Énkjínkón 10 - Xo̱jo̱n eén Néná

Én xí tsíchji̱a̱ nda̱ kjínkón Salomoo̱

¹ Én xí tsíchji̱a̱ nda̱ kjínkón Salomoo̱. Ngo ndí xí kjínkón, achichí kjo̱a̱tsja tsjaá na̱ꞌmii̱, ta̱nga ngo ndí xí kitikjo̱a̱a̱, achichí kjo̱a̱ndasen tsjaá na̱aa̱n.

² Nde ndajíntsꞌèn si̱ꞌankjién ngo kjo̱a̱cho̱n xi ndajíntsꞌèn kasako, ta̱nga ni xi kixi̱i̱ boá xi kꞌo̱xiéꞌáná ngi̱ya tsja kjo̱a̱bo̱yaa̱.

³ Néná tsjandièjín nga kjindiá foaꞌa xota̱ xi kixi̱i̱, ti̱nde tsjandièjiín nga sa̱ꞌínkjatjosón ni ndajín xi mejeén sa̱ꞌín xota̱ xi ꞌniú ndajiín.

⁴ Tsi si̱ꞌinxéjín ji, ni̱ma̱ tsꞌén ku̱i̱ndyin ji, kó tsi ꞌniú si̱ꞌinxé jí, ka̱macho̱n ji.

⁵ Xota̱ xi maxchaá nichinie cho̱ndoboá ꞌniuú, kuí boá xi ndatsꞌèn tsꞌénkjó, ta̱nga xota̱ xi fofé kjiꞌanga je jachó cha̱a̱n ni xi ꞌbítji̱e̱e̱, achichí kjo̱a̱soboá kjo̱a̱ꞌa.

⁶ Néná tsꞌénchíkonñé ini̱ma̱a̱ xota̱ xi kixi̱i̱, ta̱nga tsꞌoa xota̱ xi ndajiín boá nínga fotjonii̱ kjo̱a̱xchán.

⁷ Kjo̱a̱niꞌánchikonñé boá kjiꞌanga niꞌánkjaꞌátsjien xota̱ xi kixi̱i̱, ta̱nga jaꞌeén xota̱ xi ꞌniú ndajiín, niꞌánchꞌó.

⁸ Ini̱ma̱a̱ xota̱ xi kjínkoón tsꞌénkjátjosón kjo̱a̱botíxomaa̱, ta̱nga tsꞌoa xota̱ xi kitikjo̱a̱a̱, kuí boá xi tsꞌénchájá.

⁹ Xota̱ xi kixi̱i̱, achichí kjo̱a̱xió ꞌbeé, ta̱nga xota̱ xi tsoꞌbá ndi̱yà xí ndajiín, kjo̱chó ni̱xtjin nga sa̱ꞌínchaja yojoo̱.

¹⁰ Xota̱ xi ꞌbichjándsóná ndyi̱ko̱n kjo̱a̱ndasen boá xi mongase, kó tsꞌoa xota̱ xi kitikjo̱a̱a̱, kuí boá xi tsꞌénchájá.

¹¹ Tsꞌoa xota̱ xi kixi̱i̱, ki̱a̱ fotjonii̱ én xí tsjá kjo̱a̱mindyioo̱n, ta̱nga tsꞌoa xota̱ xi ndajiín boá nínga fotjonii̱ kjo̱a̱xchán.

¹² Kjo̱a̱niꞌánchꞌoó kjo̱a̱xchán foeꞌejo̱, ta̱nga kjo̱a̱niꞌántjoó ngayeje nii̱ xi tsꞌénjétakón.

¹³ Tsꞌoa xota̱ xi kjínkoón, kjo̱a̱kjínkón boá xi chji̱a̱, ta̱nga nga̱xto̱n xota̱ xi kitikjo̱a̱a̱, tsi̱ꞌe̱ nga kjónié yá boá.

¹⁴ Xota̱ xi kjínkoón achichí ꞌniú ma mejeén kjo̱a̱kjíntakoón, ta̱nga nga chji̱a̱ xota̱ xi kitikjo̱a̱a̱, jè tikónndaa̱ ni xi ndajiín.

¹⁵ Xota̱ xi cho̱o̱n tsꞌénkjó nga kjo̱a̱cho̱o̱n, kuí boá xi ngo na̱xi̱ńdáꞌniú xí xó tjíchjáꞌyáni, ta̱nga xota̱ xi ni̱ma̱a̱ kjo̱a̱ni̱ma̱a̱ boá xi tsꞌenkjié.

