Juaa̱ 1 - Xo̱jo̱n eén Néná

Eén yojo kamá

¹ Nga ítsꞌi̱yanii̱ nii̱, ja̱bo̱a̱ jè tikón Eén, kó kui Eén, Néná tikónjo̱, kó kuí xí Néná.

² Kuí xí tikónjo̱ Néná ndeskande koó nga ítjatsꞌennii̱ nii̱.

³ Kuí ngatꞌaa̱ nga kamánda ngayeje ni xi tjiín, kó tsi kuijín xi bo̱a̱ katsꞌén, nde ngojín ni xi tjiín xi kamánda.

⁴ Kuí xí tikoón kjo̱a̱mindyioo̱n, kó kui kjo̱a̱mindyioo̱n, kuí xí ndiꞌí kamaá xota̱a̱,

⁵ kó ndiꞌií tsꞌentsíjen nínga jñoó, kó nínga jñoó kji̱e̱ ngo ndi̱yà tsꞌeén ndiꞌií.

⁶ Kisꞌijña ngo nda̱ xi kiꞌmí Jua̱ xi Néná katsangiya,

⁷ kuí nda̱a̱ xi chistiko̱ kamá, tsi̱ꞌe̱ nga ku̱i̱chji̱a̱jo xotaa̱ kjo̱a̱a̱ kui ndiꞌií, tsi̱ꞌe̱ nga ngayeje xi sꞌi̱jii̱n.

⁸ Juaa̱jín xi ndiꞌií, ta̱ jeꞌe tsí tsi̱ꞌe̱ nga ku̱i̱chji̱a̱ kjo̱a̱a̱ kui ndiꞌií.

⁹ Kui ndiꞌí ja̱koxi̱ xi tsꞌentsíjee̱n ngayeje xotaa̱, jeꞌe kui nga̱sondiee̱.

¹⁰ Kui nga̱sondiee̱ kisꞌijña, kó kui nga̱sondiee̱ kamánda ngatꞌaa̱ kui, kó xotaa̱ kui nga̱sondiee̱, kamábejín tsi kui.

¹¹ Ngi̱ndie xi tsi̱ꞌe̱ jachó, kó xota̱ xi tsi̱ꞌe̱ katsꞌénjo̱ꞌojín.

¹² Ta̱nga ngayeje xota̱ xi katsꞌénjo̱ꞌo, ko̱jo xi kisꞌijii̱n jaꞌeén, kuí xí katsjaá ngi̱ndie nga ndií Néná kamá.

¹³ Kui xota̱ xi katsen ngatꞌaa̱ Néná, jmí tsi bo̱a̱ tsꞌén katsen xikoó xota̱ xi tjiín, ti̱nde jmí tsi xikótsꞌèn mejeén xota̱ xi yojo katsenni.

¹⁴ Kó kuí Eén xi yojo kamá, kó kꞌi̱e̱ kisꞌijñajinná, kó kamáyà kjo̱a̱jee̱, kjo̱a̱jee̱ nga Ndí ngototoo̱ Na̱ꞌmii̱, xi kisꞌikitsiee̱ kjo̱a̱nda ko̱jo ja̱koxi̱.

¹⁵ Juaa̱ tsíchji̱a̱ kjo̱a̱a̱ kui, kó bi̱ katsó nga katsóyà: –Kjo̱a̱a̱ kuii̱ bí xi kixian an, nga bi̱ kixian an: Kui xi sꞌe̱ ndibaá, kuí xí tjón ngase, ngatꞌa̱ ja̱bo̱a̱ jè tikón ngindiee̱ nga kotíjña̱ an.

