Ndeuteronomio̱ 27 - Xo̱jo̱n eén Néná

Ṉchan xi kꞌuijñá ki̱a̱ na̱xi̱ Ebaa̱l

¹ Kó Moisee̱ ko̱jo já ngito̱ko̱o̱ xota̱ Israee̱l, bi̱ katsoó xota̱ na̱xi̱ńdaá nga katsjaá kui kjo̱a̱botíxomaa̱: «Ti̱ꞌankjatjosónjnú ngayeje kjo̱a̱botíxoma xi je katsjajnúꞌun ngotꞌe̱.

^2-8 Jè tsá ku̱i̱tjásꞌi̱e̱njnú kui tꞌanangi xi Néná katsóyàtjoón xota̱ xi xchájnú nga tsja̱á. ¡Kuí boá xi ngo na̱xi̱ńdá xí achichí ni maxchá, kó ngatsjéni̱xtjin tsie nichinie tjín! Ngije ku̱i̱tja̱tiójnú ndejèꞌ Jorndaa̱n, kó ngije ku̱i̱tjásꞌi̱e̱njnú kui tꞌanangii̱, chjiéngá ti̱ kjiꞌa tangínjnú na̱xi̱ Ebaa̱l, kó ki̱a̱ tꞌíndojnú ndi̱jo̱ xi yiꞌi xi tiboa ti̱ꞌankꞌijnú. Kó kui ndi̱jo̱o̱ tjatꞌajnú ngayeje kjo̱a̱botíxoma xi ngotꞌe̱ je tsꞌéntsjájnúꞌun. »Ti̱ ki̱a̱ kui na̱xi̱i̱ mejénna nga si̱ꞌandajnú ngo ṉchan xi ndi̱jo̱, nínga kꞌuitíjnú kjo̱a̱tjó xi si̱ꞌankꞌasꞌienjnú ngandaa̱ Néná, tsi̱ꞌe̱ nga chji̱a̱ꞌajnú nga nda ko̱jo nga tsjatsꞌèn ku̱i̱ndyionjnú. Ta̱nga ndi̱jo̱ xi síndo ndo̱jò ndójo̱ xí ti̱ꞌankjiénjnú, xikó má kón nga sa̱kójnú kui ndi̱jo̱o̱. Sꞌe̱ jaskan chji̱a̱ꞌajnúu̱ Néná tsi̱ꞌe̱ nga sa̱ꞌínjetakón jéjnú, kó ti̱ ki̱a̱ tꞌa kui ṉchaa̱n ti̱ꞌánjnú ngo sꞌué nganda tsi̱ꞌe̱ Néná».

⁹ Sꞌe̱ jaskan Moisee̱ ti̱ kijí nginí ngindyi̱ko̱n xota̱ na̱xi̱ńdaá, nga tsoꞌbájo̱ chináꞌmii̱, kó bi̱ katsoó xota̱ Israee̱l: «¡Xió ti̱ndyiónjnú, ngo kjo̱a̱nda! ¡Mejénna nga ko̱si̱e̱nnijónjnúꞌun ngotjón! Ngotꞌe̱ ꞌne̱ jè xota̱ na̱xi̱ńdaá Néná je kamájnú jún.

¹⁰ Kuíni nga, chjiéngá ko̱nda̱ꞌyáꞌénjnúu̱ ngayeje nii̱, ko̱jo nga si̱ꞌankjatjosónjnúu̱ kjo̱a̱botíxoma xi ngotꞌe̱ je katsjajnúꞌun».

