjiꞌi ko̱jo ni xi ndándií kjo̱a̱tondoo̱,

⁵ kó xtjien kjitꞌaa̱ ngo jaꞌén xi tjiꞌmá xi bi̱ tsó: “BABILONIA̱ NA̱XI̱ŃDÁ XI JE, KUI BOÁ XI NA̱AA̱N NGAYEJE ÍNCHJÍNMASIÉN KO̱JO NGAYEJE NI XI TA̱NISIÉN ꞌNIÚ CHꞌO KJIꞌI XI TJÍN KUÍ NGA̱SONDIEE̱.”

⁶ Kó kamábe an nga kui naa̱, kamáchꞌi̱ni jiín xota̱ na̱xi̱ńdá tsjiee̱ Néná, ko̱jo jiín xota̱ xi jesónni ta̱ngatꞌaa̱ nga chistikoo̱ Kjisoo̱ kamá. Nga kamábe an, achichí kijíndikónna.

⁷ Kó kui ndítsjiee̱, bi̱ katsóna: –Míkjo̱a̱a̱ nga fíndikoón jí. Kꞌi̱e̱ xiyaá kjo̱a̱a̱ ni xi tjiꞌmaá kui naa̱, ko̱jo kui cho̱ chꞌokjiꞌi xi tikónsoón, kui xi tjiín yito to̱ko̱ ko̱jo tie ndi̱ja̱a̱.

⁸ Kui cho̱ chꞌokjiꞌi xi je kamáyè ji, kuí boá xi kisꞌijña ngasꞌe̱, ta̱nga jè ngiti̱ jmíjín ngotꞌe̱, ta̱nga ki̱a̱ kjo̱tjoni ti̱xa̱na̱nga̱a̱ tꞌanangii̱ nga kji̱ndi̱bá ngindiee̱ nga xcha̱ja, kó xotaa̱ kui nga̱sondiee̱, kui xi kjitꞌajín jaꞌeén xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjin, ndeskande koó nga ítjatsꞌennii̱ kui nga̱sondiee̱, achichí ko̱e̱je̱ndikoón nga sku̱i̱e̱ kui cho̱ chꞌokjiꞌi xi kisꞌijñaa̱, kui xi ngiti̱ jmíjín ngotꞌe̱, ta̱nga kji̱ndi̱bá nginí.

⁹ Tsi̱ꞌe̱ nga ka̱makjínná kuí nii̱ kjo̱a̱kjínkón boá xi chjieén: Nga yito to̱ko̱o̱, kuí xí tsoó nga yito na̱xi̱ nínga tikónsón kui naa̱, kó ti̱kuíní nga yito ree̱,

¹⁰ ún kui ree̱ xi je jesón, ngo xi je tsꞌénbotixómá, kó xi ingoo̱ kji̱e̱ foeꞌejín, ta̱nga ngije kjo̱e̱ꞌe, tsiejín kꞌo̱ndíyaá.

¹¹ Kó kui cho̱ chꞌokjiꞌii̱ kui xi kui kamaá, ta̱nga kuijín, kuí boá xi ma jii̱n, ndatsi ti̱ kuí boá ngo xi yitoo̱, kó ki̱a̱ tsꞌénfí nínga xcha̱ja ngatsjéni̱xtjin.

¹² Kó nga tie ndi̱ja̱ xi je kamáyè ji, kuí boá nga tie já ree̱ xi kji̱e̱ ꞌbítsi̱yajiín nga ko̱tíxoma, ta̱nga ta̱ ngo tsi ora̱ nga sa̱ko̱ó xá nga xikoó ree̱, kui ko̱jo kui cho̱ chꞌokjiꞌii̱.

¹³ Nga tie kui já ree̱ jè nijan síndo nga índa nga tsja̱á ngaꞌniuú ko̱jo xaá kui cho̱ chꞌokjiꞌii̱.

¹⁴ Kuii̱ xi skjánjo̱ cho̱tsa̱nga̱a̱, ta̱nga cho̱tsa̱nga̱a̱ sa̱ꞌiín, ngatꞌa̱ kuí boá xi Ndi̱a̱a̱ ngayeje ndi̱a̱ ko̱jo Ree̱ ngayeje re, kó kui xota̱ xi ki̱a̱ nijan síndojo̱, kuí boá xi Néná tsíchji̱a̱a̱ nga xota̱ xi ꞌniátakón.

¹⁵ Kó kui ndítsjiee̱, ti̱ bi̱ ti̱ katsóna nga: –Ndejèꞌ xi kamáyè ji, nínga tikónsón kui na̱ masiee̱n, kuí boá xi nangi, ko̱jo xi xota̱, ko̱jo xi én, ko̱jo xi na̱xi̱ńdá.

¹⁶ Kó nga tie kui ndi̱ja̱a̱ kui cho̱ chꞌokjiꞌi xi je kamáyè ji, kuí boá xi sa̱ꞌínchꞌó na̱ masiee̱n, kó ku̱i̱ꞌíjñámasien kó ku̱i̱ꞌíjñá kjiꞌixtí, skji̱ni̱e̱ yojoo̱, kó ngi̱jin ndiꞌí ku̱i̱ꞌítí.

¹⁷ Ngatꞌa̱ Néná je íjii̱n ngi̱jin ini̱ma̱a̱ tsi̱ꞌe̱ nga sa̱ꞌín ni xi mejeén kui: Índa tsi̱ꞌe̱ nga sa̱ꞌínkꞌasꞌiee̱n ngi̱ndie nínga botixómá kui cho̱ chꞌokjiꞌii̱, ngaskande nga kjo̱tjosón ni xi katsó Néná.

¹⁸ Kó kui na̱ xi je kamáyè ji, kuí boá kui na̱xi̱ńdáꞌniú xí botixómaá ngayeje já ree̱ kui tꞌanangii̱.