1 Xota̱ Korinto̱ 9 - Xo̱jo̱n eén Néná

Bi̱ tsꞌén íni̱jmì Pabloo̱ nga ja̱koxi̱ boá nga kui xi ngo nda̱ apostro̱

¹ A tikónndéjín an ngindyi̱ko̱n Néná. A apostro̱jín an. A ndyikón ánjín má xi kamábe Ndi̱a̱ná Kjisoo̱. ¡Ndokꞌóchji̱ì xá xí katsꞌen an nga jún jè xota̱a̱ Kristoo̱ jún!

² Tsi tjín xí tsó nga apostro̱jín an, ta̱nga nga ja̱koxi̱ jún xí yàjnú nga nda̱ apostro̱ án, ngatꞌa̱ kjiꞌanga sꞌijinjnú Néná, ndyi̱bokojnú nga apostroo̱ Ndi̱a̱ná boá án.

³ Kuí nii̱ xi kuichji̱a̱tjé an yojona kjo̱a̱a̱ xota̱ xi boaꞌayana kjo̱a̱a̱ xá xí tjítsꞌen an:

⁴ A jmíjínjne̱ an ko̱jo Bernabee̱ kjo̱a̱nda nga ko̱e̱ꞌéjne̱ ni xi xi̱ni̱e̱jne̱, ko̱jo ni xi sꞌi̱o̱jne̱.

⁵ A jmíjínjne̱ kjo̱a̱nda nga kꞌuiéjne̱ chjo̱on xí sꞌijii̱n Néná, ko̱jo nga ka̱ma kongínjo̱jne̱ nínga ndyi̱mongínjne̱, xikó ndyi̱tsꞌèn já apostro̱ xi ngasee̱, ko̱jo já ntsꞌi̱e̱ Ndi̱a̱ná, ko̱jo Peé.

⁶ Axa̱ ta̱ Bernabee̱ ko̱jo án tsí xi tjínjne̱ kjo̱a̱ꞌniú nga si̱ꞌanxájne̱, tsi̱ꞌe̱ nga sa̱kójne̱ ni xi ka̱machjiénjne̱.

⁷ ꞌYá nda̱jun xi kui ku̱i̱ꞌíchjí to̱n xi tsꞌenkjié ngi̱yaa̱ xaá. ꞌYá xí ku̱i̱ꞌítji̱e̱ tostsi̱jè, kó skji̱ni̱e̱jín to xi kjo̱a̱ꞌátikó. ꞌYá xí skoón cho̱tsa̱nga̱, kó kꞌuijín ntsjén xí ꞌboxieé kui cho̱o̱.

⁸ Jmí tsi ta̱ ni xi tsꞌenkjó tsí an xi tꞌíxián an, ta̱ kjo̱a̱a̱ nga bo̱a̱ tsꞌén bokoyá kjo̱a̱kitii̱.

⁹ Ngatꞌa̱ bi̱ tsꞌén kjitꞌa xo̱jo̱n kjo̱a̱kitii̱ Moisee̱: “Ngata̱ foꞌméjín ji tsꞌoa cho̱yojo xi̱ꞌin xi tsꞌénxá nga bitjiá to ndso̱ko̱a̱n ṉño̱paa̱n.” Kó Néná a cho̱yojo xi̱ꞌii̱n xí nda̱a̱.

¹⁰ A mí tsi nganda tsa̱ñá boá nga bo̱a̱ katsó. Ngatꞌa̱ kjo̱a̱kitii̱ nganda tsa̱ñá boá nga bo̱a̱ tsꞌén ikítꞌa, ngatꞌa̱ xi indyiákaxo tꞌanangii̱ tsi̱ꞌe̱ nga ka̱ma ku̱i̱ꞌítji̱e̱, ko̱jo xi bitjiá to ndso̱ko̱a̱n ṉño̱paa̱n nga joó nga tjiín nga skoyaá nga sa̱ko̱ó to xi tsoboaá nga kjo̱chó cha̱a̱n.

