Éksondo̱ 27 - Xo̱jo̱n eén Néná

Ṉchandikón nínga ikꞌítí kjo̱a̱tjoó

¹ »Ti̱ mejénna nga si̱ꞌinde ji ngo ṉchandikón xí yáꞌakasia̱. Ngo chi̱bo̱a̱ ti̱ꞌin ji nga nijón ndieè, jó metro̱ ko̱jo kan ún sentímetro̱ ti̱ꞌin ji nga ndojoó ko̱jo nga tiyá kó ngo metro̱ ko̱jo kan ún sentímetro̱ ti̱ꞌin ji nga nkꞌaa̱.

² Nga ngo nga ngo nijon kui ṉchaa̱n ngo ni xi ja̱kjiꞌi ndi̱ja̱ kjiꞌi tꞌíjñíi̱. Ngayeje kui ṉchaa̱n chjiéngá ki̱cha̱ bronse̱ tjajin, kó ta̱ ngo ndo̱jò ngatama ngayejee̱.

³ »Kó ti̱ mejénna nga ki̱cha̱ bronse̱ si̱ꞌindeni ji ngayeje ni xi ka̱machjiénsón nga̱són ṉchandikoón xikoó: ni xi xi̱ndyiá ndisoo̱, ki̱cha̱chꞌa̱a̱, ndástsieé, ki̱cha̱yojoó, ko̱jo ki̱cha̱ xi chjábéjo̱ni ndiꞌií.

^4-5 Ti̱ ti̱ꞌinde ji ngo ki̱cha̱ xi ngo chi̱bo̱a̱ nga ndojoó ko̱jo nga tiyaá xi kꞌuíndoo̱ ki̱cha̱ xi foxtikjaá xi bronse̱ ngatamandani, xi tꞌíjñí ji ngamasiee̱n nga nkꞌaa̱ kui ṉchandikoón, kó ti̱ ti̱ꞌinde ji ngo ni ńtsó xí ki̱cha̱ bronse̱, kó ki̱a̱ tꞌíjñíi̱ ngo nga ngo nijon,

^6-7 ko̱jo jó yá ndojó xi yáꞌakasia̱, kui yaá ki̱a̱ kjoyá ngi̱yaa̱ kui ni ńtsó xi tsi̱ꞌe̱ ki̱cha̱ xi síndoo̱ ki̱cha̱ xi foxtikjaá, tsi̱ꞌe̱ nga ka̱ma xi̱nkꞌa. Kó kui yaá bronse̱ tjajin.

⁸ »Chjiéngá ti̱xa̱nga̱ ka̱ma kui ṉchaa̱n, kó yá ti̱ꞌindeni ji, bo̱a̱ má ngatꞌié xikó ma kjiꞌi xi akoo ki̱a̱ na̱xi̱i̱.

Ndi̱tsee̱n ndiꞌandikoón

^9-19 »Nga ngo foaꞌatjiyajoo̱n ndiꞌandikoón mejénna nga ngo ndi̱tsen kꞌuijñíi̱ xi ńjño kortina̱ kꞌuíchjáꞌyáni. Xtji̱e̱e̱n ta̱ꞌin ko̱jo xtji̱e̱e̱n nangii̱ kui ndi̱tsee̱n chjiéngá yichán ún metro̱ nga ndojoó ka̱ma, kó nga ngo kui nga̱ndee̱ kan yásé kꞌuíndoo̱, kó nga ngo nga ngo kui yáseé ngatꞌíndoo̱ ngindie. Kó nga tiyaá kui ndi̱tsee̱n xtji̱e̱e̱n nínga fotjo ko̱jo xtji̱e̱e̱n nínga ꞌbosꞌien tsꞌueé chjiéngá kan jó metro̱ masien ka̱ma. Ki̱a̱ xtji̱e̱e̱n nínga ꞌbosꞌien tsꞌueé, ki̱a̱ nínga nga̱xto̱n nínga fetꞌaa̱ ndiꞌandikoón chjiéngá tie yásé kꞌuíndoo̱, kó ngi jun yásé kꞌuíndoo̱ xtji̱e̱e̱n nínga fotjo tsꞌueé, ján ján kꞌuíndo nínga bitjasꞌi̱e̱nni kui nga̱ndee̱. Kó nga ngo nga ngo kui yáseé ngatꞌieé ngo ngindie. »Ngayeje ndi̱tsee̱n chjiéngá ńjño kortina̱ xi lino̱ xi ꞌniú nda kꞌuíchjáꞌyáni, kó jó metro̱ ko̱jo kan ún sentímetro̱ nga nkꞌa ka̱ma. Kó xtji̱e̱e̱n kje̱n kui ngi̱ndiee̱ yito metro̱ ńjño kortina̱ tꞌíjñíi̱ nga ngo nga ngo ndiè nínga bitjasꞌi̱e̱nni. Sꞌe̱ ki̱a̱ nínga bitjasꞌi̱e̱nni nijan metro̱ kortina̱ xi ńjño xi linoo̱ xi ꞌniú nda, ko̱jo ńjño xi koán, ko̱jo ńjño xi aso, ko̱jo ńjño xi iní tꞌíndée̱. Kui kortinaa̱ chjiéngá nda si̱ꞌan chji̱ni̱e̱ xi kꞌuijñaá, kó ki̱a̱ si̱ꞌankaꞌajo̱ nga nijón kui yáseé ko̱jo ngindiee̱. »Ngayeje yáseé chjiéngá kꞌuijñaá ni ńtsó ko̱jo ki̱cha̱tji̱ xi to̱ntiboa. Ngindiee̱ kui yáseé chjiéngá ki̱cha̱ bronse̱ ngatama, ko̱jo ki̱cha̱ xi ku̱i̱ndyianijín xi si̱ꞌankaꞌa ńjñoo̱ kui ndiꞌandikoón, ko̱jo ni xi kꞌuíchjáꞌyáni ndi̱tsee̱n ko̱jo ngayeje ni xi ka̱machjién kjiꞌanga si̱ꞌantsjaa̱ Néná.

Isti̱ xi ku̱i̱ndyiaa̱ ndiꞌí xí tsꞌentsíjee̱n

^20-21 »Ndiꞌí xí tsꞌentsíjee̱n ngi̱ndie ndikoón, kui xi síndo ki̱a̱ ndiꞌandikoón kje̱n nínga tikón koxa̱a̱ kjo̱a̱ꞌbíndaa̱, chjiéngá nga ni̱xtjin nga ni̱xtji̱e̱n ku̱i̱ti̱. Kó Aaroo̱n ko̱jo xota̱ tji̱e̱e̱ boá xi skondá kui nii̱, ta̱nga ji tatíxomée̱ xota̱ Israee̱l nga ngatjeꞌejo̱ istii̱ toꞌolibo̱ xi kui soboá soboaá tsi̱ꞌe̱ nga ngatsjéni̱xtjin ku̱i̱ti̱ kui ndiꞌií. Kjo̱a̱kiti boá kui nii̱ kó chjiéngá sa̱ꞌínkjatjosón xota̱ Israee̱l ngatsjéni̱xtjin.