2 Xota̱ Korinto̱ 2 - Xo̱jo̱n eén Néná

¹ Kuíni nga bo̱a̱ kixian an nga ngiti̱ kjuínkónjínjnúꞌun, tsi̱ꞌe̱ nga jmí kjo̱a̱ndasen tsjajínjnúꞌun.

² Ngatꞌa̱ tsi an sa̱ꞌindasenjnúꞌun, ꞌyá xi jaskan tsja̱ana kjo̱a̱tsja an, a mí tsi ta̱ jún tsí.

³ Kuíni nga katsꞌenꞌindójnúꞌun kui xo̱jo̱o̱n, tsi̱ꞌe̱ nga nga kjóchó an, sa̱ꞌíndasénjínna xota̱ xi chjiéngá kjo̱a̱tsja tsja̱ana, bee̱ko̱n an nga kjo̱a̱tsjana ti̱kuíní xi kjo̱a̱tsjajnú jún nga.

⁴ Ngatꞌa̱ achichí ndasen, ko̱jo boa kjimaa̱ ini̱ma̱na, kó achichí ndándyíkón án xi tjitjón nga katsꞌenꞌindó an kui xo̱jo̱o̱n, jmí tsi tsi̱ꞌe̱ nga ndasen ka̱majnú, ta̱sá kjo̱a̱a̱ nga mejénna nga xcha̱jnú nga achichí tjóna jún.

Bi̱ tsꞌén íni̱jmì Pabloo̱ ánní nga si̱ꞌanjetakoón nda̱ xi ndajín katsꞌeén

⁵ Ta̱nga tsi tjín xí katsꞌéndasenna, jmí tsi ta̱ án tsí xi katsꞌéndasenna, mején ngaskande ko̱jo ngayejejnú xi katsꞌéndasenjnú. Mejeén ngaskande xian an, tsi̱ꞌe̱ nga tsꞌatiojín kuichjiá an.

⁶ Kjín má jún xi je ꞌniú kandokjo̱a̱jojnú kui nda̱ xi katsꞌéndasenna, kó jè ka̱manii̱ kui nii̱.

⁷ Kó kuíni nga, ta̱sá ti̱ꞌanjetakónjnúu̱, kó ti̱ꞌandajonjnúu̱, tsi̱ꞌe̱ nga kjo̱a̱ndasee̱n sa̱ꞌínꞌonjiín.

⁸ Kó kuíni nga ꞌniú míꞌájnúꞌun tsi̱ꞌe̱ nga ko̱kójnúu̱ kui nga tjójnú.

⁹ Ngatꞌa̱ kuíni nga katsꞌenꞌindójnúꞌun kui xo̱jo̱o̱n, tsi̱ꞌe̱ nga skuie an tsi ja̱koxi̱ nga ndyi̱ndaꞌyáꞌénjnúꞌun ngayeje ni xi tꞌíxiánjnúꞌun.

¹⁰ An sa̱ꞌinjetakóo̱n xota̱ xi jún si̱ꞌanjetakónjnúu̱ ngo ni, ngatꞌa̱ ni xi je katsꞌenjetakón an, tsi chjiéngá sa̱ꞌinjetakón an, bo̱a̱ katsꞌen an ngindyi̱ko̱n Kristoo̱ nganda tsa̱jún,

¹¹ tsi̱ꞌe̱ nga xindajín Satanaa̱ sa̱kóndièjiín nga sa̱ngínjin yojoo̱ kui nii̱, ngatꞌa̱ jè ya nga ta̱nisién ndajín ni xi tsꞌénkjó kui.

Nda̱ kamaá Pabloo̱ na̱xi̱ńdáꞌniú Troa̱

¹² Kjiꞌanga jachó an na̱xi̱ńdáꞌniú Troa̱ nga ini̱jmi án éntjatsi̱e̱e̱ Kristoo̱, kasakona ngi̱ndie nga sa̱ꞌin an xaá Ndi̱a̱ná kuí nangii̱.

¹³ Nda̱ kamaá ini̱ma̱na ngatꞌa̱ kasakojínna nda̱ ntsꞌié án xi ꞌmí Titoo̱, kó kuíni nga katsꞌenkixotꞌa an kui xotaa̱, sꞌe̱ kijí an nangi Masendonia̱.

Bi̱ tsꞌén íni̱jmì Pabloo̱ nga Néná katsꞌénkjién kui nga kui xi ku̱i̱ꞌíni̱jmì éntjatsi̱e̱e̱ Kristoo̱

¹⁴ Ndokꞌóchji̱ì Néná, nga ngatsjéni̱xtjin tsja̱ajne̱ nga niꞌánjne̱ ngi̱yaa̱ jaꞌeén Kristoo̱ ko̱jo nga ji̱n tsꞌénkjiénjne̱ nga bokó ngayeje ngi̱ndie, kjo̱a̱kjíntakoón xikó maá tsi ngo ni xi sije̱n.

¹⁵ Ngatꞌa̱ ji̱n xikónií nisije̱n xi Kristoo̱ tsꞌenkꞌásꞌieén Néná xi kjifoaꞌándá ngi̱jii̱n xota̱ xi fotjoꞌa, ko̱jo ngi̱jii̱n xota̱ xi kichajaá.

¹⁶ Kui xota̱ xi tjichájaá, ji̱n xikónií tsi je̱n kjo̱a̱bo̱ya kjimaa̱ ji̱n, ta̱nga kui xota̱ xi fotjoꞌaa̱, ji̱n xí xikoó ngo nisije̱n xi tsjá kjo̱a̱mindyioo̱n kjimaa̱. Kó kjo̱a̱a̱ kui nii̱, ꞌyá xí tjiín ngaꞌniú nga ka̱maa̱ sa̱ꞌín kui xaá.

¹⁷ Ngatꞌa̱ jmí tsi bo̱a̱ kónjne̱ xikoó kjín xota̱ xi ndyi̱foaꞌáchjí nga ndyi̱chji̱a̱ eén Néná, ngayejení ini̱ma̱jne̱ nga ndyi̱ꞌbíni̱jmìjne̱ Kristoo̱. Bo̱a̱ ndyi̱niꞌánjne̱ ngindyi̱ko̱n Néná xí katsjájne̱ kui xaá.