Ndeuteronomio̱ 28 - Xo̱jo̱n eén Néná

Kjo̱a̱niꞌánchikonñé xi sa̱ko̱ó xota̱ xi ntꞌiéꞌeén

¹ Moisee̱ bi̱ katsó ngasee̱ xota̱ na̱xi̱ńdaá: «Tsi si̱ꞌankjatjosónjnú ngayeje kjo̱a̱botíxomaa̱ xi Néná jè katsjájnú ngotꞌe̱, jún boá xi ka̱majnú xota̱ na̱xi̱ńdá xi tjó ngasee̱ ngayeje kui tꞌanangii̱,

² kó ngatsjéni̱xtjin nga sa̱kójnú kui kjo̱a̱niꞌánchikonñeé:

³ »Néná sa̱ꞌínchikonñéjnú ta̱ nínga tindyiónjnú, tsi nínga jno̱o̱ ko̱jo tsi nínga na̱xi̱ńdáꞌniuú.

⁴ »Néná sa̱ꞌínchikonñé ndíjnú, ko̱jo ni xi ka̱maxchájnú, ko̱jo cho̱ tjiéjnú.

^5-8 »Néná sa̱ꞌínchikonñéjnú ki̱a̱ ndiꞌajnú, ko̱jo nínga kongínjnú, ko̱jo ngayeje ni xi si̱ꞌánjnú. Ngatsjéni̱xtjin nga tsjatsꞌèn ku̱i̱ndyionjnú ki̱a̱ na̱xi̱ńdá xí Néná tsja̱ajnú. Jmí ni̱xtjin xcha̱jàjnú nichinie, kó ngatsjéni̱xtjin kꞌuiéjnú pan ki̱a̱ nga̱són yámíxa̱jnú. »Néná tsja̱ndièjnú nga jún xi si̱ꞌánjnú kjiꞌanga ku̱i̱xkánjo̱jnú kondra̱jnú. Ka̱márií kui kondraa̱ nga síndonda má nga kji̱ndi̱bá kjánjo̱jnú, ta̱nga chjiéngá ta̱xkiya ko̱nga ngije ko̱e̱je̱ nginí.

⁹ »Tsi si̱ꞌankjatjosónjnúu̱ Néná kjo̱a̱a̱ ngayeje nii̱, sa̱ꞌínkjatjosón ni xi katsóyàtjón nga tsja̱ajnú, kó jún boá xi ka̱majnú xota̱ na̱xi̱ńdá ndikoón.

¹⁰ Kósꞌe̱ ngayeje xota̱ na̱xi̱ńdá xí ngasee̱ sku̱i̱e̱, nga jún boá xi xota̱ na̱xi̱ńdaá Néná, kó stsa̱kjonní.

¹¹ »Ngije ki̱a̱ tindyiónjnú ki̱a̱ tꞌanangi xi Néná je katsóyàtjón nga tsja̱á xota̱ xi xchájnú, achichí nda sa̱ꞌínjo̱jnú. Kuí boá xi sa̱ꞌín nga kjín ndí kꞌuiéjnú, kó sa̱ꞌín nga ka̱makjín cho̱ xi kꞌuítji̱e̱jnú. »Ngayeje ni xi kꞌuítji̱e̱jnú, achichí tsie ni xi ka̱maxchaá,

¹² ngatꞌa̱ Néná boá xi skjíxꞌá nkꞌa jàn, nínga foaꞌátjó stseé, kó ko̱síndaá nínga tjitjíe̱njnú ni. Ngayeje ni xi si̱ꞌánjnú, ngatsjéni̱xtjin nga nda ko̱e̱je̱jnú. Jmí ni̱xtjin nga ngo ni chji̱yajnú, ta̱sá tsꞌatio ni kꞌuiéjnú tsi̱ꞌe̱ nga kje̱ꞌe na̱xi̱ńdá si̱ꞌankíyájnúu̱.

