Na̱ Estee̱r (Ebreo̱) 8 - Xo̱jo̱n eén Néná

Kjo̱a̱botíxoma xi tsꞌaxié ree̱ ngandaa̱ xota̱ jundíoo̱

¹ Ti̱ kuii̱ ni̱xtjin, re Asueroo̱ katsjaá na̱ re Estee̱r ndiꞌa xi kamá tsi̱ꞌe̱ Amaa̱n, kui xota̱ xi kondra̱ kamaá xota̱ jundío̱. Kó Marndokeoo̱ jachó ngindyi̱ko̱n ree̱, ngatꞌa̱ nga na̱ re Estee̱r ja̱bo̱a̱ jè katsóyaà ree̱ nga xkjín má.

² Kósꞌe̱ ree̱ jaꞌáxín sti̱ngaro xi tjiyaá tsja, kui xi Amaa̱n mára katsꞌénkꞌasꞌiee̱n, kósꞌe̱ Marndokeoo̱ katsjaá. Kó na̱ re Estee̱r, Marndokeoo̱ katsjáxaá kjo̱a̱a̱ ngayeje ni xi tsi̱ꞌe̱ Amaa̱n mára kamá.

³ Na̱ re Estee̱r ti̱ tsíchji̱a̱jo nginí ree̱, kó asiénmátikoó nga askjandá, ko̱jo nga ꞌniú tsíꞌaá ree̱ nga sa̱ꞌínkjiékjo̱a̱ kjo̱a̱a̱ kui ni ndajín xi índa Amaa̱n, xota̱ tji̱e̱e̱ Angaa̱j, kondra̱ tsi̱ꞌe̱ xota̱ jundíoo̱.

⁴ Kósꞌe̱ ree̱ yején tsja nga tjiyátsjà ki̱cha̱ to̱nsinié xi botixómáni xtji̱e̱e̱n nínga tikón na̱ re Estee̱r, kó na̱ re Estee̱r kasasienkixi̱ ngindyi̱ko̱n ree̱,

⁵ kósꞌe̱ bi̱ katsoó ree̱: —Tsi nda sasieén kui nii̱ ji re, kó tsi tsoboána kjo̱a̱nda xi tjiín, te̱ꞌékjo̱e̱ ji nga si̱ꞌanda ngo xo̱jo̱n, nínga ko̱ti̱xome ji nga kjo̱tjosónjín ni xi kjitꞌa xo̱jo̱n nínga katsjákjo̱a̱ Amaa̱n, ndií Amendataa̱, xota̱ tji̱e̱e̱ Angaa̱j, nga si̱ꞌankjie ngayeje xota̱ jundío̱ xi síndo ngayeje nangi nínga botíxome ji.

⁶ ¡Ngatꞌa̱, mejénjínna skuie an ni ndajín xi ka̱mataꞌin xota̱ nangina! ¡Kótsꞌèn kjo̱chíkjo̱a̱na nga skuie an nga si̱ꞌankjie ngayeje xota̱ na̱xi̱ńdána!

⁷ Kósꞌe̱ re Asueroo̱, bi̱ katsoó na̱ re Estee̱r ko̱jo Marndokeo̱ xota̱ jundíoo̱: —An jè katsꞌenkꞌasꞌièe̱n na̱ re Estee̱r ndiꞌaa̱ Amaa̱n, kó Amaa̱n jè ikjienboaꞌa, ti̱ kuii̱ yá katsjákjo̱a̱ nga kamánda, ngatꞌa̱ kamámejeén katsꞌénkꞌién xota̱ jundío̱.

⁸ Ngotꞌe̱ ꞌne̱, ti̱ꞌanꞌindójnúu̱ ngo xo̱jo̱n xota̱ jundíoo̱ xikótsꞌèn nda bee̱takónjnú, kó ti̱ꞌankjiénjnú jaꞌeén ree̱, sꞌe̱ tꞌiéjnúu̱ chi̱bo̱a̱ xi yaꞌa sti̱ngaroo̱, ngatꞌa̱ kjiꞌanga ngo xo̱jo̱n xi jaꞌeén ree̱ kiniꞌándani, kó ꞌbeé chi̱bo̱a̱a̱ sti̱ngaroo̱, jmíjín xi ka̱maa̱ sa̱ꞌínchjíjínnii̱.

