Éksondo̱ 36 - Xo̱jo̱n eén Néná

¹ »Kuíni nga Besalee̱l ko̱jo Ooliaa̱b ko̱jo ngayeje já xí tsꞌénda ni tsjakon ki̱a̱ Israee̱l, kuí xí sa̱ꞌínda ngayeje nii̱ xikó má tsꞌén atíxoma Néná nga ka̱manda. Ti̱ bo̱a̱ ti̱ sa̱ꞌín ngayeje xota̱ xi Néná je katsjaá kjo̱a̱kjínkón ko̱jo kjo̱a̱kjíntakón, tsi̱ꞌe̱ nga sa̱ꞌínda ngayeje ni xi ka̱machjién kjiꞌanga si̱ꞌandikón Néná ki̱a̱ ndiꞌandikoón».

Tsꞌatio kjo̱a̱tjó jachójo̱ xota̱ na̱xi̱ńdaá

^2-3 Kó Moisee̱ kamátikójo̱ ngayeje já xí tsꞌénda ni tsjakoo̱n, kó katsjaá kjo̱a̱tjó xi katsꞌénkꞌasꞌien xota̱ na̱xi̱ńdaá. Kó kui jaá ítsꞌi̱yanii̱ nga katsꞌénda ngayeje ni xi machjién nga niꞌándikón Néná ki̱a̱ ndiꞌandikoón. Kó xota̱ Israee̱l ndyiojón ndyiojón jachójo̱ kjo̱a̱tjó xi ngayejení ini̱ma̱a̱ nga katsꞌénkꞌasꞌiee̱n kui jaá.

^4-5 Kó kjiꞌanga kui já xí tsꞌénda ni tsjakoo̱n, kamábe nga xotaa̱ tsꞌatio ngase kjo̱a̱tjó jachójo̱ ta̱bo̱a̱jiín xikó kjiꞌi kamáchjieén, katsóyaà Moisee̱ kui nii̱.

⁶ Kósꞌe̱ Moisee̱ katsangiyaa̱ én ngayeje xota̱ xi síndo ki̱a̱ ndiꞌaa̱, nga ngiti̱ sa̱ꞌínxájín ngase tsi̱ꞌe̱ nga kjo̱jo ngase kjo̱a̱tjó tsi̱ꞌe̱ ndiꞌandikoón. Bo̱a̱ tsꞌén nga xota̱ Israee̱l ngiti̱ kijíjo̱jín ngase kjo̱a̱tjó,

⁷ ngatꞌa̱ jmí tsi ta̱ bo̱a̱ tsí kjiꞌi ni xi jachójo̱ xikó kjiꞌi ka̱manii̱ nga ka̱manda ndiꞌandikoón, ngaskande tsꞌangi ngase kui nii̱.

Nga kamánda ndiꞌandikoón

^8-13 Kó ngayeje kui já xí ꞌniú maá tsꞌénda ni tsjakoo̱n, katsꞌénda ndiꞌandikoón nga íjñaá tie ńjño kortina̱, nínga katsꞌén ngo chji̱ni̱e̱ xi jó keruu̱b ítꞌaa̱.

^14-19 Besalee̱l iskjíbé tsja̱a̱ tindso̱ chjo̱on, kó kuí katsꞌéndani tiengo ńjño tie xi kiniꞌándani nga jó ńjño kortina̱ xi akjaꞌma nkꞌaa̱ ndiꞌandikoón, kó ti̱ katsꞌénda ńjño xi tji̱xi̱ín cho̱tsa̱nga̱ xi jaꞌatji ndi̱ja̱a̱ xi akjastsani ndiꞌandikoón, sꞌe̱ nga̱soón kui ńjño tji̱xi̱ín ikꞌíjñaá ingo ńjño xi ta̱soboá tji̱xin xí nda kiniꞌándani.

^20-38 Ti̱ Besalee̱l íjñanda ngayeje ni xi kijíjo̱ nga kamánda ndiꞌandikoón xikoó: Yátiee̱, ngindiee̱, yáxtioó, ni ńtsoó ko̱jo yáseé. Kó ti̱ kui katsꞌénda ńjño kortina̱ xi ikꞌíchjakjáꞌyáni ngi̱ndie ndikoón ko̱jo ngi̱ndie nínga ꞌniú ndikoón, kui ńjño xi jó keruu̱b akjatꞌaa̱ xi chji̱ni̱e̱ kamáni. Kó ti̱ Besalee̱l katsꞌénda ńjño kortina̱ xi kitsjien nínga bitjasꞌi̱e̱nnii̱ ndiꞌandikoón, kó ki̱a̱ katsꞌénkaꞌani yáseé.