Ni xi ndajín xi ka̱maa̱ xota̱ xi ntꞌiéꞌénjiín

¹¹ Ti̱ kuii̱ ni̱xtjin, Moisee̱ katsjaá kui kjo̱a̱botíxomaa̱ xota̱ Israee̱l:

^12-13 «Ngije ikitjatiójnú ngayejejnú ndejèꞌ Jorndaa̱n, mejénna nga jó tjín ko̱kjanga ngayeje xota̱ tji̱e̱e̱. Kui xtín xí tjoón, kuí boá xi ka̱ma xtín xota̱ xi chji̱a̱ni Simeoo̱n, Lebii̱, Jundáa̱, Isakaa̱r, Kosiee̱ ko̱jo Benjaa̱, kó kuí boá xi kꞌuíndo ki̱a̱ na̱xi̱ Jerisii̱n. Xtín xí ma joó, kuí boá xi ka̱ma xtín xota̱ xi chji̱a̱ni Rubee̱n, Ngaa̱nd, Asee̱r, Sabuloo̱n, Ndaa̱n ko̱jo Neftalii̱, kó kuí boá xi kꞌuíndo ki̱a̱ na̱xi̱ Ebaa̱l. Ndeskande na̱xi̱ Jerisii̱n ku̱i̱ꞌítsꞌi̱yanii̱ nga si̱ꞌanchikonñé ngayeje xota̱ Israee̱l, kó ndeskande na̱xi̱ Ebaa̱l ko̱ndókjo̱a̱ ni xi ndajín xi ka̱maa̱ xota̱ xi ku̱i̱ntꞌiéꞌénjiín Néná.

^14-26 »Kuí bí kui ni xi ndajiín xi sa̱ꞌínyà já chináꞌmii̱ ngindyi̱ko̱n ngayeje xota̱ na̱xi̱ńdaá. Ngije kiniꞌányà nga ngo nga ngo kui ni xi ndajiín, kó tsi̱ꞌe̱ nga xcha̱ nga ngo ndséje̱n kjima xota̱ na̱xi̱ńdaá, ngayejee̱ nga ꞌniú skja̱ndáyà nga bi̱ ka̱tso̱: “¡Bo̱a̱ kjíꞌí!” »Ndajín ngatamaa̱ xi sa̱ꞌínda ngo ni xi ne ka̱tso̱o̱, sꞌe̱ jaskan ku̱i̱ꞌíjñaꞌma. Néná achichí chꞌoó kui nii̱. »Ndajín ngatamaa̱ xi sa̱ꞌínchꞌó na̱ꞌmii̱ ko̱jo na̱aa̱n. »Ndajín ngatamaa̱ xi sa̱ꞌínchejeé nga sku̱i̱e̱ndikónjín tsindioó tꞌanangii̱ ngo xota̱. »Ndajín ngatamaa̱ xi kꞌo̱ṉcha̱jo ngo xota̱ xi ti̱ka̱, kó xín ndi̱yà sa̱ꞌínkjí. »Ndajín ngatamaa̱ xi ndajín sa̱ꞌínjo̱ xota̱ xi ta̱ ngotjón jachókꞌíndo ngo na̱xi̱ńdá, ko̱jo ínchjín kꞌán xi je kꞌien xi̱ꞌii̱n, ko̱jo xota̱ xi xꞌi̱a̱n. »Ndajín ngatamaa̱ ndí xíꞌín xi chjo̱ón na̱ꞌmii̱ kjojñájo̱. Kuí nii̱ xi bokó nga tsꞌénbendikónjín na̱ꞌmii̱. »Ndajín ngatamaa̱ xi ngo cho̱ chꞌo sa̱ꞌínjo̱. »Ndajín ngatamaa̱ xi ndichja kjojñájo̱, ndatsi ta̱ ngo na̱ꞌmi, ko̱jo tsi ta̱ ngo na̱an tsí. »Ndajín ngatamaa̱ xi ṉchiꞌyaá kjojñájo̱. »Ndajín ngatamaa̱ xi ko̱tíñá amingoo̱ ko̱jo xi sa̱ꞌínkꞌién. »Ndajín ngatamaa̱ xi to̱n kjo̱a̱ꞌáchjí, tsi̱ꞌe̱ nga si̱ꞌankꞌien ngo xi jmíjéjiín. »Ndajín ngatamaa̱ xi ku̱i̱ntꞌiéꞌénjiín kui kjo̱a̱botíxomaa̱».