Ni xi akakoo̱ 11 - Xo̱jo̱n eén Néná

Nga jó chistikoo̱

¹ Kó ngo yáxá katseꞌéna, xikoó ngo yá xí chꞌíchi̱bo̱a̱ni, kó bi̱ kiꞌmína: –Ti̱sítji̱n, kó chꞌi̱chi̱bo̱e̱ ji na̱ngo̱xi̱i̱ Néná, ko̱jo ṉchandikoón, kó tꞌíxki̱ ji kui xi ki̱a̱ ndyi̱tsꞌéndíkón Néná.

² Ta̱nga ngata̱ chꞌíchi̱bo̱e̱jín ji ndi̱tsee̱n na̱ngo̱xi̱i̱, ngatꞌa̱ kui ngi̱ndiee̱ xota̱ xi jundío̱jín boá xi je kiniꞌánkꞌasꞌiee̱n, kó kuí boá xi tsja̱nié tsja̱fe kui na̱xi̱ńdá tsjiee̱ yichán jó sá.

³ Kó án sangiya an jó chistiko̱ xi ko̱a̱ja̱ ńjño tokjuie, nga ka̱tso̱yà én xí án katsjáa̱ ngo mi̱ jó úchán ichítié ko̱jo tie ni̱xtjin.

⁴ Nga jó kui chistikoo̱ kuí boá nga jó yáꞌoliboo̱, ko̱jo nga jó ni xi ꞌbítíyá ndiꞌí xí tsꞌentsíjee̱n, kui xi síndo kje̱n nínga tikón kui Néná xí tsi̱ꞌe̱ tꞌanangii̱.

⁵ Kó tsi tjín xí mejeén sa̱ꞌínꞌoón, kui chistikoo̱ ndiꞌí ꞌboxiéni tsꞌoa, kó kui ndiꞌií tsꞌenkjiéni ngayeje kondraa̱, kó bo̱a̱ tsꞌén nga ko̱yà ta̱ ꞌyání xi mejeén tsi tjín xí ni sa̱ꞌiín.

⁶ Kui chistikoo̱ tjiín ngaꞌniú tsi̱ꞌe̱ nga ku̱i̱ꞌíchjá ndiꞌakꞌajmii̱, tsi̱ꞌe̱ nga ko̱a̱ꞌájín stseé kui ni̱xtjin nga ndyi̱tsóyá én xi kixiyàa̱, kó ti̱ tjiín ngaꞌniú tsi̱ꞌe̱ nga ndáfoaa̱ jín sa̱ꞌín, ko̱jo tsi̱ꞌe̱ nga sa̱ꞌínkjaꞌatio kjo̱a̱ni̱ma̱ xotaa̱ kui tꞌanangii̱ nga kji̱ndi̱bá ngayeje to̱ko̱ya ni xi ndajín, ta̱ xi kótjín ndi̱yà mejénrií.

⁷ Ta̱nga ngije kamá xaá nga chistiko̱, kui cho̱ chꞌokjiꞌi xi kjo̱tjoni ti̱xa̱na̱nga̱a̱ tꞌanangii̱ skjánjo̱, sa̱ꞌiín, sꞌe̱ sa̱ꞌínkꞌién.

⁸ Kó yojo kꞌiee̱n ki̱a̱ kjoyójo ngi̱ya ndi̱yàtieé kui na̱xi̱ńdáꞌniú kui xi nga eén a̱si̱énni̱xtjii̱n, Sondoma̱ ko̱jo Ejipto̱ ꞌmí, nínga kiniꞌánkꞌién Ndi̱a̱ná nga akjatꞌa kro.

⁹ Kó xota̱ xi chji̱a̱ni kjín nangi, kjín xtín xota̱, ko̱jo én, ko̱jo na̱xi̱ńdá xi ján ni̱xtjin masien sku̱i̱e̱ yojo kꞌiee̱n, kó tsja̱ndièjín nga kjónijín.