^13-14 »Tsi ngatsjéni̱xtjin ko̱nda̱ꞌyáꞌénjnúu̱ kjo̱a̱botíxomaa̱ Néná, kó tsi jmíni̱xtjin si̱ꞌantsjajnúu̱ ni xi Nénájín, ngatsjéni̱xtjin nga jún boá xi ka̱majnú na̱xi̱ńdá xí ꞌniú ndikón ngase ngayeje nga̱sondiee̱.

Kjo̱a̱botíjé xí sa̱ko̱ó xota̱ xi ntꞌiéꞌénjín

¹⁵ »Ta̱nga tsi ko̱nda̱ꞌyáꞌénjínjnú kjo̱a̱botíxomaa̱ Néná xi je katsjajnúꞌun ngotꞌe̱, kotijéjnúꞌun, kó kui ni xi ndajiín xi kꞌo̱kaniéjnú:

¹⁶ »Ndajín ngatama ngayeje ni xi si̱ꞌánjnú ki̱a̱ na̱xi̱ńdáꞌniuú ko̱jo nínga jno̱o̱.

¹⁷ »Ndajín ngatama tostsi̱je̱è, ko̱jo to ndso̱ko̱a̱n ṉño̱pan xi chja̱ꞌátikójnú, ko̱jo ngi̱ndie nínga si̱ꞌandajnú panjnú.

¹⁸ »Ndajín ngatamaa̱ ndíjnú, ko̱jo ni xi ka̱maxchájnú, ko̱jo ndií cho̱yojojnú, ko̱jo ndií cho̱tsa̱nga̱jnú.

¹⁹ »Ndajín ngatama ngayeje ni xi si̱ꞌánjnú.

²⁰ »Tsi ndajín si̱ꞌánjnú, kó tsi si̱ꞌankjinjnúu̱ yojojnú Néná, kuí boá xi ndajín sa̱ꞌínjo̱jnú, kó tsie kjo̱a̱ni̱ma̱ sa̱ꞌínkꞌatiojnú, nga ngaskande nde ngiti̱ xcha̱jínjnú ni xi si̱ꞌánjnú. Kó jè tsá kju̱i̱e̱jnú.

^21-23 Néná sa̱ngíyájnú chiꞌin xi ta̱nisién ꞌniú xí sa̱ꞌínkjié ngayeje na̱xi̱ńdaá, kó stso̱ba̱jnú ṉtꞌe̱ ꞌniú ko̱jo ka̱maskejnú. Ngojín ni xi ikꞌítji̱e̱jnú xi ka̱ma chja̱ꞌáꞌyájnú nga ka̱maxchá, ngatꞌa̱ chjo̱bo̱a̱a̱ sa̱ꞌínkjié ngayeje kui nii̱. Achichí sibé ka̱ma ndoboaá, nga ngayeje ni xi kꞌuítji̱e̱jnú xi xi̱, ngatꞌa̱ Néná ngiti̱ jmí stsé sa̱ꞌínkaꞌájín.

²⁴ Ngindiee̱ nga stsé sa̱ngíyájnú, ta̱sá xa̱ ko̱jo tsomí xi sa̱ngíyájnú ngaskande nga sa̱ꞌínkjié ngayeje nii̱.

^25-26 »Kjiꞌanga kji̱ndi̱bá kjánjo̱jnú kondra̱jnú, jún kꞌuíndondajnú jájúnjnú tsi̱ꞌe̱ nga skjánjo̱ kondraa̱, ta̱nga ta̱xkiya ku̱i̱yòjnú nga si̱ꞌanchajà yejejnú. Kó ngije jesónjnú ki̱a̱ kjoyójo yojojnú ki̱a̱ nga̱són tꞌanangii̱, kó nde ngojín xi ku̱i̱ꞌíchjaá nga cho̱ tamaá, ko̱jo cho̱ xi kjinie cho̱ siee̱n skji̱ni̱e̱ yojojnú. Nga sku̱i̱e̱ kui nii̱ xota̱ na̱xi̱ńdá xí ngasee̱, stsa̱kjonní.

