Jenesii̱s 25 - Xo̱jo̱n eén Néná

Bi̱ tsꞌén kꞌien Abraa̱n

¹ Ngije kꞌien na̱ Saraa̱, Abraa̱n kisꞌiee̱ ingo chjo̱on xi kiꞌmí na̱ Ketura̱,

² kó kui xota̱chjo̱on kisꞌiee̱ kjín ndí xí tsi̱ꞌe̱ Abraa̱n, kuí bí xi̱ꞌbi̱ xi ndií: Simraa̱n, Joksaa̱n, Mendaa̱n, Mandiaa̱n, Isbaa̱k, ko̱jo Súaa̱j.

³ Joksaa̱n boá xí kamá na̱ꞌmii̱ Sebaa̱ ko̱jo Ndendaa̱n. Xota̱ tji̱e̱e̱ Ndendaa̱n boá xi kamá xota̱ Asuu̱r, xota̱ Letuu̱ ko̱jo xota̱ Leuu̱n.

⁴ Ún kamá ndií Mandiaa̱n, kó kuí bí xi̱ꞌbi̱: Efaa̱, Éfee̱r, Anoo̱k, Abidaa̱, ko̱jo Elndaa̱. Ngayeje kui xotaa̱ xi xota̱ tji̱e̱e̱ na̱ Keturaa̱ kjindibáni.

^5-6 Kó tji̱e̱nga tikón ngase Abraa̱n ngayeje ni xi tjiín, Isaa̱ katsꞌénkꞌasꞌiee̱n. Ta̱nga ngayeje ndí xí kisꞌiejoo̱ kje̱ꞌe ínchjín ta̱ ni tsjakon tsí xi katsjaá. Kó kui ndií xtji̱e̱e̱n nínga fotjo tsꞌueé kui ngi̱ndiee̱ katsꞌénkjí, kjin katsꞌénkꞌíndonii̱ Isaa̱.

⁷ Úchán ichítié ko̱jo kan ún nó kamaá Abraa̱n nga kisꞌijña nga̱sondie,

^8-10 kó nda kisꞌijña, kó ngije jachó ni̱xtjii̱n, kjo̱a̱xcha̱ári nga kꞌien, kó ki̱a̱ nijan kijíkꞌíjñajo̱ xota̱ xi xchaá. Kó Isaa̱ ko̱jo Ismaee̱l yínijín Abraa̱n ki̱a̱ nínga kjiꞌinijín na̱ Sara̱ chjo̱ón, ki̱a̱ ti̱xa̱na̱xi̱ xi tikón Makpela̱, ki̱a̱ tiñaa̱ kꞌijñá Mamree̱, kui ti̱xa̱na̱xi̱ xi Abraa̱n tsꞌatsiee̱ Efroo̱n.

¹¹ Kó ngije kꞌien Abraa̱n, Néná katsꞌénchikonñé Isaa̱, kó kui nda̱a̱ ki̱a̱ kisꞌijñatꞌa nínga tikón kui ndáńchꞌi̱ xi ꞌmí «Ndáńchꞌií Néná xi tikoón ko̱jo be ngayeje nii̱».

Xota̱ tji̱e̱e̱ Ismaee̱l

^12-16 Kuí bí xi̱ꞌbi̱ xi xota̱ tji̱e̱e̱ Ismaee̱l, ndií Abraa̱n, kui xi na̱an kamánii̱ na̱ Angaa̱r, xi chji̱a̱ni Ejipto̱, na̱ xi mosoo̱ na̱ Saraa̱ kamá. Kuí bí jaꞌeén nga tiejó ngito̱ko̱o̱ xtín xota̱ xi chji̱a̱ni ndií Ismaee̱l, xi kótsꞌèn katsen ko̱jo nínga kisꞌińdo ko̱jo tꞌanangi xi kisꞌiee̱: Nebayoo̱t, kuí boá xi ndí tjón kamá, Kendaa̱r, Andbee̱l, Mibsaa̱n, Mismaa̱, Ndumaa̱, Masaa̱, Andaa̱r, Temaa̱, Jetuu̱r, Nafii̱, ko̱jo Kendmaa̱.

¹⁷ Úchán ko̱jo kantjiꞌún jó nó kamaá Ismaee̱l nga kisꞌijña nga̱sondie, kó ngije kꞌien ki̱a̱ nijan kisꞌinijínjo̱ xota̱ xi xchaá.

¹⁸ Xota̱ tji̱e̱e̱ Ismaee̱l ki̱a̱ kisꞌińdo nangi Abilaa̱ ngaskande xtji̱e̱e̱n na̱ngi, tiñaa̱ tsindioó na̱xi̱ńdá Ejipto̱ xtji̱e̱e̱n na̱ngi, ki̱a̱ ngándá nínga kisꞌińdo xkjín.

