Na̱ Estee̱r (Ebreo̱) 4 - Xo̱jo̱n eén Néná

Kjo̱a̱ndasee̱n xota̱ jundíoo̱

¹ Ngije tsintꞌié Marndokeoo̱ ngayeje ni xi kamaá, iskjíndiyá ńjño xi yajá nga akó nga on kamaá, kósꞌe̱ ńjño tokjuie tsajá, ko̱jo ndiso indyiaá to̱ko̱, kó kijí ngi̱jii̱n na̱xi̱ńdáꞌniuú nga ndasen askjandáyà.

² Kó jachó ngaskande ngi̱xtio nga̱ntjo̱a̱a̱ ndiꞌa nínga tsꞌénbotixómá ree̱, ta̱nga tsꞌasꞌienjín, ngatꞌa̱ kjo̱a̱kitii̱ tsjandièjín nga ma bitjasꞌi̱e̱n ndiꞌaa̱ ree̱ tsi ńjño tokjuie kichajá.

³ Ngayeje xota̱ jundío̱ xi síndo nangi ko̱jo ngi̱ndie nínga kandaꞌyá kjo̱a̱botíxomaa̱ ko̱jo kjo̱a̱kitii̱ ree̱, kisꞌińdo xa̱ꞌya̱, ko̱jo katsꞌénkjaꞌa kjindiá yojoo̱, ko̱jo askjandá, ko̱jo ni̱ma̱ katsó. Achichí má xota̱ xi ńjño tokjuiee̱ ko̱jo ndisoo̱ xi xikoó tsi ṉchaa̱n kamá.

Marndokeoo̱ tsíꞌaá na̱ re Estee̱r nga ko̱síko̱jo

⁴ Kó ínchjín xo̱ngo̱ò ko̱jo xota̱ eunukoo̱ na̱ re Estee̱r kijítsáyaá ni xi kamaá, kó na̱ re Estee̱r achichí on kamaá nga tsintꞌié kuí nii̱, kó katsangiyaa̱ Marndokeoo̱ ńjño xi ko̱a̱ja̱, tsi̱ꞌe̱ nga ko̱síkjo ńjño tokjuie xi tsꞌényajá, ta̱nga Marndokeoo̱ kamámejénjiín.

⁵ Kósꞌe̱ na̱ re Estee̱r katsangiyakjaꞌá Ataa̱k, ngo kui xota̱ eunukoo̱ ree̱, kui xi katsjáxaá tsi̱ꞌe̱ nga skoón na̱ re Estee̱r, kó katsangiyakoo̱n Marndokeoo̱ tsi̱ꞌe̱ nga sku̱i̱e̱ mí ni xi kjima, ko̱jo míkjo̱a̱a̱ nga bo̱a̱ kjiꞌi ńjño yajá.

⁶ Kó Ataa̱k kijíchji̱a̱jo Marndokeoo̱ ngaskande ndi̱tsee̱n na̱xi̱ńdáꞌniuú, kui xi tikón ki̱a̱ kje̱n nga̱ntjo̱a̱ ndiꞌa nínga tsꞌénbotixómá ree̱.

⁷ Kó Marndokeoo̱ katsóyaà ngayeje ni xi kamaá, ko̱jo nga Amaa̱n katsóyàtjoón ree̱ xikótjín to̱ntiboa sa̱ꞌínkꞌasꞌien ngi̱ya koxa̱to̱o̱n, tsi̱ꞌe̱ nga si̱ꞌankjie ngayeje xota̱ jundío̱.

⁸ Ko̱jo katsꞌénkꞌasꞌiee̱n ngo chꞌo̱ xo̱jo̱n xi kamánda na̱xi̱ńdáꞌniú Susa̱, tsi̱ꞌe̱ nga si̱ꞌankjie xota̱ jundíoo̱, kó ꞌniú tsíꞌaá nga ko̱ko̱ó na̱ re Estee̱r, ko̱jo nga ka̱tso̱yaa̱ ni xi kjimaa̱. Marndokeoo̱ ti̱ tsíꞌaá Ataa̱k nga bo̱a̱ ka̱tso̱o̱ na̱ re Estee̱r nga ꞌniú ku̱i̱ꞌaa̱ ree̱ tsi̱ꞌe̱ nga ko̱síko̱jo xota̱ na̱xi̱ńdaá.

