Ni xi akakoo̱ 15 - Xo̱jo̱n eén Néná

Ndítsjie xi ndyi̱yaꞌa yito kjo̱a̱ni̱ma̱a̱

¹ Kó kamábe an ndiꞌakꞌajmi jàn ingo chi̱bo̱a̱ xi je ko̱jo xi kijíndikónna: Yito ndítsjie xi ndyi̱yaꞌa nga yito kjo̱a̱ni̱ma̱ xi fetꞌaa̱, kui xi fetꞌani kjo̱a̱xcha̱án Néná.

² Kamábe an ngo ni xi ja̱kjiꞌi ngo ndáchíkón xi chi̱tsen xi tsꞌájinni ndiꞌí kjiꞌi, kó kui xota̱ xi katsꞌeén cho̱ chꞌokjiꞌii̱, ko̱jo a̱sie̱én, ko̱jo chi̱bo̱a̱a̱ jaꞌeén, ko̱jo xki̱i̱, ki̱a̱ ndyi̱a̱kixi̱ tꞌa kui ndáchíkón xi chi̱tse̱én nga ndyi̱yaꞌa arpa̱ xi Néná katsjaá.

³ Kó kisie soó Moisee̱, mosoo̱ Néná, ko̱jo soó cho̱tsa̱nga̱a̱. Bi̱ tsó kui soó: Achichí je ko̱jo fíndikónná ngayeje ni xi kiniꞌínde, jí boá xí Ndi̱a̱ná, kui xi Néná xí tjiín ngaꞌniuú, kixi̱ ko̱jo ja̱koxi̱ boá ndi̱yàa̱, jí boá xí Ree̱ ngayeje xota̱ na̱xi̱ńdá tsjiee̱.

⁴ ꞌYá xi stsa̱kjonjiín, Ndi̱a̱. ꞌYá xi tsja̱ajiín kjo̱a̱je jaꞌée̱n. Ngatꞌa̱ ta̱ jí tsi xi tsjie ji, kuíni nga ngayeje na̱xi̱ńdaá kji̱ndi̱bá, kó sa̱ꞌíndikoón, ngatꞌa̱ jè akake ji nga ta̱nisién kixi̱ ji.

⁵ Kó jaskan ngije kamá kui nii̱, askotsijen an kó kamábe an ndiꞌakꞌajmii̱ nga katjoxꞌá ngi̱ndie ndikoón Néná, nínga tikón ṉchandikón chistikoo̱,

⁶ kó ki̱a̱ kui na̱ngo̱xi̱i̱ jatjoni kui xi yito ndítsjie xi ndyi̱yaꞌa nga yito kjo̱a̱ni̱ma̱a̱, nga ndyi̱yajá ńjño nda xi tsjie ko̱jo xi ꞌna̱a̱, kó tji̱xin xí to̱nsinié ndyi̱yaꞌa xtji̱e̱e̱n ni̱se̱e̱n.

⁷ Kó ngo kui xi síndoo̱, katsjaá nga ngo nga ngo kui ndítsjiee̱ ngo chi̱tsen xí to̱nsinié xi tjikítsie má kjo̱a̱xcha̱án Néná, kui Néná xí tikón ngatsjéni̱xtjii̱n.

⁸ Kó kui ndo̱bo̱a̱néná kisꞌikitsié má ṉdi̱ xi kji̱ndi̱báni kjo̱a̱a̱ kjo̱a̱jee̱, ko̱jo ngaꞌniuú Néná, kó nde ngojín xi kamaá tsꞌasꞌien ngase ki̱a̱a̱ ngaskande nga jatjosón nga kamá nga yito kui kjo̱a̱ni̱ma̱ xi ndyi̱yaꞌa kui ndítsjiee̱.