¹⁶ Ngatꞌa̱ kjo̱a̱nda tsiee̱ Néná jatjoni ngayeje ni xi katsjáná. Katsjáná ngo kjo̱a̱nda sꞌe̱ katsjá nginíná ingo kjo̱a̱ndaa̱,

¹⁷ ngatꞌa̱ kjo̱a̱kitii̱ Néná ngatꞌaa̱ Moisee̱ nga katseꞌeé xotaa̱, ta̱nga ngatꞌaa̱ Jesukristoo̱ nga jeꞌe kjo̱a̱ndaa̱ ko̱jo ja̱koxi̱i̱.

¹⁸ Kji̱e̱ ngo xi be kókjiꞌi Néná, kó kui ndí ngototoo̱ xi tikón nínga tikón Néná xí Na̱ꞌmii̱, kuí boá xi akó ngatꞌaa̱ Néná.

Bi̱ tsꞌén katsóyà Jua̱ xi botíndaá kjo̱a̱a̱ Kjisoo̱

¹⁹ Kó kuí ni xi̱ꞌbi̱ xi katsóyà Juaa̱, xikoó ngo chistiko̱, kjiꞌanga já ngito̱ko̱o̱ já jundío̱ xi síndo na̱xi̱ńdáꞌniú Jerusale̱n katsangiya chináꞌmi ko̱jo já lebita̱, tsi̱ꞌe̱ nga bi̱ tsꞌén asíyaá: “ꞌYání jí.”

²⁰ Kó katsóyà, jmí tsi jmí katsó, kó bi̱ katsó nga katsóyà: –Ánjín xi Kristoo̱.

²¹ Kó bi̱ kiꞌmií nga akasíyaá: –Ja̱, a jí xí Eliyaa̱ ji tsobo̱a̱. Kó bi̱ katsó Juaa̱: –Jmí, ánjín bo̱a̱. Sꞌe̱ bi̱ tsꞌén akasíyá nginií: –A jí xí chji̱ni̱e̱ꞌe̱én Néná jí. Sꞌe̱ bi̱ katsó. –Jmí.

²² Kósꞌe̱ bi̱ kiꞌmií: –Ja̱, ꞌyání jí tsobo̱a̱. Tꞌíyéjne̱, tsi̱ꞌe̱ nga bo̱a̱ tsꞌén kꞌuiyájne̱ já xí katsangiyajne̱. Kó sé ji kjo̱a̱a̱ ji.

²³ Kó bi̱ katsó Juaa̱: –Án boá nda̱a̱ kui nda̱ xi kandaꞌyáa̱ nangi kixií, xi bi̱ tsoó: “Ti̱ꞌankixi̱jnú ndi̱ya̱à Ndi̱a̱a̱”, xikó katsó nda̱ chji̱ni̱e̱ꞌe̱én Néná xi ꞌmí Isayaa̱.

²⁴ Kó xota̱ xi kanangiyaa̱ Juaa̱, já fariseo̱ boá.

²⁵ Kó asíyaá Juaa̱, nga bi̱ katsoó: –Ja̱ kó míkjo̱a̱a̱ nga botíndé jí, tsi jijín xi Kristoo̱, tsi jijín xi Eliyaa̱, ti̱nde jijín xi ngo nda̱ chji̱ni̱e̱ꞌe̱én Néná xi kjo̱e̱ꞌe̱é.

²⁶ Sꞌe̱ bi̱ katsó Juaa̱ nga tsíchji̱a̱: –An ndáfoa xí botindání an, ta̱nga kꞌi̱e̱ tikónjinná ngo xi yàjínjnú,

²⁷ kuí xi̱ꞌbi̱ xi jaskan an ndibá, kui xi ngaskande tsoboájínna an nga skjíndóo̱ ńꞌniuú tji̱xíndieé.

²⁸ Kui nii̱ xi kamá na̱xi̱ńdá Betania̱, ngándaá ndejèꞌ Jorndaa̱n, nínga Juaa̱ atíndá xota̱.

