Éksondo̱ 15 - Xo̱jo̱n eén Néná

Só xi nda nga kiniꞌán ngo kjo̱a̱xchán

¹ Kósꞌe̱ Moisee̱ ko̱jo xota̱ Israee̱l kisie kui soó nganda tsi̱ꞌe̱ Néná: «An sie an ngo só nganda tsi̱ꞌe̱ Néná, ngatꞌa̱ kuí boá xi katsꞌeén kondraa̱. ¡Ki̱a̱ tsꞌajmijin ngi̱jin ndáchíkoón ndi̱je̱e̱ ko̱jo xota̱ xi síndosoón!

² »Án boá xi tsꞌénsiée̱ kui soó Néná, ngatꞌa̱ kuí boá xi tsjána ngaꞌniú ko̱jo xi ꞌboxiéꞌána. Kuí boá xi Néna, kuíni nga an tsꞌéntsjàa̱. Kuí boá xi Nee̱ na̱ꞌmina, kuíni nga an tsꞌentjó an.

³ »¡Néna kuí boá xi Nee̱ xota̱ Israee̱l! ¡Néna kuí boá xi ꞌniú maá kján!

⁴ Ki̱a̱ tsꞌajmijin ngi̱jin ndáchíkoón karretaa̱ xota̱ Ejiptoo̱, ¡ko̱jo ngayeje jájuún nda̱ ree̱! ¡Néna ki̱a̱ katsꞌénkꞌién ngándá ngi̱jin Ndáchíkón Inií kui já xí ngito̱ko̱ nda kamá ki̱a̱ nangi Ejiptoo̱!

⁵ ¡Ngayejee̱ nga kijíngandá xikoó ndi̱jo̱, kó ixó ngaskande nínga ꞌniú na̱nga̱a̱ ndáchíkoón!

⁶ »Ne tsa̱ꞌa̱n, ngaꞌniúu̱ boá xi kiniꞌínkjín jí nga kiniꞌínkjié ji kondràa̱,

⁷ ngaꞌniú boá xi tsꞌatójó kui xotaa̱, kó nga kiniꞌínxchín jí, ikꞌítí ji xikoó xka̱ kixií.

⁸ Nga akjatsiée̱ ndáfoaa̱ ndáchíkoón tsakjanga, kó ngindiee̱ nínga ꞌniú na̱nga̱a̱ ndáchíkoón, ndáfoaa̱ ngiti̱ katsꞌéntíyájín, kó jó nga̱nde xi xikoó tsi xó kisꞌijña nga jó tjín kamá.

⁹ »Kondra̱ná bi̱ tsꞌén katsꞌénkjó: “¡Tjiantji̱ngìi̱! ¡Kó ngije kjóchotji̱ngìi̱! ¡Si̱ꞌankjie kuí xotaa̱! ¡Chje̱ꞌéxíi̱n ngayeje ni xi tjiín, kó ñá si̱ꞌankabisóo̱n xingi̱ kuí nii̱!”

¹⁰ Ta̱nga ji ꞌniú akjatsie ji, kó kiniꞌínkjíngándé jí ki̱a̱ ndáchíkoón. ¡Ngi̱jii̱n kui ndáfoa xi tjiín ngaꞌniuú ki̱a̱ kijíngandá xikoó chiꞌisá!

¹¹ »Ne tsa̱ꞌa̱n, ¡jmíjín ingo Ne xi xikoó ji! ¡Ta̱ jí tsí xi je ji! ¡Ta̱ jí tsí xi tjiín ngaꞌniú! Achichí kjo̱a̱ndikón xí yiꞌi kiniꞌín ji, jí boá xi niꞌín ji ni xi fíndikónná.

¹² Kiniꞌínkjín jí ngaꞌniú jèe̱, kó tꞌanangii̱ katjéjén xota̱ Ejiptoo̱.

¹³ »Achichí ꞌniú tjoó xota̱ na̱xi̱ńdáa̱, nga ngaꞌniúu̱ boá xi kaꞌnaxiéꞌéní ji, kó ngotꞌe̱ ꞌne̱, jí boá xi tińtje̱tjée̱n ki̱a̱ ngi̱ndie nínga mejeén nga ki̱a̱ ku̱i̱ndyin ji.

^14-15 Kjiꞌanga sku̱i̱e̱ xota̱ Filisteaa̱, achichí nda̱ ka̱maa̱, kó ngito̱ko̱o̱ xota̱ tji̱e̱e̱ Endoo̱n ko̱jo xota̱ Kanaa̱n, ku̱i̱ꞌítsꞌi̱yani nga kjo̱tsiè má nga stsa̱kjonní.

¹⁶ ¡Ngayeje kui xotaa̱, nga nda̱ ka̱maa̱ kó ꞌniú stsa̱kjonní! »Ne tsa̱ꞌa̱n, nga sku̱i̱e̱ ngaꞌniúu̱ achichí stsa̱kjonní, ¡kó nde ngiti̱ sa̱ꞌíntíyájín xikoó ndi̱jo̱o̱, ngaskande nga kjo̱a̱ꞌa xota̱ na̱xi̱ńdáa̱!

