Joo̱b 31 - Xo̱jo̱n eén Néná

¹ »Jè bo̱a̱ kixiáa̱n ndyikón an nga chꞌójín tsꞌén skotsíjee̱n ínchjín xo̱ngo̱ò.

² Kó mí nii̱ bo̱a̱ xi tsja̱ana Néná xí tikón nkꞌajmii̱ kjo̱a̱a̱ kui nii̱, Mí nii̱ bo̱a̱ xi tsjá Néná xí tsi̱ꞌe̱ ngayeje ngaꞌniuú.

³ Néná a botíjéjínrií xota̱ xi ꞌniú ndajiín. A jmí kjo̱a̱ni̱ma̱ foaꞌatiojín xota̱ xi ꞌniú ndajiín.

⁴ Néná a bejín ndi̱yà xí tsoꞌbá an, kó a kotsijénjínrií ngayeje ni xi tsꞌen an.

⁵ »Tsi ni xi bo̱a̱jín kjiꞌi katsꞌen an, ko̱jo tsi tjín xí índiso an,

⁶ ¡ja̱ Néná ngatꞌachi̱bo̱a̱jona nisochi̱bo̱a̱a̱ kjo̱a̱kixi̱i̱, kó sku̱i̱e̱ nga jmí jéjínna!

⁷ Tsi kje̱ꞌe ndi̱yà iskjíbé án, kó tsi ini̱ma̱na kijítji̱ngi ni xi kamábe ndyikón án, ko̱jo tsi ngi̱ya ndsa̱ án síndo ni chejé,

⁸ ¡ja̱ kje̱ꞌe xí nga kjinie ni xi kamáxchána, kó nga chjaníyá ndeskande ja̱ma̱a̱ ni xi itji̱e̱ an!

⁹ »Tsi an xi askoyáa̱ nga kjo̱tjoni ndiꞌaa̱ nda̱ xi tikóntꞌa ndiꞌana tsi̱ꞌe̱ nga an kjojñajo̱ an chjo̱ón,

¹⁰ ¡ja̱ kje̱ꞌe xí moso̱ ngatsꞌén chjo̱onna, ko̱jo kje̱ꞌe xí ngatjajñajo̱ nga!

¹¹ Achichí nga ndajín kui nii̱, kó chjiéngá ko̱ti̱je̱é xi bo̱a̱ sa̱ꞌiín,

¹² ¡ngatꞌa̱ kui nii̱ xikónií ngo ndiꞌí xí tsꞌenkjié ngayeje nii̱, kó kuí boá xi sa̱ꞌínkjié ngayeje ni xi tjínna!

¹³ »Kjiꞌanga já moso̱na ko̱jo chji̱ni̱e̱ꞌbona tjín ni xi tsjajín kamaá, kó tsíchji̱a̱jona, kixi̱ katsꞌéndajin an kjo̱a̱xtii̱.

¹⁴ Mí xí sa̱ꞌin an kjiꞌanga Néná ku̱i̱ꞌana xki̱, kó nga ko̱síyána ngo ni, kó xiáa̱n.

¹⁵ ¡Kui Néná xí katsꞌéndana ngi̱ya ndo̱bo̱a̱ndií na̱ana, ti̱ kuí boá xi katsꞌénda kui nga, kuí boá xi katsjájne̱ kjo̱a̱mindyion, kó ndse̱je̱n katsꞌénjne̱!

¹⁶ »Ngatsjéni̱xtjin nga asiko̱jo an xota̱ ni̱ma̱a̱, jmíni̱xtjin índomasien an ínchjín kꞌán xi je jesón xi̱ꞌii̱n tsi̱ꞌe̱ nga jesón kjindiá,

¹⁷ jmíni̱xtjin iskjíni̱e̱ so̱bo̱a̱ an nichinie, ngatsjéni̱xtjin nga iskjíni̱e̱jo an xota̱ xi xꞌi̱a̱a̱n.

¹⁸ Ndeskande koó nga kjindí án, xikoó ngo na̱ꞌmi kamá an, nga ngatsjéni̱xtjin asiko̱jo an xota̱ xi xꞌi̱a̱a̱n, ko̱jo ínchjín kꞌán xi je jesón xi̱ꞌii̱n,

¹⁹ jmíni̱xtjin katsjandiè an nga xota̱ ni̱ma̱a̱ jesón nchꞌàn nga kisꞌiejiín ńjño xi ko̱a̱ja̱.

²⁰ Achichí má xi katsjána ndokꞌóchjì nga katsjáa̱ ńjño xi tsja̱a̱ cho̱tsa̱nga̱na kamándani.

²¹ Jmíni̱xtjin nga ndajín katsꞌenjo̱ an xota̱ xi xꞌi̱a̱a̱n nga katsꞌenkjién án xá xí tjínna, tsi̱ꞌe̱ nga an ko̱e̱je̱jindojona ne xi tsꞌendájin kjo̱a̱xtii̱.