²⁷ »Néná achichí chiꞌin xi ꞌniú, xi mandayajín xi sa̱ngíyájnú nga ko̱tíjéjnú, kó sꞌi̱kitsie maá yojojnú ni toꞌo xi tsꞌenkꞌiénná, ko̱jo tjiá, ko̱jo tjiejón ka̱majnú. Kó ti̱ kꞌuieé ṉdo xi on tji̱xin yojojnú, xikoó xi jatjoo̱ xota̱ Ejiptoo̱.

^28-29 »Achichí ka̱ma jún xi ka̱matsobéjnú, kó kje̱ꞌe xi ka̱mati̱ka̱. Ngayeje xotaa̱ ki̱a̱ na̱xi̱ńdá Israee̱l xi ta̱ bi̱ ta̱ ka̱maa̱, kó nde bejín mí ni xi sa̱ꞌín, ko̱jo ñání ko̱e̱je̱. Nde ngojín ni xi si̱ꞌánjnú xi nda ka̱majnú, kó xota̱a̱ kje̱ꞌe na̱xi̱ńdá ndajín sa̱ꞌínjo̱jnú, kó sa̱ꞌínchejéjnú, ta̱nga nde ngojín xi ko̱síko̱jójnú.

³⁰ »Tsi tjín jún xi je katsjátsꞌoá nga ku̱i̱xan, nde ku̱i̱xánjínní, ngatꞌa̱ je kje̱ꞌe xí kꞌuijñájo̱ kui na̱ xi ku̱i̱xanjo̱ katsaki. Tsi tjín xí ngo ndiꞌa sa̱ꞌínda, nde kꞌuijñáꞌyájín kui ndiꞌaa̱. Kó tsi tjín jún xi ku̱i̱ꞌítji̱e̱ ngo nínga maxchá tostsi̱je̱è, nde skji̱ni̱e̱jín kui tostsi̱je̱è.

³¹ »Ngindyikónjnú nga si̱ꞌankꞌien cho̱yojo toro̱jnú, ta̱nga jún nde chií yojoo̱ xi̱ni̱e̱jínjnú. Kó tsi tjín xí kjo̱a̱ꞌáxín kjo̱a̱ꞌniújnú bórrójnú, nginijánjín xcha̱jnú kui bórroó, Kondra̱jnú sa̱ꞌínchejéjnú cho̱tsa̱nga̱jnú, ta̱nga nde ngojín xi ko̱síko̱jójnú nga kongínchjaꞌájnú kui cho̱o̱.

³² »Chja̱ꞌáxín kjo̱a̱ꞌniújnú ndí xíꞌínjnú ko̱jo ndí ínchjínjnú, kó nde jmí ni si̱ꞌánjínjnú tsi̱ꞌe̱ nga bo̱a̱jín ka̱ma. Kje̱ꞌe na̱xi̱ńdá kongínjo̱, kó jún nginijánjín xcha̱ ngasejnú.

³³ »Ngayeje ni̱xtjin nga xota̱ xi nde yàjínjnú xi sa̱ꞌínchejéjnú, kó ndajín sa̱ꞌínjo̱jnú, kó kuí boá xi kꞌo̱je̱n ni xi jún ikꞌítji̱e̱jnú, xota̱ xi nde yàjínjnú ꞌyá kuí bo̱a̱ xi skji̱ni̱e̱ ni xi achichí kjo̱a̱ni̱ma̱ ikꞌítji̱e̱jnú.

^34-35 »Kó Néná ko̱tíjéjnú nga ṉdo xi on kꞌuieé ngayeje yojojnú, kó nde ngojín ni xi sa̱ꞌíndayajnú. Kó ngije xcha̱jnú ngayeje kui nii̱, ka̱matsobéjnú.

³⁶ »Néná boá xi tsja̱ndiè nga jún ko̱jo nda̱ re xi botixómájnú nga ndo̱bo̱a̱yà ku̱i̱ndyionjnú, kó nga ki̱a̱ kongínjo̱jnú ngo na̱xi̱ńdá xi jmíni̱xtjin kamábe xota̱ xi xchájnú. Kó ki̱a̱ boá nínga ne xi Nénájín xi si̱ꞌandikónjnú, kui xi yá ko̱jo xi ndi̱jo̱ kamándani.

