2 Xota̱ Korinto̱ 3 - Xo̱jo̱n eén NénáBi̱ tsꞌén íni̱jmì Pabloo̱ kjo̱a̱a̱ ni xi Néná tjón índajo̱ xotaa̱ ko̱jo ni tja̱tsi̱e̱ xi jaskan índajo̱ 1 Kjiꞌanga bo̱a̱ ndyi̱ꞌmìjne̱, a ti̱ ji̱nní xi nda ko̱ndókjo̱a̱jne̱ kjo̱a̱a̱ ji̱n. Axa̱ chjiénjne̱ nga tjín xí tsja̱ajne̱ ngo xo̱jo̱n xi nda ku̱i̱chji̱a̱ kjo̱a̱a̱ ji̱n, tsi̱ꞌe̱ nga jún ka̱makjínjnú ꞌyání xi ji̱n. Axa̱ chjiéngá jún si̱ꞌandajnú ngo xo̱jo̱n xi nda ku̱i̱chji̱a̱ kjo̱a̱a̱ ji̱n, tsi̱ꞌe̱ nga ka̱makjiín xotaa̱ ꞌyání xi ji̱n. 2 Jún boá xi xikoó ngo xo̱jo̱n xi nda ku̱i̱chji̱a̱ kjo̱a̱a̱ ji̱n, kui xi Kristoo̱ ítꞌa ngi̱jin ini̱ma̱jne̱. Xo̱jo̱n xi ngayeje xotaa̱ be ko̱jo tsꞌènyà, 3 ngatꞌa̱ ya cha̱n cha̱n nga jún boá xi xikoó kui xo̱jo̱n xi Kristoo̱ katsꞌénda, xi ji̱n kiniꞌánkꞌasꞌienjne̱ jún, ngo xo̱jo̱n xi jmí tsi tinta̱ kiniꞌánꞌindóni, ta̱sá A̱si̱énni̱xtjii̱n Néná xí tikoón xi kiniꞌánꞌindóni, ngo xo̱jo̱n xi jmí tsi nga̱soón ngo ndi̱jo̱ kiniꞌánꞌindó, ta̱sá ngi̱jin ini̱ma̱ná boá nínga akjatꞌa. 4 Ngindyi̱ko̱n Néná nga Kristoo̱ boá xi tjítsꞌén nga ꞌniátakón an xá xí tjítsꞌen an. 5 Jmí tsi kjo̱a̱a̱ tsi sꞌi̱jinjne̱ nga ti̱ ji̱i̱n xi ka̱majne̱ si̱ꞌan xá xí ndyi̱niꞌánjne̱, Néná boá xi tsjájne̱ ngaꞌniú nga niꞌánjne̱ kui xaá. 6 Kó kuí boá xi katsꞌénjne̱ nga mosoo̱ kjo̱a̱ꞌbínda tja̱tsi̱e̱ xi índajo̱ xota̱a̱ ka̱majne̱, jmí tsi ngo ni xi kjitꞌa ngo xo̱jo̱n, ta̱sá ngo ni xi tjítsꞌén A̱si̱énni̱xtjii̱n Néná. Ngatꞌa̱ kjo̱a̱kiti xi kisitꞌaa̱, kuí boá xi fíjo̱na kjo̱a̱bo̱yaa̱, ta̱nga A̱si̱énni̱xtjii̱n Néná kuí boá xi tsjáná kjo̱a̱mindyioo̱n. 7 Kó tsi xá xí kisꞌiee̱ kjo̱a̱kiti xí fíjo̱ná kjo̱a̱bo̱yaa̱ xi kiniꞌánꞌindóni nga̱soón ngo tie ndi̱jo̱o̱, kisꞌiee̱ kjo̱a̱je, kó ngaskande xota̱ xi chji̱a̱ni Israee̱l kamájín kamábe kje̱n Moisee̱, ta̱ngatꞌanii̱ kui kjo̱a̱je xi tikónjin kje̱n, kó kui kjo̱a̱jee̱ tsiejín