¹⁶ Kjo̱a̱mindyioo̱n boá xi tsꞌén xota̱ xi kixi̱i̱, ta̱nga jeé boá xi tsꞌén xota̱ xi ꞌniú ndajiín.

¹⁷ Xota̱ xi tsꞌénjóꞌo nga niꞌánchji̱ni̱e̱e̱, kuí boá xi tsie ngase ka̱maa̱ nga kꞌuijñá nga̱sondie, ta̱nga xota̱ xi chꞌoo̱ nga niꞌánchji̱ni̱e̱e̱, nde kjinjín kjo̱chó.

¹⁸ Xota̱ ndiso boá xi ꞌbíꞌmá nga tjín xí chꞌoo̱, kó xi tsꞌéntsójó kjo̱a̱ndisoo̱, xota̱ xi kitikjo̱a̱ boá.

¹⁹ Xota̱ xi tsie chji̱a̱a̱, tsꞌénjé boá, ta̱nga xi bóxioó tsꞌoa, xota̱ kjínkón boá.

²⁰ Na̱je̱n xota̱ xi kixi̱i̱, chjírií xikoó to̱ntiboaa̱, ta̱nga ni xi tsꞌénkjó to̱ko̱ xota̱ xi ꞌniú ndajiín, jmí ni chjíjiín.

²¹ Eén xota̱ xi kixi̱i̱, achichí xota̱ bosikójo, ta̱nga xota̱ xi kitikjo̱a̱a̱ fesón, ngatꞌa̱ tsꞌénkjójín ni xi tsꞌén.

²² Kjo̱a̱niꞌánchikonñeé Néná, kjo̱a̱cho̱n boá, kó jmí kjo̱a̱ndasenjiín.

²³ Xota̱ xi kitikjo̱a̱a̱, achichí tsjá maá nga tsꞌén ni xi ndajín, ta̱nga xota̱ xi kjínkoón, achichí tsjá maá kjo̱a̱a̱ kjo̱a̱kjíntakoón.

²⁴ Ni xi tsakjón nga ka̱maa̱ xota̱ xi ndajiín, kuí boá ni xi ka̱maa̱, kó ni nda xi mejeén nga ka̱maa̱ xota̱ xi kixi̱i̱, kuí boá ni xi kjo̱tjosoón.

²⁵ Kjiꞌanga foaꞌa ngo tjo̱ꞌniú, chaja xota̱ xi ndajiín, ta̱nga ngatsjéni̱xtjin nga kꞌuijñá xota̱ xi kixi̱i̱.

²⁶ Ngo nda̱ xi tsiꞌé, xikónií ni xi tsꞌénná bino̱ san xi mindyiaa̱ ńꞌniú, ko̱jo tsi ṉdi̱ xi fíngí ndyikón.

²⁷ Xota̱ xi bendikón Néná, achichí kjín nó ka̱maa̱, ta̱nga xota̱ xi ꞌniú ndajiín, nde tsiejín ka̱maa̱ nga kꞌuíndo nga̱sondie.

²⁸ Xota̱ xi kixi̱i̱, ndyi̱koyaa̱ nga tsja tsꞌén kꞌuíndo, ta̱nga xota̱ xi ꞌniú ndajiín, kjo̱a̱ndasen boá xi kjo̱a̱chiyaá.

²⁹ Néná boá xi tsjangaꞌniuú ndi̱ya̱à xota̱ xi kixi̱i̱, ta̱nga tsꞌenkjié boá xota̱ xi tsꞌén ni xi ndajín.

³⁰ Xota̱ xi kixi̱i̱ ngatsjéni̱xtjin nga nda ka̱ma ni xi sa̱ꞌín, ta̱nga xota̱ xi ꞌniú ndajiín kꞌi̱e̱jín kꞌuíndo kui nga̱sondiee̱.

³¹ Tsꞌoa xota̱ xi kixi̱i̱ ngatsjéni̱xtjin nga én xí kjínkón ku̱i̱chji̱a̱, ta̱nga xota̱ xi ꞌniú ndajiín, ku̱i̱chá na̱je̱n.

³² Tsꞌoa xota̱ xi kixi̱i̱, ni xi tsjatsó boá chji̱a̱, ta̱nga tsꞌoa xota̱ xi ꞌniú ndajiín, én chꞌo tsó boá xi chji̱a̱.