Ni xi akakoo̱ 16 - Xo̱jo̱n eén Néná

Chi̱tsen xi ndyi̱a̱ kjo̱a̱xcha̱án Néná

¹ Kó tsintꞌie an ngo nda̱ xi ꞌniú tsíchji̱a̱ xi jatjoni na̱ngo̱xi̱i̱, kó bi̱ katsoó nga yito kui ndítsjiee̱: –Tangínjnú, kó chjatjónjnú nga̱soón tꞌanangii̱ nga yito kui chi̱tse̱én nínga ndyi̱a̱ kjo̱a̱xcha̱án Néná.

² Kui ndítsjie xi tjoón kijí, kó iskjitjónjón nga̱soón tꞌanangii̱ ni xi ndyi̱a̱ chi̱tse̱én, kó ngayeje kui xota̱ xi ndyi̱yaꞌa chi̱bo̱a̱a̱ kui cho̱ chꞌokjiꞌii̱, ko̱jo xi katsꞌéndikón a̱sie̱én, ṉdo xi ndajín ko̱jo xi on jatjoo̱ ngayeje yojoo̱.

³ Kó ndítsjie xi ma joó, iskjitjónjón nga̱soón ndáchíkoón ni xi ndyi̱a̱ chi̱tse̱én, kó ndáfoaa̱ ndáchíkoón jín kamá, xikó maá jiín ngo nda̱ xi kiniꞌánkꞌién, kó ngayeje cho̱, ko̱jo xota̱, ko̱jo xka̱ xi tjín ngi̱jin ndáchíkoón jesón.

⁴ Kó ndítsjie xi ma jaán, iskjitjónjón nga̱soón ngayeje xo̱ngà ko̱jo ndáńchꞌi̱ ni xi ndyi̱a̱ chi̱tse̱én, kó jín kamá kui ndáfoaa̱.

⁵ Kó tsintꞌie an nga ndítsjie xi tsi̱ꞌe̱ ndáfoaa̱, bi̱ katsó: –Jí xí kixi̱ ji, jí xí jí, Ndi̱a̱, jí xí kamá ji ngasꞌe̱, jí xí tsjie ji, ngatꞌa̱ jí xí kiniꞌínjée̱ kui nii̱,

⁶ ngatꞌa̱ kuí jaá xi iskjitjón jiín xota̱ na̱xi̱ńdá tsjièe̱, ko̱jo já chji̱ni̱e̱ꞌée̱n, kó ngotꞌe̱ ꞌne̱ jí xí tiboeꞌée̱ nga jín ndyi̱ꞌbi. ¡Nda kamaá!

⁷ Kó ti̱ tsintꞌie an nga tsíchji̱a̱ ngo xi tikón ṉchandikoón, xi bi̱ katsó: –Jo̱o̱n, jí boá xi Ndi̱a̱ná xi tjiín ngaꞌniú, jí xí ja̱koxi̱ ji, ko̱jo jí xí kixi̱ niꞌínjé jí.

⁸ Kó ndítsjie xi ma nijoón iskjitjónjón tsꞌueé ni xi ndyi̱a̱ chi̱tse̱én, kó katsjaá ngaꞌniú tsꞌueé, tsi̱ꞌe̱ nga ka̱ma sa̱ꞌínchjaán xotaa̱.

⁹ Kó ngayeje xotaa̱ nga katsꞌénchjaán sibeé tsꞌueé, ta̱nga kui xotaa̱, ti̱ kuí xí katsꞌénkꞌoyájín yojoo̱, ti̱nde katsjájiín kjo̱a̱je Néná, ta̱sá chꞌo katsoó jaꞌeén kui Néná xí tjiín ngaꞌniuú kjo̱a̱a̱ kui kjo̱a̱ni̱ma̱a̱.

¹⁰ Kó ndítsjie xi ma uún iskjitjónjón nínga botixómá kui cho̱ chꞌokjiꞌii̱ ni xi ndyi̱a̱ chi̱tse̱én, kó ngayeje nínga botixómá kamájñó, kó kui xotaa̱ ngaskande iskjinieya má na̱je̱n nga on kamaá,

¹¹ ta̱nga nde bo̱a̱ tsꞌén katsꞌénkꞌoyájín yojoo̱ nga katsꞌén ni xi ndajín, ta̱sá má ta̱ngatꞌanii̱ nga on kamaá, ko̱jo kjo̱a̱a̱ kui ṉdo xi tsajaá nga chꞌo katsoó kui Néná xí tsi̱ꞌe̱ ndiꞌakꞌajmii̱.