Kjisoo̱, kuí xí ndí cho̱tsa̱nga̱a̱ Néná

²⁹ Nga kamángindyiojón Juaa̱ kamábe nga Kjisoo̱ tsꞌéndibákón tiñaa̱, kó bi̱ katsó: –Kꞌi̱e̱ tikón kꞌi̱e̱e̱ ndí cho̱tsa̱nga̱a̱ Néná, xi foaꞌáxín jeé xotaa̱ kui nga̱sondiee̱.

³⁰ Kjo̱a̱a̱ kuii̱ bí xi kixian an, nga bi̱ kixian an: “Jaskan ngije jéꞌe̱ an ndibá ngo nda̱, xi ja̱bo̱a̱ je ikꞌíjñá ngindiee̱ nga stse̱n án, ngatꞌa̱ kuí xí tjón ngase ta̱bo̱a̱jiín án.”

³¹ Kó nde bejín an ꞌyání kui, ta̱nga tsi̱ꞌe̱ nga kamábe xota̱ Israee̱l, kuíni nga ndáfoa tsꞌénbotindá án xotaa̱.

³² Kó katsóyà Juaa̱ ni xi kamábe xikoó ngo chistiko̱, nga bi̱ katsó: –Kamábe an A̱si̱énni̱xtjii̱n Néná nga ja̱kjiꞌi tójo má kjiꞌi nga jatjajenni ndiꞌakꞌajmi jàn, kó nga ki̱a̱ kisꞌijñajii̱n Kjisoo̱.

³³ Kó nde bejín an ꞌyání kui, ta̱nga kui xi katsangiyana nga ndáfoa tsꞌénbotindá án, bi̱ katsóna: “Kui xi xchi̱e̱ ji nga kjo̱tjajennié A̱si̱énni̱xtjii̱n kó nga ki̱a̱ kꞌuijñájíi̱n, kuí xi̱ꞌba̱ xi A̱si̱énni̱xtjii̱n Néná xí ko̱tíndání.”

³⁴ Kó an kamábe an kui, kó je katsóyà an nga kuí bí xi ndií Néná.

Kjisoo̱ bi̱ tsꞌén tsíchji̱a̱a̱ xota̱a̱ xi tjoón

³⁵ Nga kamángindyiojón ti̱ ki̱a̱ tikón nginí Juaa̱ ko̱jo jó xota̱ tsi̱ꞌe̱,

³⁶ kó nga kamábe nga ki̱a̱ tsoꞌbá Kjisoo̱, bi̱ katsó: –Kꞌi̱e̱ tikón kꞌi̱e̱e̱ ndí cho̱tsa̱nga̱a̱ Néná.

³⁷ Kó nga tsintꞌié kuí nii̱ kui xota̱ tsi̱ꞌe̱ Juaa̱ xi joó, kijítji̱ngii̱ Kjisoo̱.

³⁸ Kó nga katsꞌénkꞌafóyá Kjisoo̱, nga kamábe já xí yajángií, bi̱ katsó: –Mí xí ndyi̱mindyiséjnú. Sꞌe̱ kui jaá bi̱ katsó: –Rabí (Mostro̱ tsó kui eén), ñání tindyin ji.

³⁹ Kó Kjisoo̱, bi̱ katsoó: –Ja̱bítji̱ngijnúꞌun, kó xcha̱jnú. Kó kamábe kui jaá nínga tikón, kó nga ngo ni̱xtjii̱n nga kisꞌińdo nínga tikón Kjisoo̱, ngatꞌa̱ mara̱ tsi ta̱ chi̱bo̱a̱ nijón nga kamángixón nga bo̱a̱ kamaá.

⁴⁰ Jandree̱, ntsꞌi̱e̱ Ximo̱ Peé, kuí boá ngo nda̱ xi tsintꞌieé ni xi tsíchji̱a̱ Juaa̱, kó kijítji̱ngii̱ Kjisoo̱.

⁴¹ Jandree̱ kuí xí tjón kasakoo̱ ntsꞌi̱e̱ xi ꞌmí Ximoo̱, kó bi̱ katsoó: –Jè kasakoná Mesiyaa̱ (kui xi Kristoo̱, tsó kui eén).