²² ¡Ngatjatjokjo tjiana tsi tsꞌénꞌbindiso an, kó nga tꞌo ńda tjiana!

²³ Ngatꞌa̱ achichí tsakjon an nga Néná ko̱tíjéna, kó ta̱ngatꞌanii̱ ngaꞌniú xí tjiín, nde ka̱májínna sa̱ꞌin an kui nii̱.

²⁴ »Jmíni̱xtjin nga kjo̱a̱cho̱o̱n xi kjimaꞌniátakón an, ti̱nde jmí tsi bi̱ kixiáa̱n to̱nsinieé: Jí boá xi ꞌniákoo̱n.

²⁵ Jmíni̱xtjin nga tsja kamána kjo̱a̱a̱ nga kamátsié ngase kjo̱a̱cho̱nna, ko̱jo nga ta̱ngatꞌanii̱ xána nga bo̱a̱ kamá.

²⁶ Jmíni̱xtjin nga askotsijèe̱n ndiꞌií tsꞌueé, ko̱jo tsi xikótsꞌèn kijí saá,

²⁷ tsi̱ꞌe̱ nga kui xi ꞌma ꞌma katsꞌendikón án, ko̱jo tsi ndsa̱ án katsangiyañáa̱ ngo ndsó.

²⁸ Tsi bo̱a̱ katsꞌen an, ngora̱ jé xí ta̱nisién je xi katsꞌen an, ngatꞌa̱ kondraa̱ Nénárá kisꞌijña an tsobo̱a̱.

²⁹ »Jmíni̱xtjin tsja kamána kjiꞌanga ni xi ndajín kamaá kondra̱na, ti̱nde jmíni̱xtjin tsajnókie an,

³⁰ jmíni̱xtjin tsíꞌáa̱ Néná tsi̱ꞌe̱ nga ngo ni xi ndajín ka̱maa̱, ta̱sá xió kisꞌijña an ngindiee̱ nga sa̱ꞌínjé án,

³¹ moso̱ ko̱jo chji̱ni̱e̱ꞌbo xi kisꞌiena, jmíni̱xtjin katsjandièe̱ nga chꞌo katsꞌénjo̱ xota̱ xi xín nangi chji̱a̱ni.

³² Kjiꞌanga xota̱ xi xín chji̱a̱ni katsꞌénkjanie nga̱ntjo̱a̱ ndiꞌana, katsjandièe̱ nga ki̱a̱ katsꞌénkjaꞌa ni̱xtji̱e̱e̱n,

³³ jmíni̱xtjin iꞌmá an ngo jé xí katsꞌen an xikó tsꞌén xota̱ xi ngasee̱, ti̱nde tjiꞌmájínna ni xi ndajín xi tsꞌen an,

³⁴ ta̱ngatꞌanii̱ nga katsakjon an xota̱ kjiín, ko̱jo nga sa̱ꞌínchꞌóna xota̱ ndiꞌana, kuíni nga ta̱sá xió kisꞌijña an, kó nde jatjojín an ndiꞌana.

³⁵ »¡Achichí mejénna nga tjín xí ku̱i̱ntꞌièna katsaki! ¡Kó kjimaꞌniáko̱n an nga Néná xí tsi̱ꞌe̱ ngayeje ngaꞌniuú kui xi ka̱ma chistiko̱na! Ndatsi kondra̱na xo̱jo̱n má ngatꞌítꞌa ni xi ko̱óngítaꞌinna.

³⁶ Koaꞌanijín an kui kjo̱a̱botíjeé, xikó maá tsi ngo korona̱ ko̱jo tsi tjiana kꞌuisón an.

³⁷ Tji̱e̱nkꞌa kje̱n án nga kjóchokóo̱n Néná, kó sa̱ꞌinkꞌasꞌièe̱n xki̱ kjo̱a̱a̱ ni xi katsꞌen an.

³⁸ »Tsi ku̱i̱chji̱a̱ tꞌanangina kondra̱ tsa̱ꞌa̱n, kó tsi nijan skja̱ndá xo̱ngà xí akjan an nínga itji̱e̱ an ni,

³⁹ tsi tjín xí katsꞌenchejée̱ nga iskjíni̱e̱ an ni xi ítji̱e̱, ko̱jo tsi ndasen ijñá an ini̱ma̱a̱ ndi̱a̱a̱ kui ngi̱ndiee̱.

⁴⁰ Tsi bo̱a̱ kjiꞌi ni xi tꞌíxián an, ¡ngindiee̱ nga to ndso̱ko̱a̱n ṉño̱pan ko̱jo sebanda̱ xi tsja̱á tꞌanangina, ja̱ ta̱sá ndaꞌyá ngatsjá tsobo̱a̱!» Boá tsꞌén katsꞌénkjietꞌa ni xi katsó Joo̱b nga tsíchji̱a̱.