2 Xota̱ Korinto̱ 8 - Xo̱jo̱n eén Néná

Bi̱ tsꞌén katsóyà Pabloo̱ nga chjiéngá chja̱ꞌásoón to̱nchji̱e̱ xota̱ na̱ngo̱xi̱ xi chji̱a̱ni Jundea̱

¹ Kó ngotꞌe̱ ꞌne̱ já ntsꞌie, mejénjne̱ nga xcha̱jnú, kótsꞌèn nga Néná katsjaá kjo̱a̱ndaa̱ xota̱ na̱ngo̱xi̱ xi síndo nangi Masendonia̱.

² Ndatsi tsie kjo̱a̱ni̱ma̱ xi jaꞌatio nga kachjatꞌayákón, ta̱nga tsjá tjiín. Kó ndatsi ꞌniú ni̱ma̱ síndo, jaꞌásón to̱nchji̱e̱e̱ xikoó tsi xota̱ xi cho̱n.

³ Án xí chistiko̱ an nga be an nga ngayeje kon nga katsjá, xikó kjiꞌi xi kamaá katsjá, kó ngaskande tsꞌatio ngase katsjá xikó kjiꞌi maa̱ tsjà.

⁴ ꞌNiú tsíꞌájne̱ tsi̱ꞌe̱ nga ko̱e̱ꞌéndièjne̱ nga tsja kꞌuieé nga ko̱síko̱jo xota̱ tsjiee̱ Néná xi síndo Jundea̱.

⁵ Kó jmí tsi xikótsꞌèn kichiyájne̱, ta̱sá tjón Néná katsꞌénkꞌasꞌiee̱n yojoo̱, sꞌe̱ jaskan katsjaá kon nga ka̱majo̱jne̱, bo̱a̱ katsꞌén xikótsꞌèn kamámejeén Néná.

⁶ Kuíni nga ꞌniú kichjiáꞌájne̱ Titoo̱ tsi̱ꞌe̱ nga sa̱ꞌíndo̱jo nga kjo̱a̱ꞌátikó kui to̱nchji̱e̱e̱ ngi̱jinjnú, xikótsꞌèn ítsꞌi̱yanii̱ nga katsꞌén kui kjo̱a̱ndaa̱.

⁷ Achichí nda niꞌánjnú ngayeje ni xi niꞌánjnú. ꞌNiú sꞌijinjnú, ꞌniú májnú ndokjo̱a̱ ni xi tsi̱ꞌe̱ Néná, ꞌniú makjínjnú eén Néná, ꞌniú bosíko̱jojnú xota̱ xi kje̱ꞌe, ko̱jo ꞌniú tjójnú ji̱n. Xikó tsꞌén ngatsjéni̱xtjin nda niꞌánjnú ni xi niꞌánjnú, bo̱a̱ ti̱ tsꞌén nda chja̱ꞌásónjnú kui to̱nchji̱e̱ xi̱ꞌbi̱ nga.

⁸ Jmí tsi bo̱a̱ tꞌíxiánjnúꞌun nga tjínjnú ngo kjo̱a̱ꞌniú nga kui nii̱ xi si̱ꞌánjnú. Ta̱sá mejénna nga xcha̱jnú ni nda xi ndyi̱tsꞌèn já ntsꞌie xi ngasee̱, kó bo̱a̱ tsꞌén ka̱ma ko̱kójnú kjo̱a̱tjó nda xi tjínjnú jún.

⁹ Ngatꞌa̱ jè yàjnú kjo̱a̱nda xi akóná Ndi̱a̱ná Jesukristoo̱, ngatꞌa̱ ta̱ngatꞌanii̱ nga tjoó jún nga ni̱ma̱ kamá kuí, ndatsi cho̱n boá. Tsi̱ꞌe̱ nga kui kjo̱a̱ni̱ma̱ xi kisꞌiee̱ kui, kamácho̱nnijnú jún.

¹⁰ Tsjajnúꞌun ngo kjo̱a̱botíxoma xi nda sa̱ꞌínjnú: Nó xí ikitjá, jún tjón ikꞌítsꞌi̱yajnúu̱ nga kachjaꞌásónjnú kui to̱nchji̱e̱e̱, ta̱nga jmí tsi ta̱ kandokjo̱a̱ tsíjnú, ikꞌítsꞌi̱yanijnúu̱ nga kiniꞌánjnú kui nii̱.

¹¹ Ngotꞌe̱ ꞌne̱ ti̱ꞌando̱jojnú ni xi je ikꞌítsꞌi̱yajnúu̱ nga kiniꞌánjnú. Xikó tsꞌén ngayeje ini̱ma̱jnú nga kamámejénjnú kiniꞌánjnú kui nii̱, bo̱a̱ tsꞌén te̱ꞌéjnú xikótsꞌèn tjisákójnú ngotꞌe̱.