kamaá, 8 kó kótsꞌèn nga jejín ngase ka̱ma kjo̱a̱jee̱ ni xi tsꞌén A̱si̱énni̱xtjii̱n Néná. 9 Ngatꞌa̱ tsi kisꞌiee̱ kjo̱a̱je xaá kjo̱a̱kiti xi sa̱ꞌínjeé xotaa̱, ꞌniú ngase kꞌuieé kjo̱a̱je xaá éntjatsi̱e̱e̱ Néná, xi sa̱ꞌínkixi̱ xotaa̱ ngindyi̱ko̱n Néná. 10 Ngatꞌa̱ nga ja̱koxi̱ kui ni xi kisꞌiee̱ kjo̱a̱jee̱ jè kichajá kjo̱a̱jee̱, tsi xꞌi̱chi̱bo̱a̱ ndse̱je̱n kuí kjo̱a̱je xi ꞌniú je ngase xi tikón ngotꞌe̱. 11 Tsi kisꞌiee̱ kjo̱a̱je ngo ni xi tsiejín kamaá, achichíra̱ tsie ngase kjo̱a̱je kꞌuieé ni xi kꞌuijñá ngatsjéni̱xtjii̱n. 12 Ngatꞌa̱ yàjne̱ nga bo̱a̱ kjiꞌi ni xi sꞌijinjne̱, kuíni nga ꞌniátakónjne̱ ni xi ndokjo̱a̱jne̱. 13 Jmí tsi bo̱a̱ ndyi̱niꞌánjne̱ xikó katsꞌén Moisee̱ nga ngo ńjño íꞌmá kje̱n, tsi̱ꞌe̱ nga xota̱ xi chji̱a̱ni Israee̱l, sku̱i̱e̱jín ndiꞌií kui kjo̱a̱je xi̱ꞌba̱, kjo̱a̱je xi tsiejín tsꞌandíyaá. 14 Ta̱nga kisꞌijñoó kjo̱a̱kjíntakoón kui xotaa̱, ngatꞌa̱ ngaskande ngotꞌe̱ kjiꞌanga tsꞌènyà ni xi índajo̱ Néná ngasꞌe̱, ti̱ kuii̱ ńjñoo̱ boꞌmá kjo̱a̱kjíntakoón. Kó kui ńjñoo̱ kji̱e̱ tjoꞌóxínjiín, ngatꞌa̱ ta̱kuítsí Kristoo̱ xi maa̱ foaꞌáxín. 15 Ta̱nga ngaskande ngotꞌe̱, kjiꞌanga niꞌányà xo̱jo̱n kjo̱a̱kiti xi katsꞌénda Moisee̱, kui ńjñoo̱ nga̱són ini̱ma̱a̱ kui xotaa̱ ta̱kó tikón. 16 Ta̱nga ngije sꞌi̱jii̱n Ndi̱a̱ná, xtjo̱ꞌóxín kui ńjñoo̱. 17 Ngatꞌa̱ Ndi̱a̱ná kuí boá xi A̱si̱énni̱xtjii̱n, kó nínga tikón A̱si̱énni̱xtjii̱n Ndi̱a̱ná, tjín kjo̱a̱ndé. 18 Kó kuíni nga ngayeje ñá, ngiti̱ jmíjínná kuí ńjño xi boꞌmá kje̱n. Xikoó kjiꞌanga ngo chi̱tsen bokó kje̱n, bo̱a̱ tsꞌén bokó ñá kjo̱a̱jee̱ Ndi̱a̱ná. Bo̱a̱ kon kjimá xikó maá a̱sie̱én Néná, ngatꞌa̱ ngatsjéni̱xtjin sa kjiꞌbé sa kjiꞌbéná tsie kjo̱a̱jee̱, ta̱ngatꞌanii̱ ni xi tjítsꞌén A̱si̱énni̱xtjii̱n Ndi̱a̱ná. |
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
Bible Society of Mexico