⁹ Kósꞌe̱ kandokjo̱a̱a̱ xota̱ chji̱ni̱e̱xo̱jo̱o̱n ree̱, ni̱xtjin kan ján sá xí ma jaán, kui sá xí sibaa̱n kiꞌmí, kó kiniꞌánꞌindó xo̱jo̱n kjo̱a̱a̱ xikó katsó ngayeje ni xi atíxoma Marndokeoo̱, tsi̱ꞌe̱ xota̱ jundíoo̱, ko̱jo ngito̱ko̱o̱ xtín nangi, ko̱jo ngito̱ko̱o̱ nangi, ko̱jo xota̱ xi tjiín xá xki̱ na̱xi̱ńdáꞌniú, ndeskande nangi India̱ ngaskande nangi Etiopiyaa̱, úchán ko̱jo kan yito nangi kamá ngayejee̱. Kó bo̱a̱ tsꞌén kiniꞌánꞌindó xikótsꞌèn niꞌánda xo̱jo̱n ko̱jo xikótsꞌèn chji̱a̱ xotaa̱ nga ngo nga ngo nangii̱, ko̱jo xikótsꞌèn tsꞌénda xo̱jo̱n ko̱jo xikótsꞌèn chji̱a̱ xota̱ jundíoo̱ nga.

¹⁰ Kó Marndokeoo̱ jaꞌeén re Asueroo̱ katsꞌéndani xo̱jo̱o̱n, sꞌe̱ yeꞌeé chi̱bo̱a̱ xi yaꞌa sti̱ngaroo̱ ree̱, kó katsangiyajo̱ xota̱ moso̱ xi kijíjo̱ ndi̱je̱e̱ ree̱, xi achichí monga.

Kjo̱a̱botíxoma xi kꞌo̱xiéꞌá xota̱ jundío̱

¹¹ Kui xo̱jo̱o̱n ki̱a̱ kjitꞌa nga ree̱ tsꞌéntsjákjo̱a̱, nga xota̱ jundíoo̱ ka̱ma ku̱i̱ꞌítikó xtín xkjín ngayeje na̱xi̱ńdáꞌniú, tsi̱ꞌe̱ nga kꞌo̱xiéꞌá yojoo̱, ko̱jo nga ka̱ma sa̱ꞌínkjié, ko̱jo sa̱ꞌínkꞌién ngayeje xota̱ xi skjánjo̱ xi chji̱a̱ni ngo na̱xi̱ńdá ko̱jo tsi nangi, kó nga ndasénjín ka̱maa̱ tsi ndí xi̱xi̱ ko̱jo tsi ínchjín, ko̱jo nga ka̱ma sa̱ꞌíntsi̱ꞌe̱ ni xi tjiín.

¹² Kui kjo̱a̱botíxomaa̱ chjiéngá kjo̱tjosón ngayeje nangi nínga botixómá ree̱, ni̱xtjin tiejaán sá xí ma tiejóni, kui sá xí ꞌmí Andaa̱r.

¹³ Kui xo̱jo̱o̱n kanangiya xikoó ngo kjo̱a̱kiti nga ngo nga ngo nangi, tsi̱ꞌe̱ nga sku̱i̱e̱ ngayeje xota̱ na̱xi̱ńdaá, nga xota̱ jundíoo̱ chjiéngá kꞌuíndonda kui ni̱xtjii̱n, tsi̱ꞌe̱ nga sa̱ꞌíngojo ni xi katsꞌénjo̱ kondra̱a̱.

¹⁴ Kó mosoo̱ tsá jatjojo̱ ndi̱je̱ xi ꞌniú mongaa̱, ngatꞌa̱ bo̱a̱ tsꞌén atíxoma ree̱. Kó kui xo̱jo̱o̱n ti̱ akjatꞌa ki̱a̱ na̱xi̱ńdáꞌniú Susa̱ nga.

¹⁵ Kó Marndokeoo̱ jatjoni ngindyi̱ko̱n ree̱ nga tsꞌényajá ngo ńjño xi boajá re xi aso ko̱jo tiboa, ko̱jo ngo korona̱ to̱nsinié tjiꞌaá to̱ko̱, ko̱jo ngo ńjñobichitjé xi lino̱ kamándani xi koán. Kó xota̱a̱ na̱xi̱ńdáꞌniú Susa̱ achichí tsjá kamaá, kó ngaskande askjandáyà má nga tsja kisꞌiee̱.

¹⁶ Kó xota̱ jundío̱ ꞌna̱ má kamá kje̱n nga tsja kisꞌiee̱, kó katsꞌéndikón xkjín.

¹⁷ Kó nga ngo nga ngo nangi ko̱jo na̱xi̱ńdáꞌniú nínga jachó xo̱jo̱n xi atíxoma ree̱, xota̱ jundíoo̱ achichí tsjá kamaá, kó katsꞌén sꞌué. Kó achichí má xota̱ na̱xi̱ńdá xí síndo nga̱sondiee̱ xi xota̱ jundío̱ kamá nga, ngatꞌa̱ katsakjónnií kui xotaa̱.