Na̱ Estee̱r (Ebreo̱) 5 - Xo̱jo̱n eén Néná

Kjiꞌanga jachó na̱ re Estee̱r ngindyi̱ko̱n ree̱

¹ Jaskan ngije jaꞌa ján ni̱xtjin, na̱ re Estee̱r tsajá ńjño xi boajá nga kui xi na̱ re, sꞌe̱ kijíkasién ndi̱tsee̱n ndiꞌa nínga tsꞌénbotixómá ree̱, ki̱a̱ kje̱n ngi̱yaꞌma nínga fojña. Kó ree̱ ki̱a̱ tikónsón yáxíríe̱ ndikoón, ki̱a̱ ngi̱ya nínga tsꞌénxá, ki̱a̱ kje̱n nga̱ntjo̱a̱a̱ ndo̱bo̱a̱xa̱á.

² Kó kjiꞌanga ree̱ kamábe nga na̱ re Estee̱r ki̱a̱ sikón ndi̱tsee̱n, ree̱ nda kasasiee̱n, kó yején ki̱cha̱ to̱nsinié xi kjiyatsja xtji̱e̱e̱n nínga sikón na̱ re Estee̱r. Kósꞌe̱ na̱ re Estee̱r kijíkóntiñaa̱, kó katsꞌénjo̱ ki̱cha̱ to̱nsinié xi kjiyatsja.

³ Kósꞌe̱ ree̱, bi̱ katsoó: —Mí xí mejeén na̱ re Estee̱r. Ta̱ ni xi chji̱e̱ꞌéní, kó ngaskande ndatsi masien nangi nínga tsꞌénbotixoma an, tsjaa tsi kui ni xi chji̱e̱ꞌéní.

⁴ Kó bi̱ katsó na̱ re Estee̱r: —Ji re, tsi nda sasieén, mejénna nga kji̱ndi̱bé, ji ko̱jo Amaa̱n ngo sꞌué xí íjñanda an nganda tse̱.

⁵ Kó ree̱, bi̱ katsoó xota̱ mosoo̱: —Tsá ti̱ndyi̱séjnú Amaa̱n, tsi̱ꞌe̱ nga bo̱a̱ si̱ꞌan xikó tjítsó na̱ re Estee̱r. Kó bo̱a̱ tsꞌén nga ree̱ ko̱jo Amaa̱n kijí kui sꞌué xí íjñanda na̱ re Estee̱r.

⁶ Kó tji̱e̱nga ndyi̱ꞌbi bino̱, ree̱ bi̱ katsoó na̱ re Estee̱r: —Mí ni xí chji̱e̱ꞌéní, ngatꞌa̱ ka̱má tsjaa. Mí ni xi mejeén, ngaskande ndatsi masien nangi nínga tsꞌénbotixoma an tsjaa tsi kui ni xi chji̱e̱ꞌéní.

⁷ Kó na̱ re Estee̱r, bi̱ katsó: —Kuí bí kui nii̱ xi míꞌá an:

⁸ Tsi nda kasasiee̱n an, kó tsi mejeén ko̱e̱ꞌéní ni xi kuíꞌaá, ko̱jo tsi si̱ꞌinkjatjosén ji ni xi tꞌíxián an, mejénna nga ji ko̱jo Amaa̱n kji̱ndi̱bá nginíjnú ingo sꞌué xí kꞌuijñánda an ndyiojón, kó kjiꞌa xiyaá mí ni xi mejénna.

Amaa̱n chꞌo kamaá Marndokeoo̱

⁹ Kó achichí tsjátjiín Amaa̱n nga jatjoni kui ngi̱ndiee̱, ta̱nga nga kamábe Marndokeoo̱ ki̱a̱ ngi̱xtio nga̱ntjo̱a̱a̱ ndiꞌa nínga tsꞌénbotixómá ree̱, nga ki̱a̱ sikón, kó nga nde katsꞌéntíyájín nga jaꞌa Amaa̱n, kui xotaa̱ achichí katsꞌénxchán.

¹⁰ Ta̱nga jmí ni katsꞌénjín, kó ta̱sá ndiꞌaa̱ kijí, kó tsíchji̱a̱a̱ xota̱ xi nda yaꞌa ko̱jo na̱ Sere̱ chjo̱ón.

¹¹ Kó Amaa̱n katsóyàni̱jmi̱í kjo̱a̱a̱ ngayeje kjo̱a̱cho̱o̱n, ko̱jo nga achichí kjín má ndí xí kisꞌiee̱, ko̱jo nga ree̱ nkꞌa xá xí katsjaá nga kui xi ko̱si̱e̱ntjoón xota̱ xi botixómaá ko̱jo xota̱ xi tsꞌénxátꞌaa̱ ree̱.

¹² Kó Amaa̱n, bi̱ katsó ngase: —Kó ingo ni ngase, na̱ re Estee̱r, ta̱ꞌyajín xi katsóyà ngasee̱ nga katsꞌén kui sꞌueé, ta̱ án tsi ko̱jo ree̱ xi tsangínjne̱, kó ndyiojón ti̱ katsóyà nginíjne̱ tsi̱ꞌe̱ nga kongínjne̱ ingo sꞌué xí sa̱ꞌín.

¹³ Ta̱nga kui nii̱ nde jmí ni chjíjiín mana, kjiꞌanga be an nda̱ jundío̱ xi ꞌmí Marndokeoo̱, nga ki̱a̱ tikónxtió tꞌa nga̱ntjo̱a̱a̱ ndiꞌa nínga tsꞌénbotixómá nda̱ ree̱.

¹⁴ Kósꞌe̱ chjo̱ón ko̱jo xota̱ xi nda yaꞌa, bi̱ katsoó: —Nga niꞌándaa ngo yá xí kan jó metro̱ nga nkꞌa, kó ndyiojón ta̱jñó bo̱a̱ tꞌíi̱n ree̱ nga ki̱a̱ kjuiénboáꞌá Marndokeoo̱, sꞌe̱ jaskan tsjangatꞌieé nga kꞌuínje̱ ji ree̱ kui sꞌueé. Kó Amaa̱n tsja kamaá kui ni xi kiꞌmií, kó íjñanda kui yaá.