1 Xota̱ Korinto̱ 7 - Xo̱jo̱n eén Néná

Bi̱ tsꞌén akóyá Pabloo̱ kjo̱a̱a̱ kjo̱a̱xtii̱ xota̱ xi je ixaán

¹ Kjo̱a̱a̱ ni xi ikítꞌajnúꞌun kui xo̱jo̱n xi kanangiyajnúꞌun, xiyàjnúꞌun nga ndakjíꞌí tsi ngo nda̱ ku̱i̱xánjín,

² ta̱nga ta̱ngatꞌanii̱ kjo̱a̱tondo̱ xi chji̱a̱ ini̱ma̱ná nga si̱ꞌán, ta̱sá já xíꞌiín ngatꞌieé ínchjín, kó xi ínchjiín ngatꞌieé xi̱ꞌin.

³ Xi xi̱ꞌii̱n ngatsꞌénkjátjosoón nga kjojñájo̱ chjo̱ón, kó bo̱a̱ ti̱ tsꞌén xi chjo̱ón ngatsꞌénkjátjosoón nga kjojñájo̱ xi̱ꞌii̱n.

⁴ Ngatꞌa̱ xi chjo̱ón ngiti̱ kuijín xi botixómá soboaá yojoo̱, xi̱ꞌii̱n xí botixómaá, kó xi xi̱ꞌii̱n ngiti̱ kuijín xi botixómá soboaá yojoo̱, chjo̱ón xí botixómaá.

⁵ Ngata̱ ꞌbíxi̱a̱njínjnúu̱ yojojnú xingi̱jnú, ngototo tsi nga jójnú xi kꞌuíndajnú nga ku̱i̱ndyionxónjnú chiboa ni̱xtjin kjo̱a̱a̱ nga Néná ko̱ndókjo̱a̱jnúu̱, ta̱nga ngije jatjosón ni̱xtjin xi ikꞌíndajnú, ti̱ꞌantsjajo̱ nginíjnú xingi̱jnú, ngatꞌa̱ tsájmi̱ xindajín Satanaa̱ ka̱márií skjítꞌayákónjnú tsi ka̱maꞌniújínjnú yojojnú.

⁶ Kui nii̱ xiyàjnúꞌun, kó tsjandièjnúꞌun tsi̱ꞌe̱ nga bo̱a̱ si̱ꞌánjnú, ta̱nga jmí tsi tsꞌénbotixomájnúꞌun.

⁷ Mejénna tsi ngayeje xotaa̱ ka̱ma xikoó an, ta̱nga Néná boá xi katsjáná ja̱ kje̱ꞌe ja̱ kje̱ꞌe kjo̱a̱nda nga ngo nga ngo ñá.

⁸ Xi síndo kꞌán xo̱ngò, ko̱jo ínchjín kꞌán xi je kꞌien xi̱ꞌii̱n, tsꞌénxiyàa̱ nga ndakjíꞌí tsi ku̱i̱ndyionkꞌánjnú xikoó an.

⁹ Ta̱nga tsi ka̱maꞌniújínjnú yojojnú, ta̱sá ti̱xánjnú, ngatꞌa̱ ta̱sá ndatsi ku̱i̱xánjnú ta̱bo̱a̱jiín tsi chꞌo tsꞌén ku̱i̱chji̱a̱ ini̱ma̱jnú.

¹⁰ Ta̱nga kui xota̱ xi je ixaán, tsjàa̱ kui kjo̱a̱botíxoma xi jmí tsi tsa̱ꞌa̱n, tsi̱ꞌe̱ Ndi̱a̱ná boá: Nga xi chjo̱ón ngata̱ ꞌbijñájín xi̱ꞌii̱n,

¹¹ kó tsi ku̱i̱ꞌíjñá xi̱ꞌii̱n, ngiti̱ bixanjín, ko̱jo tsi ta̱sá ngatjíkánda nginií xi̱ꞌii̱n, kó xi xi̱ꞌii̱n nga ꞌbijñájín chjo̱ón.

¹² Kó xota̱ xi ngasee̱ xiyàa̱ ngo ni xi tsa̱ꞌa̱n, jmí tsi ni xi tsi̱ꞌe̱ Ndi̱a̱ná: Tsi ngo ntsꞌié xí tikoón ngo chjo̱on xí sꞌijinjiín Néná, ta̱nga tsi kui naa̱ ngayeje kon nga tikónjo̱, kui ntsꞌiee̱ ngata̱ ꞌbijñájín kui chjo̱ón.

¹³ Kó tsi ngo chjo̱on xí sꞌijii̱n Néná xi tikónjo̱ ngo xi̱ꞌin xi sꞌijinjiín Néná, kó tsi kui nda̱a̱ ngayeje kon nga tikónjo̱, kui chjo̱ón ngata̱ ꞌbijñájín kui xi̱ꞌii̱n.

