Éksondo̱ 6 - Xo̱jo̱n eén Néná

^1-2 Kó Néná bi̱ katsoó Moisee̱: —Ngotꞌe̱ má xchi̱e̱ ji nga achichí ꞌniú sa̱ꞌinjée̱ nda̱ ree̱ nangi Ejiptoo̱, kó ngaskande ti̱ kuii̱ ku̱i̱ꞌájnú nga kjo̱tjojnú kui na̱xi̱ńdaá. Án boá xi Ne tse̱.

³ Xota̱ xi xcháa̱, Ne xi tjiín ngayeje ngaꞌniuú katsóna, ta̱nga kamábejín kó ꞌmí jaꞌén ja̱koxi̱na, kó kuí bí xi̱ꞌbi̱: AN XI AA̱N.

⁴ Án boá xi katsóyàtjóo̱n nga tsjàa̱ nangi Kanaa̱n, ki̱a̱ nínga kisꞌińdo xikoó xota̱ xi xín nangi chji̱a̱ni,

⁵ kó ngotꞌe̱ ꞌne̱ nga jè tsintꞌie an kjo̱a̱ni̱ma̱ xi ndyi̱foaꞌatio xota̱ Israee̱l, kó ta̱ngatꞌanii̱ ni xi ndajín xi ndyi̱tsꞌènjo̱ xota̱ Ejiptoo̱ nga je jaꞌátsjienna ni xi indajo̱ an xota̱ na̱xi̱ńdána.

^6-8 »Kó kuíni nga tꞌen ji, kó bi̱ tꞌíi̱n xota̱ Israee̱l nga án boá xi Nee̱ an, kó nga án boá xi kꞌoxié an nangi Ejipto̱, kó nga án boá xi sa̱ꞌin an nga sa̱ꞌínkjaꞌyá kjo̱a̱a̱ xá é xí ndyi̱tsꞌèn. Án boá xi kjuínjo̱ an nangi xi kixiáa̱n nga tsjàa̱ Abraa̱n, Isaa̱ ko̱jo Jakoo̱b, kó nga jún tsa̱jún ka̱ma ngotꞌe̱ ꞌne̱. Kó bo̱a̱ tsꞌén xcha̱jnú nga án boá xi katsꞌendéjnúꞌun kjo̱a̱a̱ nga mosoo̱ xota̱ Ejiptoo̱ kamájnú, jún boá xi xota̱ na̱xi̱ńdána ka̱ma, kó án boá xi Nejnú ka̱ma an. Ta̱nga xota̱ Ejiptoo̱ achichí ꞌniú kotijée̱ nga sa̱ꞌinkjièn án ngaꞌniúna. Ngayeje kui nii̱ xi sa̱ꞌin an, ngatꞌa̱ án boá xi Nejnú má an.

⁹ Kó Moisee̱ katsóyaà xota̱ Israee̱l ngayeje ni xi katsoó Néná, ta̱nga kui xotaa̱ nde tsintꞌiéjiín Moisee̱ ta̱ngatꞌanii̱ nga achichí jè jenda kjo̱a̱a̱ nga ꞌniú kiniꞌaán xá xi katsꞌén nga moso̱ kamá.

¹⁰ Kósꞌe̱ Néná bi̱ katsoó Moisee̱:

¹¹ —Tꞌen ji kó bo̱a̱ tꞌíi̱n nda̱ ree̱ nangi Ejipto̱ tsi̱ꞌe̱ nga tsja̱ndieè xota̱ Israee̱l nga kjo̱tjo kui nangii̱.

¹² Kó Moisee̱ bi̱ katsoó Néná: —Xi ngaskande nde xota̱ Israee̱l katsꞌénjínna xki̱, akja̱ꞌmíra̱ nda̱ ree̱. Kó ngase nga stingí stiyá najén án nga chji̱a̱ an.

¹³ Kósꞌe̱ Néná atíxoma cha̱n cha̱a̱n Moisee̱ ko̱jo Aaroo̱n kjo̱a̱a̱ kótsꞌèn ku̱i̱chji̱a̱jo nda̱ ree̱, ko̱jo kótsꞌèn kꞌo̱xié xota̱ Israee̱l ki̱a̱ nangi Ejipto̱.