¹⁰ Kó kui xota̱ xi síndo tꞌanangii̱ tsja ka̱maa̱ nga kju̱i̱e̱són kui chistikoo̱, achichí tsja kꞌuieé, kó ngaskande ni tsja̱á xkjín, ngatꞌa̱ nga jó kui já chji̱ni̱e̱ꞌe̱én Néná boá xi tsie kjo̱a̱ni̱ma̱ katsꞌénkjaꞌatio xotaa̱ kui nga̱sondiee̱.

¹¹ Kó ngije jaꞌa xi ján ni̱xtjin masiee̱n, Néná katsjaá ngo a̱siénni̱xtjin xi tikón kó ti̱ jastjíe̱n nginí, kó ngayeje xota̱ xi kamábee̱, achichí katsakjónní.

¹² Kó nga jó chistikoo̱ tsintꞌié ngo nda̱ xi ꞌniú kandaꞌyáni xi kjindibáni ndiꞌakꞌajmi jàn, xi bi̱ katsoó: –¡Ndibánijíngíjnú kꞌi̱e̱e̱! Kó ngo ṉdi̱ kisꞌijñasón nga kijínijíngí ndiꞌakꞌajmii̱, kó kondraa̱ kamábe.

¹³ Ti̱ kuii̱ chi̱bo̱a̱ kisꞌie ngo kjo̱a̱ndi̱ko̱n xi ta̱nisién ꞌniú xí katsꞌénkixóndó ngo nga xki̱ tie ndiꞌa xi tjín kui na̱xi̱ńdaá, kó yito mi̱ xota̱ xi jesón, kó kui xota̱ xi ta̱kó kisꞌińdoo̱, achichí katsakjónní, kó katsjaá kjo̱a̱je Néná xi tikón ndiꞌakꞌajmii̱.

¹⁴ Jaꞌa kui kjo̱a̱ni̱ma̱ xi ma joó, ta̱nga tsá ndibá xí ma jaán.

Tjio xi ma yitoo̱

¹⁵ Kó xi ma yito ndítsjiee̱ katsꞌénkjanie, sꞌe̱ ꞌniú kandaꞌyá kjín nda̱ ki̱a̱ ndiꞌakꞌajmii̱ xi bi̱ katsó: Ngayeje nga̱sondiee̱ je Ndi̱a̱ná ko̱jo Kristoo̱ ko̱tíxomaa̱, kó kuí xí ko̱tíxoma ngatsjéni̱xtjii̱n.

¹⁶ Nga kan nijón xota̱ xi xchaá xi síndo kje̱n nínga tikón Néná xí botixómaá, kasaxixtien tꞌanangii̱, kó katsꞌéndikón Néná,

¹⁷ kó bi̱ katsó: Ndyi̱boeꞌéjne̱ ndokꞌóchjì, ji xi Ndi̱a̱a̱, kui Néná xí tjiín ngaꞌniuú, ji xi kui ji, ko̱jo ji xi kamá ji, ngatꞌa̱ jè akake ji ngaꞌniúu̱, kó jè ikꞌítsꞌi̱yée̱ nga tibotíxome ji.

¹⁸ Na̱xi̱ńdaá je katsꞌénxchán, ta̱nga jè jachó ni̱xtjin nga si̱ꞌinxchín, kui ni̱xtjin nga ji si̱ꞌinjée̱ xi je jesoón, kó ko̱e̱ꞌée̱ ni xi sa̱ko̱ó mosòo̱ ko̱jo já chji̱ni̱e̱ꞌée̱n, na̱xi̱ńdá tsjièe̱ ko̱jo xi ndyi̱bendikón jaꞌée̱n, tsi xchá, ko̱jo tsi xi̱xi̱, kó si̱ꞌinkjatsén jí kui xi ndyi̱tsꞌènkjátsón tꞌanangii̱.

¹⁹ Kó katjoxꞌá na̱ngo̱xi̱i̱ Néná xí tikón ndiꞌakꞌajmii̱, kó ki̱a̱ na̱ngo̱xi̱i̱ kamáyà kui koxa̱ xi índajo̱ni Néná ko̱jo xota̱ xi tsi̱ꞌe̱, kó jaꞌatꞌe, kandaꞌyá nda̱, kandaꞌyá cho̱ꞌo̱n, kjindibá ngo kjo̱a̱ndikón xí ꞌniú, kó ixó ndókoá.