¹² Kó ndítsjie xi ma juu̱n iskjitjónsón ndejèꞌ xi ꞌmí Éufratee̱ ni xi ndyi̱a̱ chi̱tse̱én, kó ndáfoaa̱ kui ndejeèꞌ kixí, tsi̱ꞌe̱ nga ka̱ma kjo̱a̱ꞌa kui já ree̱ xi ndibání xtji̱e̱e̱n nínga fotjo tsꞌueé.

¹³ Kó kamábe an nga ki̱a̱ tsꞌoa cho̱ tamá xí yito to̱koo̱, tsꞌoa cho̱ chꞌokjiꞌii̱, ko̱jo tsꞌoa nda̱ chji̱ni̱e̱ꞌén ndísoó, jatjoni ján a̱siénni̱xtjin xi ndajín xi ja̱ kon xkji̱e̱ má kón,

¹⁴ ngatꞌa̱ a̱si̱énni̱xtjii̱n xindajín boá, xi katsꞌén kjo̱a̱ndikón, kó kijíkꞌítikó ngayeje já re xi chji̱a̱ni kui nga̱sondiee̱ tsi̱ꞌe̱ nga skjánjo̱ kui Néná xí tjiín ngaꞌniuú. Bo̱a̱ sa̱ꞌín nga kjo̱chó ni̱xtjin, kjiꞌanga Néná ko̱tíjeé ngayeje xota̱ nga̱sondiee̱.

¹⁵ “Tsitsíjenjnúu̱, nga an kji̱ndi̱bá an xikoó ngo nda̱ xi chejé. Achichíra̱tsjaa̱ xi kjóféjín, ko̱jo xi ndyi̱yajá ńjñoo̱, tsi̱ꞌe̱ nga kjótsoꞌbá kjiꞌixtíjín, kó xcha̱jín kjo̱a̱soboaá kjo̱a̱kjiꞌixtií.”

¹⁶ Kó kui a̱si̱énni̱xtjii̱n xindajiín ítikó ngayeje já re ki̱a̱ ngi̱ndie xi ꞌmí Armajendoo̱n nga én ebreo̱.

¹⁷ Kó ndítsjie xi ma yitoo̱ iskjitjón ngi̱jinꞌa̱sie̱èn ni xi ndyi̱a̱ chi̱tse̱én, kó ndeskande nínga tikón na̱ngo̱xi̱ ndikoón Néná xí botixómaá jatjoni ngo nda̱ xi ꞌniú tsíchji̱a̱, xi bi̱ katsó: –¡Jè kamá!

¹⁸ Kó jaꞌatꞌe, ko̱jo kandaꞌyá nda̱, ko̱jo janie cho̱ꞌo̱n, kó jatsié tꞌanangii̱ ta̱ngatꞌanii̱ ngo kjo̱a̱ndi̱ko̱n xí ta̱nisién ꞌniú xí kamá, xi kji̱e̱ ngo ndi̱yà ma ndeskande koó nga tjín xota̱ kui nga̱sondiee̱.

¹⁹ Kó kui na̱xi̱ńdáꞌniuú ján tjín kamá, kó ngayeje na̱xi̱ńdá xí tjín nga̱sondiee̱ ixóndó, kó Néná jaꞌátsjiee̱n kui na̱xi̱ńdáꞌniú xi ꞌmí Babiloniaa̱, tsi̱ꞌe̱ nga sa̱ꞌínkꞌi binoo̱ kjo̱a̱xchán ꞌniuú Néná.

²⁰ Kó ngayeje tji̱ngi̱, ko̱jo ngayeje kꞌijñá, ko̱jo ngayeje na̱xi̱ kichajá.

²¹ Kó ndiꞌakꞌajmi jàn kjindibáni nga ixó nga̱soón xotaa̱ ndókoá xi tsꞌatio yichán kilo̱ eé, kó xotaa̱ chꞌo katsoó Néná kjo̱a̱a̱ kui kjo̱a̱ni̱ma̱ xi̱ꞌbi̱, ngatꞌa̱ ta̱nisién ꞌniú je kui kjo̱a̱ni̱ma̱ xi kamaá.