Na̱ Estee̱r (Ebreo̱) 6 - Xo̱jo̱n eén Néná

Ree̱ katsꞌéndikón Marndokeoo̱

¹ Kui ni̱xtji̱e̱e̱n kamájín kisꞌifé ree̱, kó tsíꞌá xo̱jo̱n xi tjisítꞌa ngayeje ni xi kjima nga tsꞌénbotixómá, tsi̱ꞌe̱ nga kiniꞌányaà kui xo̱jo̱o̱n.

² Kó ki̱a̱ kjitꞌa nga Marndokeoo̱ katsóyà nga Bijtaa̱n ko̱jo Teree̱, jó xota̱ eunukoo̱ ree̱ ko̱jo xi ndyi̱konda ndo̱bo̱a̱xa̱á, kamámejeén sa̱ꞌínkꞌién re Asueroo̱ katsaki,

³ kó bi̱ katsó ree̱ nga asíyá: —Mí xí katseꞌeé Marndokeoo̱ kjo̱a̱a̱ kui ni xi katsꞌén, kótsꞌèn kiniꞌándikón. Kó xota̱ mosoo̱ ree̱, bi̱ katsó: —Kji̱e̱ jmíjín xi tsꞌéndíkón kjo̱a̱a̱ kui nii̱.

⁴ Kósꞌe̱ bi̱ katsó ree̱: —ꞌYá xí tsoꞌbá ki̱a̱ ndi̱tsee̱n. Ti̱ kuii̱ chi̱bo̱a̱, Amaa̱n tsꞌasꞌien xtji̱e̱e̱n ndi̱tsen ndo̱bo̱a̱xa̱á ree̱, tsi̱ꞌe̱ nga ku̱i̱ꞌaa̱ ree̱ nga ki̱a̱ kjuiénboáꞌá Marndokeoo̱ ki̱a̱ yá xí jè íjñanda.

⁵ Kó mosoo̱ ree̱, bo̱a̱ katsoó nga Amaa̱n boá xi tsoꞌbá ndi̱tsee̱n. Kó bi̱ katsó ree̱: —Ngatꞌasꞌien.

⁶ Kó tsꞌasꞌien Amaa̱n, kósꞌe̱ ree̱, bi̱ katsó nga asíyaá: —Mí xí ka̱ma si̱ꞌanjo̱ ngo xota̱ xi ree̱ mejeén sa̱ꞌíndikón. Kó Amaa̱n bi̱ tsꞌén katsꞌénkjó: ꞌYá xí ka̱mamején ngasee̱ ree̱ nga sa̱ꞌíndikón tsi ánjín.

⁷ Kósꞌe̱ bi̱ katsoó ree̱: —Kui nda̱ xi ree̱ mejeén nga sa̱ꞌíndikón,

⁸ ndibájo̱jnúu̱ ngo ńjño xkjín xi boajá ree̱, ko̱jo ngo ndi̱je̱ xi tsꞌénkjién, ko̱jo ngo korona̱ xi ꞌbíꞌá to̱ko̱ ree̱,

⁹ kó kui ńjñoo̱, ko̱jo ndi̱je̱e̱, ngo xota̱ xi nkꞌa xaá xi tsꞌénxátꞌaa̱ ree̱ ngatsꞌénkꞌásꞌieén, tsi̱ꞌe̱ nga kui sa̱ꞌínkajá ńjño, kui nda̱ xi mejeén ree̱ nga sa̱ꞌíndikón, kó ngatꞌíjñasoón ndi̱je̱e̱ nga ko̱e̱je̱tsobejo̱ ndi̱tse̱e̱n kui na̱xi̱ńdáꞌniuú, kó bi̱ nga tsó nga nga kjandayà kui nda̱ xi tsꞌénxátꞌaa̱ ree̱ nga kjótsoꞌbátjoón: “¡Bi̱ niꞌánjo̱ nda̱ xi mejeén ree̱ nga sa̱ꞌíndikón!”

¹⁰ Kósꞌe̱ ree̱, bi̱ katsoó Amaa̱n: —¡Ja̱ tsá tꞌen ji, chjábé jí ńjñoo̱, ko̱jo ndi̱je̱e̱, kó bo̱a̱ ti̱ꞌinje̱ ji Marndokeo̱, nda̱ jundíoo̱, xikó má kase ji, kui xi tikón ki̱a̱ tꞌa nga̱ntjo̱a̱a̱ ndo̱bo̱a̱xa̱á! ¡Ngata̱ chíyájiín nga bo̱a̱ má si̱ꞌinje̱ ji xikó kase ji!

¹¹ Kó bo̱a̱ tsꞌén Amaa̱n, iskjíbé ńjñoo̱, ko̱jo ndi̱je̱e̱, kó katsꞌénkajá Marndokeoo̱ kui ńjñoo̱, sꞌe̱ iskjíbengí ndi̱je̱e̱ nga kijíjo̱ ndi̱tse̱e̱n kui na̱xi̱ńdáꞌniuú, kó bi̱ katsó nga askjandáyà nga kistsoꞌbátjoón: «¡Bi̱ niꞌánjo̱ nda̱ xi mejeén ree̱ nga sa̱ꞌíndikón!»

¹² Jaskan Marndokeoo̱ kijíkꞌíjñá nginí ngi̱xtio nga̱ntjo̱a̱ ndo̱bo̱a̱xa̱á ree̱, tji̱e̱nga Amaa̱n achichí tsá kijí ndiꞌaa̱, kó achichí ndasen kisꞌijña, ngaskande yíꞌmá má kje̱n ta̱ngatꞌaa̱ kjo̱a̱soboaá.

¹³ Kó Amaa̱n katsóyaà na̱ Sere̱ chjo̱ón, ko̱jo xota̱ xi nda yaꞌa ni xi kamaá. Kósꞌe̱ xota̱ xi tsjaá kjo̱a̱kjínkón, ko̱jo na̱ Sere̱ chjo̱ón, bi̱ katsoó: «Tsi xota̱ jundío̱ Marndokeoo̱, kui xi je tjítsꞌénchajaá, ka̱májiín si̱ꞌíi̱n ki, ta̱sá kuí xi sa̱ꞌiín».

¹⁴ Tji̱e̱nga to̱kó ndyi̱chji̱a̱ ngase kui xotaa̱, jachó xota̱ eunukoo̱ ree̱, kó tsá kijíjo̱ Amaa̱n kui sꞌué xí jè tikónndaa̱ na̱ re Estee̱r.