Joo̱b 1 - Xo̱jo̱n eén Néná

Joo̱b

¹ Ki̱a̱ nangi Uu̱ kisꞌijña ngo nda̱ xi kiꞌmí Joo̱b xi achichí ndaxota̱ ko̱jo kixi̱ kamá. Ngatsjéni̱xtjin nga kamábendikón Néná, kó chiíjín katsꞌén ni xi ndajín.

^2-3 Kuí boá kui nda̱a̱ xi achichí ꞌniú cho̱n ngase kamá ki̱a̱ nangi xi síndo xtji̱e̱e̱n nínga fotjo tsꞌueé. Tie kamá ndií, yito xi xi̱ꞌin ko̱jo ján xi ínchjín, ko̱jo achichí kamá moso̱ xi ki̱a̱ katsꞌénxátꞌaa̱. Kó yito mi̱ cho̱tsa̱nga̱ kisꞌiee̱, ko̱jo ján mi̱ cho̱toꞌoyitsꞌe̱n, ko̱jo ngo mi̱ cho̱yojo xi̱ꞌin xi bokján tꞌanangi, ko̱jo ún úchán bórró ínchjín.

⁴ Ndí xíꞌiín Joo̱b ngatsjéni̱xtjin nga katsꞌén sꞌué ꞌniú ki̱a̱ ndiꞌaa̱, kó xki̱ ngo ni̱xtjin katsoboaá nga ngo nga ngo, kó katsóyaà nga ján ínchjín ndichjá tsi̱ꞌe̱ nga nijan iskjinie ko̱jo nijan katsꞌejo̱ xkjín.

⁵ Ngije kamá nga ngo nga ngo kui sꞌué xí katsꞌén, Joo̱b katsangiyakjaꞌá ndií, kó tsíꞌaá Néná tsi̱ꞌe̱ nga sa̱ꞌínjetakoón ta̱jmì jéní xi katsꞌén kui jaá. Joo̱b achichí ta̱jñó fostjíe̱n nga tsꞌenkꞌásꞌieén Néná ngo kjo̱a̱tjó nga ítií cho̱ kjo̱a̱a̱ nga ngo nga ngo ndií. Joo̱b katsꞌén kui nii̱ ngatꞌa̱ katsꞌénkjó nga tsi ta̱ katsꞌénjé jaá nga chꞌo katsoó Néná, ko̱jo tsi chꞌo tsꞌén íjin ngi̱jin ini̱ma̱a̱. Kamángá maá Joo̱b nga kui nii̱ katsꞌén ndyiojón ndyiojón.

Xindajín xi bongítaꞌínná

⁶ Ngo ndi̱yà, ni̱xtjin nga je kamángaá ngayeje mosoo̱ nkꞌajmii̱ nga fochó ngindyi̱ko̱n Néná, ti̱ jachó Xindajín nga.

⁷ Kó Néná, bi̱ katsoó Xindajín: —¡Kó jí! Ñá kjoéꞌe̱ni ji. Kó bi̱ katsó Xindajín: —Nga̱sondiee̱ kjoéꞌe̱ni an, ki̱a̱ kijíkatsijèe̱n ni xi ndyi̱tsꞌèn xotaa̱. Kósꞌe̱ Néná, bi̱ katsoó:

⁸ —Kótsꞌèn niꞌínkjé jí kjo̱a̱a̱ Joo̱b, nda̱ xi tsꞌénxátꞌana xi achichí ꞌniáko̱n an. Jmíjín ingo nda̱ ngayeje kui nga̱sondiee̱ xi bo̱a̱ tsꞌén ndaxota̱ ko̱jo xi kixi̱ xikoó Joo̱b. Ngatsjéni̱xtjin nga ntꞌiéꞌénna, kó chiíjín tsꞌén ni xi ndajín.

⁹ Kósꞌe̱ Xindajiín, bi̱ katsoó Néná: —¡Kjénní nga bo̱a̱ kjiꞌi ni xi se ji! ¡Ta̱nga tsi ntꞌiéꞌeén Joo̱b, jmí tsi ta̱ kjo̱a̱ndaní, kjo̱a̱a̱ nga tjín ni xi nda maá kui, kuíni nga ntꞌiéꞌénnií!

¹⁰ Ngatsjéni̱xtjin nga ji tichìi̱n kui ko̱jo xota̱ ndiꞌaa̱, ko̱jo ngayeje ni xi tjiín, kó niꞌínchikonñí ji xá xí tsꞌén. ¡Cho̱yojoo̱ ko̱jo cho̱tsa̱nga̱a̱ je tjikítsieni ngayeje kui nangii̱!

¹¹ Ta̱nga nga ja̱koxi̱ tsi ndajín si̱ꞌinje̱ ji, kó tsi chje̱ꞌéxíi̱n ngayeje ni xi tjiín, ¡ndé xchi̱e̱ ji nga chꞌo ka̱tso̱ tíkje̱n tíkje̱e̱n!

