2 Xota̱ Korinto̱ 4 - Xo̱jo̱n eén Néná

Bi̱ tsꞌén katsóyà Pabloo̱ xikótsꞌèn íni̱jmì eén Néná

¹ Kó kuíni nga ta̱ngatꞌanii̱ kjo̱a̱ni̱ma̱takoón Néná nga katsjájne̱ kui xaá, kó ndyi̱niꞌankjiéjínjne̱ kjo̱a̱.

² Niꞌánjínjne̱ ni xi niꞌán nínga ꞌmaa̱, ko̱jo ni xi tsja̱aná kjo̱a̱soboá, jmí kjo̱a̱maña ndyi̱niꞌánkjiénjínjne̱, ti̱nde jmí tsi ndyi̱ꞌbosíkjoyájne̱ eén Néná. Néná be nga ja̱koxi̱ boá ni xi ndokjo̱a̱jne̱, kó bo̱a̱ tsꞌén ndyi̱bokojne̱ kókónjne̱ ngindyi̱ko̱n xota̱ xi nda síndo kjo̱a̱kjíntakoón.

³ Ta̱nga tsi ta̱kó tikónꞌmá ngase éntjatsi̱e̱e̱ Néná xi ndyi̱ꞌbíni̱jmìjne̱, tikónꞌmá kuí eén, ta̱nga ngi̱jii̱n xota̱ xi kichajaá nga tikónꞌmá.

⁴ Ngatꞌa̱ nee̱ kui nga̱sondiee̱ katsꞌénjñoó kjo̱a̱kjíntakoón kui xota̱ xi sꞌijinjiín, tsi̱ꞌe̱ nga sku̱i̱e̱ cha̱n cha̱njín, kjo̱a̱tsijee̱n ndiꞌí ꞌna̱a̱ éntjatsi̱e̱ xi tsꞌéntsáyà kjo̱a̱jee̱ Kristoo̱, kó kuíni nga, nga ya ñá Kristoo̱, makjínná kókjiꞌi kjo̱a̱jee̱ Néná.

⁵ Ngatꞌa̱ jmí tsi kjo̱a̱a̱ ji̱n xi ndyi̱ꞌbíni̱jmìjne̱, kjo̱a̱a̱ Jesukristoo̱ nga kui xi Ndi̱a̱ná xí ndyi̱ꞌbíni̱jmìjne̱, kó ji̱n ta̱ moso̱ tsa̱jún tsi kjimajne̱ ta̱ngatꞌanii̱ nga tikónjinjne̱ kjo̱a̱tjoó Kjisoo̱.

⁶ Ngatꞌa̱ kuí Néná xí katsjákjo̱a̱ nga nínga jñoó sa̱ꞌíntsijen ndiꞌií, kó ti̱kuíní xi katsꞌéntsijen ndiꞌií ngi̱jin ini̱ma̱ná, kó katsꞌéntsijee̱n tsi̱ꞌe̱ nga ka̱makjínná kjo̱a̱jee̱ Néná xí tjítsꞌén ꞌna̱ kje̱n Jesukristoo̱.

Bi̱ tsꞌén katsóyà Pabloo̱ ni xi jaꞌajin

⁷ Néná katsjájne̱ kui kjo̱a̱cho̱n xi̱ꞌbi̱, kó ji̱n xikónií ngo boso̱ ti̱jì nínga tikóntjó kui kjo̱a̱cho̱o̱n. Tsi̱ꞌe̱ nga sꞌi̱jña tsijen nga kui ngaꞌniú ndakjiꞌii̱ tsi̱ꞌe̱ Néná ka̱ma, kó jmí tsi tsa̱ji̱n.

⁸ Ndatsi kjín kjo̱a̱ni̱ma̱ ndyi̱bitjatiójne̱, ta̱nga tjisákó ndi̱yàjne̱ kótsꞌèn kjo̱tjojinjne̱. Ndatsi nda̱ kjimajne̱, ta̱nga jmí tsi yàjínjne̱ mí ni xi si̱ꞌanjne̱.

⁹ Ndatsi tjimíyotji̱ngijne̱, ta̱nga jmí tsi je íjñámasienjne̱ Néná. Ndatsi je akjatójójne̱, ta̱nga jmí tsi je kiniꞌánchajajne̱.

¹⁰ Ta̱ nínga ndyi̱mongínjne̱, kichꞌiájne̱ ngi̱jin yojojne̱ chi̱bo̱a̱a̱ kjo̱a̱ni̱ma̱ xi jaꞌatio Kjisoo̱ nga kiniꞌánkꞌién, tsi̱ꞌe̱ nga bo̱a̱ tsꞌén xcha̱ ngi̱jin yojojne̱ kjo̱a̱mindyioo̱n Kjisoo̱ nga.

¹¹ Ngatꞌa̱ ji̱n xi tindyionjne̱, tjín xí mejeén sa̱ꞌínkꞌiénjne̱ ta̱ngatꞌanii̱ Kjisoo̱, tsi̱ꞌe̱ nga ti̱ bo̱a̱ ti̱ tsꞌén kjo̱a̱mindyioo̱n Kjisoo̱ xcha̱ ngi̱jin yojojne̱ xi maa̱ ꞌme.

¹² Kó bo̱a̱ tsꞌén ji̱n kjimayajne̱, kó jún ndyi̱mindyionjnú ngi̱ya tsja Néná.

¹³ Bi̱ tsꞌén je kjitꞌa xo̱jo̱n eén Néná: “Kisꞌijinna, kuíni nga tsíchji̱a̱ an.” Kó ji̱n ti̱ bo̱a̱ ti̱ tsꞌén tjíjinjne̱. Sꞌijinjne̱ kó kuíni nga kandokjo̱a̱jne̱.

¹⁴ Ngatꞌa̱ jè ya ñá nga Néná boá xi katsꞌénkjaꞌáꞌyaá Ndi̱a̱ná Kjisoo̱, kó ti̱ bo̱a̱ ti̱ tsꞌén sa̱ꞌínkjaꞌáꞌyáná ñá nga, kó nijan kjo̱joná ngindyi̱ko̱n kui.

¹⁵ Ngatꞌa̱ ngayeje kui nii̱, kjima nganda tsa̱jún, tsi̱ꞌe̱ nga kjín xota̱ xi tsja̱á ndokꞌóchjì Néná, kjo̱a̱a̱ kui kjo̱a̱nda xi tjisákoó, kó bo̱a̱ tsꞌén nga Néná kꞌuié ngasee̱ kjo̱a̱je.

¹⁶ Kó kuíni nga ndyi̱niꞌankjiéjínjne̱ kjo̱a̱, ngatꞌa̱ ndatsi je kjife ngaꞌniuú yojojne̱, ta̱nga ini̱ma̱jne̱ kjimatja̱tsi̱e̱ya ndyiojón ndyiojón.

¹⁷ Ngatꞌa̱ kui kjo̱a̱ni̱ma̱ xi ta̱ ngotjón nga ndyi̱bitjatió ñá, kuí xí tsja̱aná ngo kjo̱a̱je xi ngatsjéni̱xtjin ko̱jo xi nda ngase.

¹⁸ Jmí tsi ni xi ndyi̱yà xí si̱ꞌansée̱n, kuí ni xi yàjiín xi si̱ꞌansée̱n, ngatꞌa̱ ni xi yaa̱, ta̱ ngotjón tsí sꞌijña, ta̱nga ni xi yàjiín ngatsjéni̱xtjin sꞌijña.