³⁷ Kó ta̱ nínga kjo̱jojnú Néná, xotaa̱ achichí ko̱e̱je̱ndikoón ngayeje ni xi je kamájnú. Ko̱jno̱chajnú, kó ngaskande énkjàn ko̱ndókjo̱a̱ kjo̱a̱a̱ ni xi kamájnú.

³⁸ »Achichí ni xi kꞌuítji̱e̱jnú, ta̱nga nde ngojín ni xi chja̱ꞌátikójnú, ngatꞌa̱ chjo̱bo̱a̱a̱ sa̱ꞌínkjié ngayeje kui nii̱.

³⁹ Kꞌuítji̱e̱jnú tostsi̱je̱è, kó xchónjnúu̱ xka̱a̱ kui too̱, ta̱nga nde ngojín tostsi̱je̱è xꞌi̱e̱je̱njnú, ngatꞌa̱ chi̱ndoo̱ sa̱ꞌínkjié nga skji̱ni̱e̱ ngayejee̱. Nde chií binoo̱ kui tostsi̱je̱è sꞌi̱o̱jínjnú.

⁴⁰ Kꞌuítji̱e̱jnú yáꞌolibo̱, ta̱nga nde ngo toꞌaseituna̱ chja̱ꞌátikójínjnú. Ti̱nde ngo tín isti̱ ko̱ꞌna̱xiéjínjnúu̱, ngatꞌa̱ ngayejee̱ nga ku̱i̱xo̱ngi chjindié.

⁴¹ Kꞌuiéjnú ndí xí xíꞌín ko̱jo ndí xí ínchjín, ta̱nga nde ki̱a̱jín nijan ka̱maxchátꞌajnú, ngatꞌa̱ kongínjo̱ ꞌniú kje̱ꞌe na̱xi̱ńdá.

⁴² »Ngayeje yá xí tsjá to xi kjiꞌi ki̱a̱ tꞌanangijnú, chjo̱bo̱a̱a̱ sa̱ꞌínkjié.

⁴³ Xota̱ xi xín nangi chji̱a̱ni xi ki̱a̱ síndo na̱xi̱ńdájnú, saꞌniú sáꞌniú ngase ka̱macho̱n, kó jún saꞌniú sáꞌniú ngase ka̱mani̱ma̱jnú.

⁴⁴ Achichí cho̱n ka̱ma kui xotaa̱ nga ngaskande kui sa̱ꞌínkíyájnú to̱n, ta̱nga jún nde ta̱jmìjínni xi kꞌuiéjnú xi ka̱ma si̱ꞌankíyájnú jún. Kuí boá kui xotaa̱ xi ꞌniú ngase ka̱mayandikón kuí tꞌanangii̱, tji̱e̱nga jún boá xi nde xcha̱jín ꞌyá juún bo̱a̱».

Kje̱ꞌe ngase ni xi ndajín

⁴⁵ Moisee̱ bi̱ katsó ngasee̱ xota̱ na̱xi̱ńdaá: «Tsi si̱ꞌankjatjosónjínjnú kjo̱a̱botíxomaa̱ Néná, kui ni xi ndajiín xi sa̱ꞌínkjié ndo̱jò ndójo̱jnú.

⁴⁶ Ngayeje xota̱ nga̱sondiee̱ sku̱i̱e̱ nga jún ko̱jo xota̱ tji̱e̱jnú xi katsꞌén nga ngatsjéni̱xtjin bi̱ tsꞌén sa̱tíjeé,

⁴⁷ ngatꞌa̱ Néná nda katsꞌénjo̱jnú katsaki, ta̱nga jún kandaꞌyáꞌénjínjnúu̱, ti̱nde kiniꞌántsjájínjnúu̱ nga tsja kisꞌiejnú ko̱jo nga kixi̱ kamájnú.