¹¹ Tsi ji̱n je ikꞌítji̱e̱jne̱ ngi̱jinjnú ngo xojmaá ni xi tsi̱ꞌe̱ Néná, a tsie ni xi ndyi̱mindyijne̱, nga sa̱kójne̱ chií ni xi tjínjnú jún kui nga̱sondiee̱.

¹² Tsi kje̱ꞌe xi maá sakó chií ni xi tjínjnú kui nga̱sondiee̱, a tsiejín ngase tsoboájne̱ ji̱n. Ta̱nga niꞌánkjiénjínjne̱ kui kjo̱a̱ndaa̱, ta̱sá ndyi̱niꞌánchíkjo̱a̱jne̱ ngayeje nii̱ tsi̱ꞌe̱ nga si̱ꞌanniꞌínjínjne̱ nga kjo̱chótꞌaa̱ xotaa̱ éntjatsi̱e̱e̱ Kristoo̱.

¹³ A yàjínjnú nga xi tsꞌénxá na̱ngo̱xi̱i̱ kjinie ni xi tjoꞌósón tsi̱ꞌe̱ na̱ngo̱xi̱i̱, ko̱jo xi ndyi̱tsꞌènxátꞌa ṉchandikoón ti̱ ki̱a̱ sakoó yojoo̱ cho̱ xi niꞌánkꞌién ki̱a̱a̱ nga.

¹⁴ Kó ti̱ bo̱a̱ ti̱ tsꞌén Ndi̱a̱ná jè índa nga kui xota̱ xi ku̱i̱ꞌíni̱jmì éntjatsi̱e̱e̱ Néná, én xí ku̱i̱ꞌíni̱jmì xí ngatꞌíndoni kó nga ki̱a̱ sa̱ko̱ó ni xi skji̱ni̱e̱ ko̱jo ni xi kꞌuí.

¹⁵ Ta̱nga nde kji̱e̱ ngo kui kjo̱a̱ndaa̱ xi tsꞌenkjién án, ti̱nde jmí tsi kui nii̱ tjítsꞌenꞌindó an, tsi̱ꞌe̱ nga jún ko̱e̱ꞌéjnúꞌun ni, ngatꞌa̱ ta̱sá chjínií nga ngatꞌien an, ngindiee̱ nga tjín xí kjo̱a̱ꞌáxínna kui kjo̱a̱tsja xi tikónna tsi tjín xí ni tsja̱ana.

¹⁶ Tsi tsꞌénꞌbini̱jmì án éntjatsi̱e̱e̱ Kristoo̱, jmí tsi kui ni nga je kꞌo̱xié an yojona, ta̱ kjo̱a̱a̱ nga tikónna ngo kjo̱a̱ꞌniú nga bo̱a̱ sa̱ꞌin an, ¡xi̱xꞌi̱a̱n xò án tsi xiyàjín an éntjatsi̱e̱e̱ Kristoo̱!

¹⁷ Kó kuíni nga tsi ta̱ an so̱bo̱a̱ xí mejénna nga sa̱ꞌin an ni xi tjítsꞌen an, sa̱kóna ngo chjí, ta̱nga tsi ikꞌíniéna nga sa̱ꞌin an, ni xi katsjáxána Néná nga kamáꞌniátakónna kuí xí tjítsꞌenkjatjosón an.

¹⁸ Kuíni nga, ja̱ kósꞌe̱ mí chjí xí sa̱kóna. Kuí chjí xi̱ꞌbi̱, nga ta̱ kꞌuini̱jmì kjo̱a̱nda án éntjatsi̱e̱e̱ Kristoo̱, kó nga sa̱ꞌinkjiénjín an kjo̱a̱nda xi tjínna nga apostro̱ an.

Bi̱ tsꞌén íni̱jmì Pabloo̱ ni xi katsꞌén nga katsꞌén xaá

¹⁹ Ndatsi ndéna yojona, jè moso̱ xi kastiñaá ngayeje xotaa̱ je katsꞌen an yojona, tsi̱ꞌe̱ nga kjín ngase xota̱ xi sa̱ꞌin an, tsi̱ꞌe̱ nga kui xotaa̱ sꞌi̱jii̱n Kristoo̱.