Bi̱ tsꞌén kjindibáni Isaa̱ ko̱jo Jakoo̱b ( 25:19—36:43 ) Ndií Isaa̱: Jakoo̱b ko̱jo Esauu̱

¹⁹ Bi̱ tsꞌén kjindibáni Isaa̱.

²⁰ Yichán noó Isaa̱ nga kisꞌijñajo̱ na̱ Rebekaa̱, kui xi tsa̱kji̱ín Betuee̱l, ndichja Labaa̱n kui xi xota̱ Araa̱n xi kisꞌińdo Pandaa̱n-Araa̱n.

²¹ Na̱ Rebekaa̱ ndi̱ kamá, kuíni nga Isaa̱ tsíchji̱a̱a̱ Néná nga tsíchji̱a̱tjé chjo̱ón. Kósꞌe̱ Néná katsꞌénseén ni xi tsíꞌá Isaa̱, kó tsaꞌa ndí na̱ Rebekaa̱.

²² Kó kamákjiín na̱ Rebekaa̱ nga ꞌni̱o̱ kamá ndí xí yaꞌa, ngatꞌa̱ kui jákjíndií askjan ngi̱ya nga̱tsꞌo̱a̱, kó bi̱ katsó: «Ji Ne, míkjo̱a̱a̱ nga bi̱ kjiꞌi ni xi kjimana».

²³ Kó Néná bi̱ katsoó: «Nga jó ndíi̱, jó na̱xi̱ńdá ndyi̱bokó. Kuí boá xi jó na̱xi̱ńdá kamá ndeskande ngindiee̱ nga stse̱n. Ngo xi ꞌniú ka̱ma, kó ngo xi inda ka̱ma, ta̱nga kui xi xchá ngi̱chí ka̱maa̱, kuí boá xi sa̱ꞌínseén xi kjindí ngasee̱».

²⁴ Ngije jachó ni̱xtjin nga stse̱n ndií na̱ Rebekaa̱,

²⁵ kamábe nga xi tjón katsee̱n iní kamá tji̱xin yojoo̱, kó achichí tsja̱xò kamá ngayeje yojoo̱, kuíni nga Esau̱ ítꞌajaꞌén.

²⁶ Jaskan katsen ntsꞌi̱e̱ Esauu̱, kó Jakoo̱b ikítꞌa jaꞌén, ngatꞌa̱ kjiꞌiꞌniú chikín chikiín tji̱ngi̱ se Esauu̱. Ichítié ko̱jo tie noó Isaa̱ nga katsꞌén ndí ꞌni̱o̱o̱ na̱ Rebekaa̱.

^27-28 Kó kamáxchá kuí jákjíndií, kó Esauu̱ ngo nda̱ xi tsꞌenkꞌién cho̱ kamá, ko̱jo xá jno̱ katsꞌén, kuíni nga Isaa̱ ꞌniú tjó ngase kamaá Esauu̱. Kó Jakoo̱b achichí xió kistsoꞌbá, kó ki̱a̱ kisꞌijña ndiꞌaa̱, kuíni nga na̱ Rebekaa̱ tjó ngase kamaá Jakoo̱b ta̱bo̱a̱jiín Esauu̱.

²⁹ Ngo ndi̱yà Jakoo̱b katsꞌénda ngo nichinie, kjiꞌá má jachó Esauu̱ nga kjindibáni ngi̱jin jno̱o̱, kó achichí bojó kamaá,

³⁰ kó bi̱ katsó nga askjandáyaá Jakoo̱b: —¡Jè kjiꞌme bojó an! ¡ꞌNiú míꞌaá te̱ꞌéchiíní nichinie iní xi kiniꞌínchjén ji! Kuíni nga Esauu̱ ti̱ Endo̱n kiꞌmií nga.

³¹ Kó Jakoo̱b, bi̱ katsoó: —Te̱ꞌéní kjo̱a̱nda xi tjiín nga ji xi ndí tjón ji, kó ka̱ma tsjaa nichinie xi katsꞌenda an.

³² Kó Esauu̱ bi̱ katsó: —¡Tsja tji̱ꞌni̱u̱ú kui kjo̱a̱ndaa̱ ngotꞌe̱, ngatꞌa̱ jè kjiꞌme bojó an!

³³ Kó Jakoo̱b ꞌniú tsíꞌaá nga bi̱ katsoó: —Ngiboanéná tꞌín ji nga an si̱ꞌinkꞌasꞌínní kjo̱a̱nda xi tjiín nga ndí tjón ji. Kó ngiboanéná, katsó Esauu̱,

³⁴ kó Jakoo̱b katsjaá Esauu̱ pan ko̱jo sopa̱ tsi̱ꞌe̱ lenteja̱ xi katsꞌénda, kó iskjinie ko̱jo katsꞌe, jastjíe̱n, sꞌe̱ kijí. Kó bo̱a̱ tsꞌén Esauu̱ katsꞌénchjíjínnii̱ kjo̱a̱nda xi tjiín nga kui xi ndí tjón kamá katsaki.