Matioo̱ 28 - Xo̱jo̱n eén Néná

Bi̱ tsꞌén jaꞌáꞌyaá Kjisoo̱

¹ Ngije jaꞌa ni̱xtjin ndikoón, nga kisisie̱èn nga ni̱xtjin tjoón xomanaa̱, kijíkatsijen nga̱tsjo̱ó Kjisoo̱ na̱ Riya̱ Lenaa̱, ko̱jo na̱ Riya̱ xi ingoo̱.

² Kó ngo kjo̱a̱ndi̱ko̱n ꞌniú jaꞌa, ngatꞌa̱ ngo ndítsjiee̱ Néná jatjajenni ndiꞌakꞌajmii̱ kó nga jeꞌe, katsꞌéntíyaá ndi̱jo̱ xi kjiꞌixtio nga̱tsjo̱ó, sꞌe̱ kisꞌijñasón nga̱soón.

³ Kó kui ndítsjiee̱ ꞌna̱ kamá xikoó nga foaꞌatꞌe, kó ńjño xi yajá tiboa xó xó kamá.

⁴ Kó jatsié má jájún xi ndyi̱kondaa̱, kó tiboaꞌandá má kamá xikoó xota̱ xi je jesón.

⁵ Kó kui ndítsjiee̱, bi̱ katsoó ínchjiín: –Ngata̱ ndakonjínmájnú jún, ngatꞌa̱ jè be an nga Kjisoo̱ xí ndyi̱mindyiséjnú, nda̱ xi akjatꞌa kroo̱,

⁶ kꞌi̱e̱jín tikón, ngatꞌa̱ jè jaꞌáꞌyaá, xikó katsó kuí. Ja̱bíjnúꞌun, kó tsitsíjenjnúu̱ ngi̱ndie nínga ikꞌíjñá yojoo̱.

⁷ Tsá tangínjnú, kó tꞌíyájnúu̱ xota̱ tsi̱ꞌe̱ nga jè jaꞌáꞌyaá ngi̱jii̱n xota̱ xi je jesoón, kó bo̱a̱ tꞌínjnúu̱ nga ki̱a̱ ko̱e̱je̱tjónjnú nga kongínjnú nangi Ngalilea̱, ki̱a̱ xcha̱jnú kuí, «ja̱ jè kixiyajnúꞌun.»

⁸ Kósꞌe̱ kui ínchjiín tsá jatjo nga̱tsjo̱ó, kó katsakjónní ko̱jo ꞌniú tsjá kamaá, tsanga má nga kijítsáyaá kui eén xota̱ tsi̱ꞌe̱ Kjisoo̱. Kó tji̱e̱nga ndyi̱fítsáyaá xota̱ tsi̱ꞌe̱ Kjisoo̱,

⁹ Kjisoo̱ jachó nínga síndo kui ínchjiín, katsꞌéntinde, kó kui ínchjiín kijíkóntiñaa̱, janíkjá sé Kjisoo̱, sꞌe̱ katsꞌéndikón.

¹⁰ Kósꞌe̱ Kjisoo̱, bi̱ katsó: –Ngata̱ ndakonjínmájnú, tangínjnú, kó tꞌíyájnúu̱ ntsꞌié án, tsi̱ꞌe̱ nga ko̱e̱je̱ nangi Ngalilea̱, kó ki̱a̱ sku̱i̱e̱na.

Bi̱ tsꞌén katsóyà jájuún ni xi kamá

¹¹ Kó tji̱e̱nga ndyi̱fí ínchjiín, chiboa jájuún kijí na̱xi̱ńdáꞌniuú, kó katsóyaà já ngito̱ko̱o̱ chináꞌmii̱ ngayeje ni xi kamaá.

¹² Kó kamátikó kuí jaá ko̱jo já xchá ngito̱ko̱o̱ na̱xi̱ńdaá, sꞌe̱ índa tsi̱ꞌe̱ nga tsie to̱n ko̱e̱ꞌeé jájuún,

¹³ nga bi̱ katsoó: –Bi̱ tꞌínjnú: «Xota̱ tsi̱ꞌe̱ Kjisoo̱ jeꞌe nga jñoó, kó katsꞌénchejé yojoo̱ Kjisoo̱ tji̱e̱nga ndyi̱tsjayojoféjne̱.»

¹⁴ Kó tsi ku̱i̱ntꞌiè kuí nii̱ nda̱ xtitjoón, ji̱n xí yàjne̱ kó kꞌuínjne̱, kó jmí kjo̱a̱xti kꞌuiéjínjnú.

¹⁵ Kó kui jájuún iskjíbé to̱o̱n, sꞌe̱ katsꞌén ngayeje ni xi kiꞌmií. Kuí én xi̱ꞌbi̱ xi kiꞌmíyaà já jundíoo̱ ngaskande kui ni̱xtjin xi̱ꞌbi̱.

Kjisoo̱ bi̱ tsꞌén katsjáxaá xota̱a̱

¹⁶ Kó bo̱a̱ tsꞌén nga tiengo xota̱ tsi̱ꞌe̱ Kjisoo̱ kijí nangi Ngalilea̱, nínga tikón tji̱ngi̱ xi katsoó Kjisoo̱,

¹⁷ kó kui jaá nga kamábe Kjisoo̱ katsꞌéndikón, ta̱nga tjín káꞌá xi jó xi ján íjñaá ini̱ma̱a̱.

¹⁸ Kó Kjisoo̱ kijíkóntiñaa̱, sꞌe̱ bi̱ katsoó: –Jè katseꞌéna xá nga kotixomáa̱ ngayeje ni xi tjín ndiꞌakꞌajmi jàn ko̱jo ni xi tjín tꞌanangii̱.

¹⁹ Kó kuíni nga, tangínjnú kó xota̱ tsa̱ꞌa̱n ti̱ꞌánjnú ngayeje xota̱ na̱xi̱ńdá, tatíndánijnú nga si̱ꞌankaxomájnú jaꞌeén Na̱ꞌmii̱, ko̱jo jaꞌeén ndií, ko̱jo jaꞌeén A̱si̱énni̱xtjii̱n,

²⁰ kó takoyajnúu̱ nga sa̱ꞌínkjatjosón ngayeje ni xi akoyájnúꞌun, kó an ngatsjéni̱xtjin kotíjña̱jojnúꞌun, ngaskande nga kju̱i̱e̱ nga̱sondiee̱. Bo̱a̱ kjiꞌi.