⁴⁸ Kuíni nga Néná achichí kondra̱ sa̱ngíyájnú, kó kuí boá kui xotaa̱ xi ka̱majnú mosoo̱. Néná kjo̱a̱ꞌáxínjnú ngayeje ni xi katsjájnú, kó ni̱ma̱ sa̱ꞌínkꞌíndojnú. Jmí nichinie kꞌuiéjínjnú, ti̱nde kꞌuiéjínjnú ndáfoa, ti̱nde kꞌuiéjínjnú ńjño. ¡Moso̱ ka̱majnú, kó bo̱a̱ tsꞌén nga kju̱i̱e̱ kjin kjinjnú!

⁴⁹ »Néná achichí kjin kji̱ndi̱bájo̱ni ngo na̱xi̱ńdá xí kondra̱jnú ka̱ma. Ki̱a̱ kji̱ndi̱báni ngo na̱xi̱ńdá xi nde jún yàjínjnú, kó nde én xí chji̱a̱ ka̱makjínjínjnuú. Kui xotaa̱ achichí tsá nga kján, xikó maá nga tsoꞌbátji̱e̱n ja̱a̱.

^50-51 Achichí nga ndajín, kó skji̱ni̱e̱ ngayeje cho̱jnú ko̱jo ngayeje ni xi ikꞌítji̱e̱jnú. Nde chií to ndso̱ko̱a̱n ṉño̱pan ko̱jo bino̱, ko̱jo isti̱ ku̱i̱ꞌíjñájínjnú tsi̱ꞌe̱ nga xi̱ni̱e̱jnú ko̱jo sꞌi̱o̱jnú. ¡Kuí nii̱ xi sa̱ꞌínkjiéjnú! ¡Kjindiaá sa̱ꞌínkjiéjnú ngayejejnú! ¡Ti̱nde jákjíndí xi̱xi̱i̱, ti̱nde xota̱ xi xchaá si̱ꞌanjetakónjiín nga si̱ꞌankꞌien!

⁵² »Kui xotaa̱ kjo̱a̱ꞌatjiyajoo̱n ngayeje na̱xi̱ńdáꞌniú xi katsjájnú Néná, kó skjánjo̱jnú, kó ko̱kján kui xó nkꞌaá, ko̱jo xó xi ꞌniú tikoón kui na̱xi̱ńdaá xi kjimaꞌniátakónjnú jún.

^53-57 Kó tji̱e̱nga ki̱a̱ kꞌuíndo nga ngo foaꞌatjiyajoo̱n ngayeje na̱xi̱ńdáꞌniuú, jún jmí nichinie kꞌuiéjínjnú. »Achichí ꞌniú ka̱mabojójnú, nga ngaskande ndí xíꞌínjnú ko̱jo ndí ínchjínjnú xi katsjájnú Néná xi xi̱ni̱e̱jnú. Kui nii̱ xi sa̱ꞌín ngaskande kui xota̱ Israee̱l xi ndaxota̱, ko̱jo xi maa̱ xo̱jo̱n, kó nde ngojín xi tsja̱á chií kui yojoo̱, ti̱nde ntsꞌi̱e̱, ti̱nde chjo̱on xí tjoó, ti̱nde ndií xi síndo ngase nga̱sondie tsja̱ajiín. »Ngaskande kui na̱ Israee̱l xi ꞌniú nda maá yojoo̱ ko̱jo xi ndikónꞌaá, kui xi nde chiíjín kistsoꞌbákjiꞌixtí sé, skji̱ni̱e̱ ꞌma kui ndí xí stse̱én, kó nde ta̱ꞌyajín xi tsja̱ chií kui nichiniee̱. ¡Nde ndo̱bo̱a̱ndií ku̱i̱ꞌíjñájín! »¡Nga ja̱koxi̱ kondra̱jnú achichí kjo̱a̱ni̱ma̱ sa̱ꞌínkjaꞌatiojnú!»