²⁰ Ngi̱jii̱n xota̱ jundíoo̱, bo̱a̱ katsꞌen an xikó tsꞌén xota̱ jundíoo̱, tsi̱ꞌe̱ nga sa̱ꞌin an nga kui xotaa̱ sꞌi̱jii̱n Kristoo̱. Ngi̱jii̱n xota̱ xi kjo̱a̱kitii̱ kjiꞌiꞌniúnií, bo̱a̱ katsꞌen an xikoó tsi kui kjo̱a̱kitii̱ kjiꞌiꞌniúnií an, tsi̱ꞌe̱ nga sa̱ꞌin an nga kui xotaa̱ sꞌi̱jii̱n Kristoo̱, ndatsi kuijín kjo̱a̱kitii̱ kjiꞌiꞌniuú an.

²¹ Kó ngi̱jii̱n xota̱ xi kjo̱a̱kitii̱jín kjiꞌiꞌniúnií, xikoó tsi ngo kui xotaa̱ katsꞌen an yojona, tsi̱ꞌe̱ nga sa̱ꞌin an nga kui xotaa̱ sꞌi̱jii̱n Kristoo̱, jmí tsí kjo̱a̱a̱ tsi tjítsꞌenkjatjosónjín an kjo̱a̱kitii̱ Néná, ta̱sá kjo̱a̱kitii̱ Kristoo̱ tsꞌénfítji̱ngi an.

²² Ngi̱jii̱n xota̱ xi kji̱e̱ ꞌniújín sꞌijii̱n Néná, xikoó tsi ngo kui xotaa̱ katsꞌen an yojona, tsi̱ꞌe̱ nga asiko̱jo an nga ꞌniú ngase sꞌi̱jii̱n. Xi kókón ngayeje to̱ko̱ya xotaa̱, bo̱a̱ kon katsꞌen an yojona, tsi̱ꞌe̱ nga ti̱ kuí xí kjo̱tjoꞌani kaꞌa xota̱.

²³ Kó ngayeje kui nii̱ tsꞌen an, ngatꞌa̱ xaá éntjatsi̱e̱e̱ Jesukristoo̱ tjítsꞌen an, tsi̱ꞌe̱ nga ko̱jo an sa̱kóna kjo̱a̱nda xi tsjá.

²⁴ A yàjínjnú nga kjiꞌanga kjín xota̱ ndyi̱monga ndse̱je̱n, ta̱ ngo tsí xí boeꞌeé ni xi niꞌaán. Ja̱ ti̱yójnú ki̱a̱ ka̱maa̱ nga sa̱kójnú kui ni xi niꞌaán.

²⁵ Ngayeje xota̱ xi stsáton ngo kjo̱a̱ńton, ꞌbíꞌniuú yojoo̱ ni xi ndajín sa̱ꞌiín, kó ja̱koxi̱ nga tsꞌén kuí nii̱ tsi̱ꞌe̱ nga sa̱ko̱ó ngo chjí xí fotson, ta̱nga ñá ndyi̱niꞌán ngo kjo̱a̱ꞌniú tsi̱ꞌe̱ nga sa̱kóná ngo chjí xí kjo̱tsònjín.

²⁶ Kó an xikónií ngo xi tsꞌénmonga, ta̱nga jmí tsi ta̱xkiya tsꞌénmonga an. Xikónií ngo xi tsꞌén kján, ta̱nga jmí tsi ta̱xkiya tsꞌénbeꞌée̱ tjo̱o̱,

²⁷ ta̱sá tsꞌéntsjàa̱ kjo̱a̱ni̱ma̱ yojona, kó tsꞌèe̱n kjo̱a̱ꞌniú tsi̱ꞌe̱ nga sa̱ꞌínkjatjosón ni xi mejénna nga sa̱ꞌín, ngatꞌa̱ tsi ta̱ xcha̱ja an ngije ja̱bo̱a̱ je ini̱jmìi̱ xota̱ xi ngasee̱.