¹⁷ Ne tsa̱ꞌa̱n, jí boá xi kꞌuínje̱jne̱ na̱xi̱ xi ji kachjeꞌéjin ji xi tse̱ ka̱ma, kó ki̱a̱ boá nínga si̱ꞌinkꞌíndejne̱ ngatsjéni̱xtjin. ¡Ti̱ jíní xi kiniꞌínde ji! ¡Ti̱ jíní xi ki̱a̱ ikꞌíjñinde ji ndiꞌàa̱!

¹⁸ »Ne tsa̱ꞌa̱n, jí boá xi ko̱ti̱xome ji ngotꞌe̱, ndyiojón ko̱jo ngatsjéni̱xtjin».

Só xi kisie na̱ Riyaa̱

¹⁹ Kjiꞌanga nda̱ ree̱ ko̱jo jájún ndi̱je̱e̱, ko̱jo karretaa̱ ko̱jo jájuún, tsꞌasꞌienjin ki̱a̱ ndáchíkoón nga je ndyi̱mongatji̱ngii̱ xota̱ Israee̱l, Néná íjñanda nginí ndáfoaa̱ ndáchíkoón, kó ndáfoaa̱ yíꞌmá kui jaá. Ta̱nga xota̱ Israee̱l jaꞌayise ngo ngi̱ndie xi kixí ngamasiee̱n ndáchíkoón.

²⁰ Kósꞌe̱ ndichja Aaroo̱n kui xi ꞌmí na̱ Riyaa̱ xi na̱ chji̱ni̱e̱ꞌe̱én Néná kamá, iskjíbé ngo ni xi niꞌánkjanie xi ꞌmí pandero̱, sꞌe̱ ítsꞌi̱yani nga kisie, kó ngayeje ínchjiín ti̱ bo̱a̱ ti̱ katsꞌén nga, kó ítsꞌi̱yanii̱ nga kitié.

²¹ Kó na̱ Riyaa̱ bi̱ tsꞌén ko̱ndà katsoó: «Ndajnú nganda tsi̱ꞌe̱ Néná, ngatꞌa̱ kuí boá xi je katsꞌeén kondraa̱: ¡ki̱a̱ tsꞌajmijin ngi̱jin ndáchíkoón ndi̱je̱e̱ ko̱jo xota̱ xi síndosoón!»

Bi̱ tsꞌén Néná asíkjoyá ndáfoa saa̱, ndáfoa xi nda katsꞌén

²² Kó Moisee̱ katsjaá kjo̱a̱a̱ xota̱ Israee̱l tsi̱ꞌe̱ nga kjo̱tjoni nínga tikón Ndáchíkón Inií, kó tsintꞌiéꞌén kuí xotaa̱, sꞌe̱ kijí xtji̱e̱e̱n nangi kixí xi tikón xtji̱e̱e̱n na̱ngii̱, kó ján ni̱xtjin kisꞌiṉtso̱ma nga nde chií ndáfoa kasakojiín.

²³ Ti̱chaa̱n kasakoo̱ ndáfoa, ta̱nga kui ndáfoaa̱ achichí sa kamá, kó nde kamájín katsꞌe. Kuíni nga kui ngi̱ndiee̱ Mara̱ ítꞌajaꞌén, ngatꞌa̱ «ndáfoa xi sa» tsó kui jaꞌeén,

²⁴ kósꞌe̱ xota̱ na̱xi̱ńdaá katsꞌénxchánjo̱ Moisee̱ nga bi̱ katsoó: «Kó ngotꞌe̱ ꞌne̱, mí ni xi sꞌi̱o̱ji̱n ꞌne̱.»

²⁵ Kó Moisee̱ tsíchji̱a̱a̱ Néná tsi̱ꞌe̱ nga ko̱síko̱jo. Kósꞌe̱ Néná akoó ngo yá xí tjiín xka̱, sꞌe̱ atíxomaa̱ tsi̱ꞌe̱ nga kꞌo̱jmijin kui yaá ki̱a̱ ngi̱jin ndáfoa saa̱. Kó Moisee̱ bo̱a̱ katsꞌén, kó ti̱ kjiꞌa kui ndáfoaa̱, ndáfoa nda kamá. Kó ki̱a̱ boá nínga Néná askotꞌayákón xota̱ Israee̱l, kó ti̱ ki̱a̱ boá nínga katsjaá kjo̱a̱botíxoma kjo̱a̱a̱ xikótsꞌèn kꞌuíndo.

²⁶ Kó bi̱ katsoó: «Án boá xi Nejnú. Án boá xi tsꞌendayajnúꞌun. Tsi jún nda ko̱si̱e̱nnijónjnúꞌun, kó tsi si̱ꞌankjatjosónjnúꞌun kui kjo̱a̱botíxomaa̱ ko̱jo kui kjo̱a̱kiti xi tsꞌéntsjájnúꞌun ngotꞌe̱, kó tsi ta̱soboá ni xi ndaa̱ xi si̱ꞌánjnú, sa̱ꞌinjéjínjnúꞌun xikó katsꞌenjo̱ an xota̱ Ejiptoo̱».

²⁷ Jaskan ngije kamá kui nii̱, xota̱ Israee̱l kijí nangi Elii̱n, kó ki̱a̱ katsꞌénkjaꞌyá kui ngi̱ndiee̱ nínga síndo tiejó ndáńchꞌi̱ xi sijén má ndáfoaa̱ ko̱jo ichítié ko̱jo kan yá xka̱jèn.