⁹ Kó Ataa̱k kijítsáyaá na̱ re Estee̱r ngayeje ni xi katsoó Marndokeoo̱.

¹⁰ Kósꞌe̱ na̱ re Estee̱r tsíchji̱a̱jo Ataa̱k, kó katsangiyakoo̱n Marndokeoo̱, tsi̱ꞌe̱ nga bi̱ ka̱tso̱o̱:

¹¹ «Ngayeje xota̱ xi mosoo̱ ree̱, ko̱jo xota̱ xi síndo nangi nínga botixómá kuí, jè be nga ta̱ꞌya xota̱ní tsi chjo̱on tsí xi̱ꞌin, xi kꞌo̱sꞌien ndi̱tsen ndiꞌa nínga tikón ree̱ tsi̱ꞌe̱ nga sku̱i̱e̱, kó tsi ko̱ndókjo̱a̱jiín, ta̱ ngo tsí kjo̱a̱kiti tikón kjo̱a̱a̱ kui xotaa̱, kó chjiéngá ko̱yà, ta̱nga ko̱yàjín kui xi kui ree̱ ku̱i̱e̱njénnié ki̱cha̱ to̱nsinieé, kó án je kantié ni̱xtjinnii̱ nga kji̱e̱ ndokjo̱a̱jínna».

¹² Kó kiꞌmíyaà Marndokeoo̱ ni xi katsó na̱ re Estee̱r,

¹³ Kó Marndokeoo̱, bi̱ tsó én xí katsangiyaa̱ na̱ re Estee̱r: «Ngata̱ niꞌínkjéjín ji nga ta̱ jí tsí xi xota̱ jundío̱ ji xi kjo̱tjoꞌaa̱ yojoo̱, kjo̱a̱a̱ nga ndiꞌaa̱ ree̱ tindyin ji.

¹⁴ Tsi ko̱ndókjo̱e̱jín ji ngotꞌe̱, xín kji̱ndi̱báni xi sa̱ꞌíndé ko̱jo xi kꞌo̱xiéꞌá xota̱ jundíoo̱, ta̱nga ji ko̱jo xota̱ ndiꞌaa̱ na̱ꞌmíi̱ kju̱i̱e̱són. ꞌYá xí bená tsi na̱ re kamá ji ta̱ngatꞌanii̱ kui ni̱xtjii̱n».

Na̱ Estee̱r asíko̱jo xotaa̱

¹⁵ Kósꞌe̱ na̱ Estee̱r, bi̱ tsó én xí katsangiya nginií Marndokeoo̱:

¹⁶ «Tꞌen ji kó tꞌítikí jí ngayeje xota̱ jundío̱ xi síndo na̱xi̱ńdáꞌniú Susa̱, kó ti̱ꞌankjaꞌájnú kjindiá yojojnú ngatꞌaa̱ an, kó ngata̱ jmí ni chiniejínjnú, ko̱jo ngata̱ jmí ni ꞌyójínjnú ján ni̱xtjii̱n ján ni̱xtji̱e̱n. Kó an ko̱jo ínchjín xo̱ngò moso̱na ti̱ si̱ꞌankjaꞌajne̱ kjindiá yojojne̱ nga, kósꞌe̱ kjiꞌá boá nga kjuínkóo̱n ree̱, ndatsi tsjandièjín kjo̱a̱kitii̱ ni xi sa̱ꞌin an. ¡Kó tsi sa̱ꞌínkꞌiénna ree̱, ja̱ ngatꞌien an!»

¹⁷ Kósꞌe̱ Marndokeoo̱ kijí, kó katsꞌénkjatjosón ngayeje ni xi katsoó na̱ re Estee̱r.