⁴² Sꞌe̱ Jandree̱ kijíjo̱ Ximoo̱ nínga tikón Kjisoo̱. Askoꞌá Kjisoo̱ kui nda̱a̱, sꞌe̱ bi̱ katsoó: –Jí xí Ximoo̱ ji, ndií Jonaa̱, jí xí Sefa̱ kꞌuiín (Ndi̱jo̱ tsó kui eén nga én arameo̱, kó Pé tsó nga én ngriengo̱).

Kjisoo̱ bi̱ tsꞌén tsíchji̱a̱a̱ Ngiripee̱ ko̱jo Natanaee̱l

⁴³ Nga kamángindyiojón Kjisoo̱ kamámejeén kijí nangi Ngalilea̱, kó kijí, sꞌe̱ ki̱a̱ kasakoo̱ Ngiripee̱, kó bi̱ katsoó: –Ndibétji̱ngíní.

⁴⁴ Kó Ngiripee̱ na̱xi̱ńdáꞌniú Betsainda̱ chji̱a̱ni, na̱xi̱ńdáꞌniú xí chji̱a̱ni Jandree̱ ko̱jo Peé.

⁴⁵ Kó Ngiripee̱ kasakoo̱ Natanaee̱l, kó bi̱ katsoó: –Jè kasakojne̱ kui nda̱ xi tsíchji̱a̱ Moisee̱ nga katsꞌénꞌindó xo̱jo̱n kjo̱a̱kitii̱, ko̱jo xi tsíchji̱a̱ já chji̱ni̱e̱ꞌe̱én Néná: Kjisoo̱ boá, ndií Kosiee̱, xi chji̱a̱ni Nasaree̱t.

⁴⁶ Kó Natanaee̱l, bi̱ katsó: –A ka̱márií na̱xi̱ńdáꞌniú Nasaree̱t kjo̱tjojinni ngo ni xi nda. Sꞌe̱ bi̱ katsó Ngiripee̱: –Ja̱bíꞌi̱n, kó xchi̱e̱ ji.

⁴⁷ Nga kamábe Kjisoo̱ nga Natanaee̱l tsꞌéndibá tiña, bi̱ katsoó: –Kꞌi̱e̱ tikón kꞌi̱e̱e̱ ngo nda̱ xi ja̱koxi̱ nga Israee̱l chji̱a̱ni, xi májiín ꞌboṉcha̱.

⁴⁸ Kó bi̱ katsó Natanaee̱l: –Ñá kamáyèní. Sꞌe̱ Kjisoo̱, bi̱ katsó: –Ngindiee̱ nga tsíchjiáa Ngiripee̱, kamábee̱ nga tindyin ji ngindie ngo yáꞌingo̱.

⁴⁹ Sꞌe̱ bi̱ katsó Natanaee̱l: –Mostro̱, jí xí ndií Néná, jí xí nda̱ Ree̱ Israee̱l.

⁵⁰ Sꞌe̱ Kjisoo̱, bi̱ katsó: –A kjo̱a̱a̱ nga bi̱ kixiaan: Kamábee̱ nga tindyin ngindiee̱ ngo yáꞌingo̱, a kuíni nga sꞌijinnii. Sꞌe̱ xchi̱e̱ ngase tsie ni xi xikoó xi̱ꞌbi̱.

⁵¹ Kó bi̱ katsó ngase Kjisoo̱: –Ja̱koxi̱ ni xi xian an: Nga jún xcha̱jnú nga tsjientíxa̱ ndiꞌakꞌajmi jàn, kó xcha̱jnú nga ko̱e̱je̱nijíngí ko̱jo nga kjo̱tjajen ndítsjiee̱ Néná nga kjo̱e̱ꞌekoón ndií nda̱ xi̱ꞌii̱n.