¹⁴ Ngatꞌa̱ kui xi̱ꞌin xi sꞌijinjiín Néná, jè kamátsjie ngindyi̱ko̱n Néná ngije ngo chjo̱on xí sꞌijii̱n Néná tikónjo̱, kó chjo̱on xi sꞌijinjiín Néná, jè kamátsjie ngindyi̱ko̱n Néná, ngije ngo xi̱ꞌin xi sꞌijii̱n Néná tikónjo̱, ngatꞌa̱ tsi bo̱a̱jín kjiꞌi, ndií tsjiejín ka̱ma ngindyi̱ko̱n Néná tsobo̱a̱, ta̱nga ngotꞌe̱ ꞌne̱, jè xota̱ tsjiee̱ Néná kamá.

¹⁵ Ta̱nga tsi kui xi̱ꞌin, ko̱jo tsi kui chjo̱on xí sꞌijinjiín Néná ka̱mamejeén ku̱i̱ꞌíjñá xkjín xí sꞌijii̱n Néná, ngatꞌijñá. Jmí kjo̱a̱ꞌniújiín ngo ntsꞌié, ko̱jo tsi ngo ndichjá xí sꞌijii̱n Néná nga kꞌuijñájo̱ xi sꞌijinjiín Néná, ngatꞌa̱ Néná mejeén nga kꞌuiéná kjo̱a̱xió nga ku̱i̱ndyión.

¹⁶ Ngatꞌa̱ kótsꞌèn ye ji, ji xi chjo̱on jí, nga ka̱maa̱ ko̱si̱ke̱je ji tsi̱ꞌe̱ nga kjo̱tjoꞌa xi̱ꞌíi̱n. Axa̱ kótsꞌèn ye ji, ji xi xi̱ꞌin ji, nga ka̱maa̱ ko̱si̱ke̱je ji tsi̱ꞌe̱ nga kjo̱tjoꞌa chjóo̱n.

Bi̱ tsꞌén akóyá Pabloo̱ nga ngije Néná ndokjo̱a̱ ñá kuí nii̱ xi ꞌniú chjínií

¹⁷ Ta̱ xikótsꞌénnií, chjiéngá nga ngo nga ngo ku̱i̱ndyión xikótsꞌèn katsjáná Ndi̱a̱ná, kó nga ku̱i̱ndyión xikótsꞌèn ítsꞌi̱yanii̱ nga tsíchji̱a̱ná Néná. Kuí nii̱ xi tsꞌénxiyàa̱ ngayeje xotaa̱ na̱ngo̱xi̱i̱.

¹⁸ A tjín xí tjiín sirkunsisioo̱n kjiꞌanga Néná tsíchji̱a̱a̱. Bo̱a̱ tsꞌén ngatꞌíjñára. A tjín xi jmíjiín sirkunsisioo̱n nga kisꞌijii̱n Kristoo̱. Ngata̱ tsꞌénjiín sirkunsisioo̱n yojoo̱.

¹⁹ Ngatꞌa̱ jmí ni chjíjiín tsi kiniꞌánná ko̱jo tsi kiniꞌánjínná sirkunsisioo̱n, nga si̱ꞌankjatjosón kjo̱a̱botíxomaa̱ Néná kuí ni xi xi̱ꞌba̱ xi chjínií.

²⁰ Bo̱a̱ tsꞌén ti̱ndyionrajnú xikótsꞌèn kixindyionjnú nga tsíchji̱a̱jnú Néná.

²¹ A moso̱ xi kastiñá jí nga Néná tsíchjiáa. Ngata̱ nda̱jín maá, ta̱nga tsi ka̱maa̱ ku̱i̱ndyión ndé, bo̱a̱ ti̱ꞌin ji.

²² Ngatꞌa̱ kui nda̱ xi moso̱ xi kastiñá kamá nga Néná tsíchji̱a̱a̱, jè nda̱ xi tikónndé ngindyi̱ko̱n Néná ngotꞌe̱, kó ti̱ bo̱a̱ ti̱ tsꞌén kui nda̱ xi tsoꞌbá ndé nga kandokjo̱a̱a̱, ngotꞌe̱ ꞌne̱ jè moso̱ xi kastiñá xi tsi̱ꞌe̱ Kristoo̱ je kamá.

²³ Ngatꞌa̱ tsie kamáchjí nga kitsꞌítsiejnú, kó ngata̱ boeꞌéndièjínjnú nga moso̱ xi kastiñá tsi̱ꞌe̱ xotaa̱ sa̱ꞌínjnú.

²⁴ Kó kuíni ntsꞌie, xikótsꞌèn tindyiónjnú nga tsíchji̱a̱jnú Néná, bo̱a̱ tsꞌén ti̱ndyion ngasejnú ngindyi̱ko̱n Néná.