Xota̱ Israee̱l

¹⁴ Kuí bí xi̱ꞌbi̱ xi ngito̱ko̱o̱ xota̱ Israee̱l: Xota̱ xi chji̱a̱ni xota̱ tji̱e̱e̱ Rubee̱n, kuí bí xi̱ꞌbi̱: Anoo̱k, Faluu̱, Esroo̱n, ko̱jo Karmii̱.

¹⁵ Xota̱ xi chji̱a̱ni xota̱ tji̱e̱e̱ Simeoo̱n, kuí bí xi̱ꞌbi̱: Jemuee̱l, Jamii̱n, Oaa̱d, Jakii̱n, Soaa̱r, ko̱jo Sauu̱l, ndií na̱ xi chji̱a̱ni nangi Kanaa̱n.

^16-27 Xota̱ xi chji̱a̱ni xota̱ tji̱e̱e̱ Lebii̱, Kuí bí xi̱ꞌbi̱: Ngersoo̱n, Koaa̱t, ko̱jo Merarii̱. Kuí bí xi̱ꞌbi̱ xi ndií Ngersoo̱n: Libnii̱, ko̱jo Simii̱. Kuí bí xi̱ꞌbi̱ xi ndií Koaa̱t: Amraa̱n, Isaa̱r, Ebroo̱n, ko̱jo Usiee̱l. Kuí bí xi̱ꞌbi̱ xi ndií Merarii̱: Majlii̱, ko̱jo Musii̱. Kuí bí xi̱ꞌbi̱ xi ndií Amraa̱n ko̱jo na̱ Jokabee̱nd: Aaroo̱n, ko̱jo Moisee̱. Kuí bí xi̱ꞌbi̱ xi ndií Isaa̱r: Koree̱, Nefee̱j, ko̱jo Sikrii̱. Kuí bí xi̱ꞌbi̱ xi ndií Usiee̱l: Misaee̱l, Elsafaa̱n, ko̱jo Sitrii̱. Kó kuí bí xi̱ꞌbi̱ xi ndií Aaroo̱n ko̱jo na̱ Elisebaa̱: Nandaa̱b, Abiuu̱, Itamaa̱r, ko̱jo Eleasaa̱. Kuí bí xi̱ꞌbi̱ xi ndií Koree̱: Asii̱r, Elkanaa̱, ko̱jo Abiasaa̱f. Lebii̱ úchán ko̱jo kantjiꞌún jó nó kamaá nga kisꞌijña nga̱sondie. Kó Amraa̱n ti̱ úchán ko̱jo kantjiꞌún jó nó kamaá nga kisꞌijña nga̱sondie nga. Kó ndií Amraa̱n kui xi ꞌmí Aaroo̱n ko̱jo Moisee̱, kuí boá xi Néná má xi atíxomaa̱ tsi̱ꞌe̱ nga ku̱i̱chji̱a̱jo nda̱ ree̱ nangi Ejiptoo̱, tsi̱ꞌe̱ nga kꞌo̱xié xota̱ Israee̱l kui ngi̱ndiee̱. Aaroo̱n kisꞌijñajo̱ na̱ Elisebaa̱, kui xi tsa̱kji̱ín Aminandaa̱b kamá, ndichja Naasoo̱n. Eleasaa̱ kisꞌijñajo̱ ngo tsa̱kji̱ín Futiee̱l kó ngo ndí kisꞌiee̱ kui xi Finee̱ ítꞌajaꞌén.

Bi̱ tsꞌén tsíchji̱a̱jo Néná Moisee̱ ki̱a̱ nangi Ejipto̱

²⁸ Ni̱xtjin nga Néná tsíchji̱a̱jo Moisee̱ ki̱a̱ nangi Ejipto̱,

²⁹ bi̱ katsoó: —Án boá xi Nèe̱ an, tꞌen ji kó bo̱a̱ tꞌíi̱n nda̱ ree̱ nangi Ejipto̱ ngayeje ni xi xiyaá ji.

³⁰ Ta̱nga Moisee̱ bi̱ katsoó Néná: —Sa̱ꞌínsénjínna nda̱ ree̱ nangi Ejipto̱, ngatꞌa̱ stingí stiyá najén án nga chjiá an.