2 Xota̱ Korinto̱ 7 - Xo̱jo̱n eén Néná

¹ Jún xota̱ xi tjóna, ñá tsa̱ñá ni xi katsóyàtjón Néná nga tsja̱á xota̱ xi tsi̱ꞌe̱. Kuíni nga tsjietsꞌén ku̱i̱ndyión ngindyi̱ko̱n Néná, nga xín kꞌuijñá ni xi tsꞌénndándí yojoná, ko̱jo ini̱ma̱ná. Si̱ꞌando̱jò kjin kjin kui kjo̱a̱tsjiee̱ nga xcha̱ndikón Néná.

Bi̱ tsꞌén katsóyà Pabloo̱ nga tsja kamaá kjo̱a̱a̱ ni xi jaꞌajin xota̱ na̱ngo̱xi̱ xi chji̱a̱ni na̱xi̱ńdáꞌniú Korinto̱

² Te̱ꞌéjne̱ ngo ngi̱ndie ngi̱jii̱n ini̱ma̱jnú. Kji̱e̱ ngo xota̱ xi ndajínkjiꞌi ni xi ndyi̱niꞌánjo̱jne̱. Kji̱e̱ ngo xota̱ xi ndyi̱niꞌánꞌónjne̱. Kji̱e̱ ngo xota̱ xi ndyi̱chꞌíṉcha̱jojne̱.

³ Jmí tsi kui nii̱ tꞌíxiánjnúꞌun, nga jún tsꞌénꞌbiniéjnúꞌun ngo ni, ngatꞌa̱ jè bo̱a̱ kixianjnúꞌun ngasꞌe̱, nga ngi̱jii̱n ini̱ma̱jne̱ tindyiónjnú tsi̱ꞌe̱ nga nijan ko̱yà, ko̱jo tsi nijan ku̱i̱ndyión.

⁴ Achichí kixi̱ chjiájojnúꞌun, kó achichí tsjá mana kjo̱a̱a̱ jún. Achichí ngaꞌniú tjisákóna. Ngaskande jaꞌatio maá kjo̱a̱tsja xi tjínna, ndatsi tsie kjo̱a̱ni̱ma̱ ndyi̱bitjatiójne̱.

⁵ Nga jáchójne̱ Masendonia̱ nde chií kiniꞌánkjaꞌyájínjne̱, ta̱sá má ta̱jñàní kasakojne̱ kjo̱a̱xti. Xotaa̱ askjanjo̱ xkjín, kó kandakonni ji̱n.

⁶ Ta̱nga Néná kui xi tsja ngaꞌniuú xota̱ xi tsie kjo̱a̱ni̱ma̱ ndyi̱foaꞌatioo̱, kuí boá xi katsjangaꞌniújne̱ nga jachókónjne̱ Titoo̱.

⁷ Kó jmí tsi ta̱ kjo̱a̱a̱ nga jachó tsí Titoo̱, ko̱jo kjo̱a̱a̱ nga kasakongaꞌniuú ngi̱jinjnú boá nga. Katsóyàjne̱ nga mejénjnú xcha̱jnú ji̱n, kó nga ndasen kamájnú kjo̱a̱a̱ ni xi kamána, ko̱jo kjo̱a̱a̱ nga nda̱ kjimajnú kjo̱a̱a̱ an. Nga tsintꞌie an kui nii̱ achichí ꞌniú ngase tsjá kisꞌiena.

⁸ Ndatsi ndasen kamájnú kjo̱a̱a̱ kui xo̱jo̱n xi katsangiyajnúꞌun, nda̱jín mana ngotꞌe̱. Kjénní nga nda̱ kamána ngasꞌe̱, ngatꞌa̱ be án nga kui xo̱jo̱o̱n katsꞌéndasenjnú chiboa ni̱xtjin.

⁹ Ngotꞌe̱ ꞌne̱, achichí tsjá mana, jmí tsi kjo̱a̱a̱ nga ndasen kamájnú, ta̱sá kjoaá nga kui kjo̱a̱ndasee̱n xi katsꞌén, nga kiniꞌánkꞌoyàjnú yojojnú. Xikó tsꞌén mejeén Néná, boá tsꞌén kamándasénjnú, kó kuíni nga ji̱n jmí ni kiniꞌánjínjne̱ xi katsꞌénꞌónjnú.

¹⁰ Ngatꞌa̱ kui kjo̱a̱ndasen xi tsi̱ꞌe̱ Néná, kuí boá xi tsjáná nga niꞌánkꞌoyá yojoná, tsi̱ꞌe̱ nga kjo̱tjoꞌa. Kuíni nga jmí kjo̱a̱jín nga nda̱ ka̱máná. Ta̱nga kjo̱a̱ndasen xi tsjáná nga̱sondiee̱ kuí boá xi tsꞌenkꞌiénná.

¹¹ Tsitsíjenjnúu̱ kókjiꞌi ni xi nda jeꞌejo̱jnú kui kjo̱a̱ndasen xi tsi̱ꞌe̱ Néná. Kamáyàjnú nga jmí jéjínna, kó ngaskande kaꞌnaxiéꞌájnúꞌun. Ti̱ bo̱a̱ ti̱ tsꞌén kiniꞌánxchánjnú, kó kandakonjnú tsi ngo ni xi ndajín ka̱ma. Kamámejénjnú xcha̱jnúꞌun, kó kiniꞌánjéjnúu̱ nda̱ xi tjiín jeé. Ngayeje kui nii̱ xi jún akakonijnú nga jmí ni yàjínjnú kjo̱a̱a̱ ni chꞌokjiꞌi xi kamaá.

¹² Kó kuíni nga, nga katsꞌenꞌindó an kui xo̱jo̱o̱n, jmí tsi katsꞌenda an kjo̱a̱a̱ kui xi ndajínkjiꞌi ni xi katsꞌeén, ko̱jo jmí tsi kjo̱a̱a̱ kui xi ndajínkjiꞌi ni xi kiniꞌánjoo̱. Ta̱sá kamámejénna nga xcha̱ ngindyi̱ko̱n Néná nga nda̱ kjimajnú ji̱n.

¹³ Kó ngayeje kui nii̱ xi katsjájne̱ kjo̱a̱niꞌándajon. Jmí tsi ta̱kuítsí ni xi̱ꞌbi̱ xi katsjájne̱ ngaꞌniú, achichí ꞌniú tsjá kamá ngasejne̱ kjo̱a̱a̱ kjo̱a̱tsjaa̱ Titoo̱, ngatꞌa̱ ngayejejnú nga katseꞌéngaꞌniújnúu̱.

¹⁴ Ja̱ bo̱a̱ jè bo̱a̱ kixiáa̱n Titoo̱ nga achichí tsjá kisꞌiena kjo̱a̱a̱ jún, kó jmí kjo̱a̱soboá kisꞌiejínna. Ja̱koxi̱ boá ngayeje ni xi je kiꞌmíjne̱ jún, kó ti̱ ja̱koxi̱ boá ni xi kiꞌmíjne̱ Titoo̱ nga achichí tsjátjínjne̱ kjo̱a̱a̱ jún.

¹⁵ Titoo̱ achichí tjó ngasee̱ jún, nga foaꞌátsjiee̱n xikótsꞌèn ngayejejnú nga kandaꞌyáꞌénjnúu̱, ko̱jo nga ꞌniú kamáyàndikónjnú.

¹⁶ Achichí tsjá mána nga be an nga jún tjítsꞌen ꞌniátakónjnúꞌun.