Si̱ꞌankjiená tsi ko̱nda̱ꞌyáꞌénjín ñá

⁵⁸ Nga fetꞌani Moisee̱ bi̱ katsó ngasee̱ xota̱ Israee̱l: «Tsi xcha̱ndikónjínjnú kui Néná xi je ko̱jo xi tjiín ngaꞌniuú, kó tsi si̱ꞌankjatjosónjínjnú kjo̱a̱botíxoma xi kjitꞌa kui xo̱jo̱o̱n,

⁵⁹ Néná ko̱tíjéjnú jún ko̱jo xota̱ tji̱e̱jnú. ¡Achichí chiꞌin xi ꞌniú tsja̱ajnú, kó nde ngojín xi ka̱maa̱ sa̱ꞌíndayajnú!

⁶⁰ »A foaꞌátsjienjnú kui kjo̱a̱botíjé xi ꞌniú, xí Néná katsangiyaa̱ xota̱ Ejiptoo̱. Ja̱ kuí boá kui kjo̱a̱botíjeé xi kji̱ndi̱bániéjnú jún ngatsjéni̱xtjin,

⁶¹ kó sa̱kó ngasejnú kjo̱a̱botíjé xi nde xo̱jo̱n kjo̱a̱kitii̱ tsáyàjín, ngaskande nga kju̱i̱e̱ na̱xi̱ńdá Israee̱l.

⁶² »Ngotꞌe̱ ꞌne̱ jún achichí kjín májnú, ta̱nga tsi ko̱nda̱ꞌyáꞌénjínjnúu̱ Néná, ta̱ ngi chiboa tsí ka̱majnú.

⁶³ Ngotꞌe̱ ꞌne̱ Néná achichí tsjátjiín kjo̱a̱a̱ jún, kó nda tsꞌénjo̱jnú, kó kuí boá xi tjítsꞌén nga kjimakjín ngasejnú, ta̱nga tsi ko̱nda̱ꞌyáꞌénjínjnúu̱, Néná achichí tsjá ka̱maa̱ nga sa̱ꞌínkjiéjnú, kó ko̱ngatji̱ngi kjo̱a̱ꞌniújnú ki̱a̱ tꞌanangi xi ngotꞌe̱ tsꞌéntsjájnú.

⁶⁴ Chjiéngá kje̱ꞌe na̱xi̱ńdá konginkíndyiónjnú, kó ki̱a̱ si̱ꞌandikónjnú kje̱ꞌe ne xi Nénájín xi yá ko̱jo xi ndi̱jo̱ kamándani, kui xi ti̱nde jún ti̱nde xota̱ xi xchájnú kamábejín.

^65-67 »Ki̱a̱ kui na̱xi̱ńdaá jmíni̱xtjin nga kꞌuiéjnú kjo̱a̱xió, ko̱jo nga ndatsꞌèn ku̱i̱ndyionjnú. Ta̱ soboá kjo̱a̱ndasen tsí xi kꞌuiéjnú, ngatꞌa̱ Néná boá xi sa̱ꞌín nga ta̱soboá ko̱nda̱konjnú nga ku̱i̱ndyionjnú, kó nde ngiti̱ jmí kjo̱a̱chiyá kꞌuiéjínjnú. Nga ni̱xtjin nga ni̱xtji̱e̱n nga ko̱nda̱konjnú, kó achichí ni xi chꞌokon xi xcha̱jnú nga ta̱jño̱ó, nga ngaskande ka̱mamejénjnú nga ta̱sá je ka̱majñó, kó nga ka̱majñoó ta̱sá ka̱mamejénjnú nga ni̱xtjin ka̱ma.

⁶⁸ »Kó ndatsi Néná jè katsóyàtjón nga jmíni̱xtjin kongín nginíjnú ki̱a̱ nangi Ejipto̱, kuí boá xi sa̱ꞌín nga ngo tjotso je ku̱i̱ꞌíyájnú, kó kongín nginíjnú ki̱a̱a̱. Kó ki̱a̱ boá nínga ko̱ti̱ñájnú jún, xikoó ngo moso̱, ta̱nga nde ngojín xi ka̱mamejeén kꞌo̱tsiejnú».