¹² Kósꞌe̱ Néná, bi̱ katsoó Xindajiín: —Ndakjíꞌí tsobo̱a̱, ja̱ ta̱ ni xi mejeénri ti̱ꞌíi̱n ngayeje ni xi tjiín Joo̱b, ta̱nga ngata̱ jmí ni niꞌínje̱jín ji kui ki. Ngije bo̱a̱ kiꞌmií Xindajiín, jatjoxieni ngindyi̱ko̱n Néná.

Kjo̱a̱chjatꞌayákón xi tjón jaꞌatio Joo̱b

^13-14 Ngo ndi̱yà, tji̱e̱nga nga ndí xíꞌiín ko̱jo ndí ínchjiín Joo̱b ndyi̱tsꞌèn ngo sꞌué ki̱a̱ ndiꞌaa̱ nda̱ xi tjoón nga ndyi̱kjinie nichinie ko̱jo ndyi̱ꞌbi bino̱, jachó ndiꞌaa̱ Joo̱b ngo nda̱ xi jachójoo̱ ngo én, kó bi̱ katsoó: «¡Jí xingá Joo̱b, jáchéjé xi chji̱a̱ni nangi Sabaa̱ jachókjánjo̱jne̱, kó katsꞌénchejé cho̱o̱! Ki̱a̱ ndyi̱niꞌánxájo̱jne̱ cho̱yojo xi bokján tꞌanangii̱, tji̱e̱nga ndyi̱kjién bórroó ki̱a̱ nínga tiñaa̱ nga bo̱a̱ kamá.

¹⁵ Ta̱niján má kuí jáchéjeé ítsꞌi̱yanii̱ nga katsꞌénkꞌién xotaa̱, kó ta̱ ngo chií an xi jatjongiꞌmana yojona, tsi̱ꞌe̱ nga kjoéꞌe̱tsáyaá kui nii̱ ji».

¹⁶ To̱kó tsꞌénchji̱a̱ ngase kui nda̱a̱ nga jachó ingo nda̱ xi yaꞌa ngo én, kó bi̱ katsoó Joo̱b: «¡Jí xingá Joo̱b, ngo ndiꞌií cho̱ꞌo̱n kjindibáni nkꞌa jàn, kó katsꞌénkꞌién cho̱tsa̱nga̱a̱ ko̱jo já xí koón kui cho̱o̱! ¡Kó ta̱ ngo chií an xi jatjongiꞌmana yojona, tsi̱ꞌe̱ nga kjoéꞌe̱tsáyaá kui nii̱ ji!»

¹⁷ To̱kó tsꞌénchji̱a̱ ngase kui nda̱a̱ nga jachó ingo nda̱ xi yaꞌa ngo én, kó bi̱ katsoó Joo̱b: «¡Jí xingá Joo̱b, ján tjín jáchéjé xi chji̱a̱ni nangi Kalndea̱ jachókjánjo̱jne̱, kó katsꞌénkꞌién mosòo̱, kó kijíjo̱ ngayeje cho̱toꞌoyitsꞌeèn! ¡Ta̱ ngo chií an xi jatjongiꞌmana yojona tsi̱ꞌe̱ nga kjoéꞌe̱tsáyaá kui nii̱ ji!»

¹⁸ To̱kó tsꞌénchji̱a̱ ngase kui nda̱a̱ nga jachó ingo nda̱ xi ma nijoón xi yaꞌa ngo én, kó bi̱ katsoó Joo̱b: «Jí xingá Joo̱b, ngayeje ndíi̱ xi ínchjiín ko̱jo ndíi̱ xi xi̱ꞌii̱n ki̱a̱ ndyi̱tsꞌèn ngo sꞌué ki̱a̱ ndiꞌaa̱ nda̱ xi xchaá katsaki,

¹⁹ kó ta̱niján má jaꞌa ngo tjo̱ꞌniú xi kjindibáni nangi kixií, kó tsꞌajmi ndiꞌaa̱ nga yeꞌeé. ¡Ngayeje ndíi̱ jesón nga tsꞌákanieé kui ndiꞌaa̱! ¡Ta̱ ngo chií an xi jatjongiꞌmana yojona tsi̱ꞌe̱ nga kjoéꞌe̱tsáyaá kui nii̱ ji!»

²⁰ Ngije tsintꞌié kuí nii̱ Joo̱b, kasasienkixi̱, kó iskjíndiyájón ńjño xi yajá nga akó nga on kamaá, sꞌe̱ íjón taka takaa̱ to̱ko̱, kósꞌe̱ asiéntikoó ngaskande nga kisitꞌaa̱ xtjien tꞌanangii̱ nga katsꞌéndikón Néná,

²¹ kósꞌe̱ bi̱ katsó: «Jmí ni yaꞌajín an nga jatjoni an ndo̱bo̱a̱ndií na̱anna, kó ti̱ jmí ni koaꞌajín an nga kjo̱tjoni an kui nga̱sondiee̱ nga, ¡Néná katsjána, kó Néná jaꞌáxínna! ¡Ngatamachikonñé jaꞌeén Néná!»

²² Kó ndatsi bo̱a̱ kjiꞌi ngayeje ni xi kamaá Joo̱b, katsꞌénjéjín, ti̱nde Nénájín asieén ni xi kamaá.