¹² Ngatꞌa̱ tsi ngayeje takón nga ko̱e̱ꞌé, Néná tsja ka̱maa̱ nga ndyi̱boeꞌé ni xi ndyi̱boeꞌé, ngatꞌa̱ kui, míꞌájín ni xi jmíjínná.

¹³ Jmí tsi bo̱a̱ tꞌíxián an tsi̱ꞌe̱ nga jún kjo̱a̱ni̱ma̱ ku̱i̱tja̱tiójnú ta̱ngatꞌanii̱ nga kje̱ꞌe xi ko̱si̱ko̱jójnú, ta̱sá nga ta̱ ngo ndse̱je̱n ngatamajnú.

¹⁴ Ngotꞌe̱ ꞌne̱, jún tsie tjínjnú, kó ka̱ma ko̱si̱ko̱jójnú xota̱ xi jmíjiín, ngatꞌa̱ kje̱ꞌe ni̱xtjin, kui xotaa̱ tsie kꞌuié ngaá, kó kuí ka̱ma ko̱síko̱jongajnú jún, kó bo̱a̱ tsꞌén nga ngo ndse̱je̱n ka̱majnú.

¹⁵ Xikó tsꞌén kjitꞌa xo̱jo̱n eén Néná: “Xi tsie ni jaꞌátikó, ngiti̱ kisꞌiejín ngasee̱, kó xi chiboa jaꞌátikó, ti̱nde chiboajín ngase kisꞌiee̱.”

Bi̱ tsꞌén katsóyà Pabloo̱ ꞌyá xí ko̱e̱je̱jo to̱nchji̱e̱e̱

¹⁶ Tsjàa̱ ndokꞌóchjì Néná ngatꞌa̱ íjñajin ngi̱jin ini̱ma̱a̱ Titoo̱ nga nda̱ kjimaa̱ jún xikó kjimana an nga.

¹⁷ Ngatꞌa̱ nga ja̱koxi̱ katsꞌénjo̱ꞌo nga katsꞌénkjatjosón ni xi an tsíꞌáa̱, kó ngotꞌe̱ ꞌne̱, mejeén nga ngayeje kon nga ko̱e̱je̱katsijenjnú.

¹⁸ Kó nijan kanangiyajo̱jne̱ Titoo̱ ngo nda̱ ntsꞌié xi achichí nda ndokjo̱a̱ kjo̱a̱a̱ kui ngayeje na̱ngo̱xi̱i̱, kjo̱a̱a̱ nga ta̱nisién ndakjiꞌi xá xí katsꞌén ngandaa̱ éntjatsi̱e̱e̱ Néná.

¹⁹ Kó jmí tsi ta̱kuítsí kui nii̱, ti̱ bo̱a̱ ti̱ tsꞌén xota̱ na̱ngo̱xi̱i̱ jaꞌájin tsi̱ꞌe̱ nga nijan ko̱e̱je̱jojne̱ nga kongínjo̱jne̱ kui to̱nchji̱e̱e̱. Ndyi̱niꞌánjne̱ kui xaá ta̱ngatꞌanii̱ kjo̱a̱jee̱ Ndi̱a̱ná, kó bo̱a̱ tsꞌén nga ndyi̱bokojne̱ nga mejénjne̱ ko̱siko̱jojne̱ xotaa̱.

²⁰ Mejénjínjne̱ nga tjín xí ku̱i̱chji̱a̱ꞌonjne̱ kjo̱a̱a̱ xikótsꞌèn si̱ꞌanxájo̱jne̱ to̱nchji̱e̱ tsie xi kjimatikoó.

²¹ Kuíni nga kixi̱ kixi̱ niꞌánjne̱ ni xi ndyi̱niꞌánjne̱, jmí tsi ta̱ ngindyi̱ko̱n Ndi̱a̱ná tsí, ko̱jo ngindyi̱ko̱n xotaa̱ boá nga.

²² Kó ti̱ ki̱a̱ ndyi̱nangiyajne̱ ingo nda̱ ntsꞌié, kui xi je kjín ndi̱yà akójne̱ nga nda fíjo̱ xaá, kó ꞌniú mejeén ko̱síko̱jójnú, ngatꞌa̱ kui, jè ꞌniú maꞌniátakónjnú jún.

²³ Kó kjo̱a̱a̱ Titoo̱ mejénna xiyàjnúꞌun nga nijan tjítsꞌénxájo̱na ta̱ngatꞌaa̱ kjo̱a̱nda tsa̱jún. Kó kjo̱a̱a̱ já ntsꞌie xí ngasee̱ xota̱ na̱ngo̱xi̱i̱ xí katsangiya, kó kui jaá ti̱ ndyi̱tsja̱á kjo̱a̱je Kristoo̱ kjo̱a̱a̱ xá xí ndyi̱tsꞌèn.

²⁴ Kjiꞌanga kjo̱chókónjnú ngatamabe ngayeje xota̱ na̱ngo̱xi̱i̱ kjo̱a̱tjójnú, ko̱jo míkjo̱a̱a̱ nga tsja májne̱ kjo̱a̱a̱ jún.