Bi̱ tsꞌén atíxomaa̱ Pabloo̱ xota̱ xi síndo kꞌán

²⁵ Kó kjo̱a̱ ngaá xota̱ xi síndo xo̱ngò kꞌaán, jmíjínna ngo kjo̱a̱botíxomaa̱ Ndi̱a̱ná xí tsjàa̱, ta̱nga xiyàa̱ ni xi bee̱ko̱n an, ngatꞌa̱ Néná katsjána kjo̱a̱ni̱ma̱takoón nga kui xi katsꞌénna ngo nda̱ xi si̱ꞌansꞌijíi̱n én xí ku̱i̱chji̱a̱.

²⁶ Tsꞌenkjó án nga ndakjíꞌí nga kꞌuíndo ngase xotaa̱ xikótsꞌèn síndo, ta̱ngatꞌanii̱ kjo̱a̱ni̱ma̱ xi tjín kuí ni̱xtjin xi je timá.

²⁷ A tjiín chjo̱ón. Ngata̱ mindyiséndi̱yèjín ji nga chje̱ꞌéxíntꞌée̱ yojòo̱. A jmíjiín chjo̱ón. Ngata̱ mindyiséndi̱yèjín ji nga ku̱i̱xen.

²⁸ Ta̱nga tsi ku̱i̱xen, tiniꞌínjéjín ji, kó tsi ngo tsa̱kjìn xo̱ngò ku̱i̱xan, tjítsꞌénjéjín. Ta̱nga xota̱ xi ku̱i̱xaa̱n kꞌuieé kjo̱a̱xtii̱ kui nga̱sondiee̱, kó an mejénna nga ku̱i̱tjájinjínjnú kui nii̱.

²⁹ Ta̱nga kui nii̱ xiyàjnúꞌun já ntsꞌie, nga chiboa tsí ni̱xtjin tikón ngase, kuíni nga ni̱xtjin xi chaja ngasee̱, bi̱ xian an nga já xí je tjiín chjo̱on, ngatꞌíndo xikoó tsi jmíjiín,

³⁰ kó xi ndyi̱kjandaá, ngatꞌíndo xikoó tsi ndyi̱kjandàjín, kó xi tsja tjiín, ngatꞌíndo xikoó tsi tsjajíntjiín, kó xi ni ndyi̱ꞌbotsiee̱, ngatꞌíndo xikoó tsi ngojín ni xi tsi̱ꞌe̱,

³¹ kó xi tsja kjimaa̱ nga ndyi̱tsꞌènkjién ni xi tjiín kui nga̱sondiee̱, ngatꞌíndo xikoó tsi tsjajín kjimaa̱ nga ndyi̱tsꞌènkjién, ngatꞌa̱ kui nga̱sondie xi ndyi̱yà ngotꞌe̱ jè ma kjie.

³² Mejénna nga nda̱jín ka̱majnú. Kui nda̱ xi tikón xo̱ngò kꞌaán, nda̱ ngatamaa̱ ni xi tsi̱ꞌe̱ Ndi̱a̱ná, kó nga tsꞌén ni xi tsja ka̱maa̱ Ndi̱a̱ná.

³³ Ta̱nga kui nda̱ xi je ixaán, nda̱ kjimaa̱ ni xi tjiín kui nga̱sondiee̱, ko̱jo tsꞌén ni xi tsja ka̱maa̱ chjo̱ón.

³⁴ Kó bo̱a̱ tsꞌén nga nga joó nga nda̱ kjimaa̱. Kó kui na̱ xi tikón xo̱ngò kꞌaán, ko̱jo na̱ xi kji̱e̱ bixanjiín, nda̱ kjimaa̱ nii̱ Ndi̱a̱ná, kó nda̱ kjimaa̱ xikótsꞌèn tsjie sa̱ꞌínkꞌasꞌiee̱n Néná yojoo̱, ko̱jo ini̱ma̱a̱, ta̱nga kui chjo̱on xí jè tjiín xi̱ꞌii̱n, nda̱ kjimaa̱ nii̱ kui nga̱sondiee̱, ko̱jo tsꞌén ni xi tsja maa̱ xi̱ꞌii̱n.

³⁵ Xiyàjnúꞌun kui nii̱ nganda tsa̱jún, jmí tsi xiyàjnúꞌun tsi̱ꞌe̱ nga an xi ko̱nda̱ꞌyáꞌénjnúꞌun, ta̱sá tsi̱ꞌe̱ nga ni xi nda si̱ꞌánjnú, ko̱jo tsi̱ꞌe̱ nga jmíjín ni xi ku̱i̱ꞌíchjájnú nga nda tsꞌén si̱ꞌansenjnúu̱ Ndi̱a̱ná.

³⁶ Ta̱nga tsi tjín ngo nda̱ xi je índajo̱ ngo tsa̱kjìn xo̱ngò tsi̱ꞌe̱ nga ku̱i̱xan, kó tsi bee̱ko̱n nga chjiéngá je ka̱ma ku̱i̱xanjo̱ ngatꞌa̱ je jachó noó nga ka̱ma ku̱i̱xan kui tsa̱kji̱ín, ngatixanjo̱ ngatꞌa̱ tjítsꞌénjéjín.

³⁷ Ta̱nga tsi xi tjíngoo̱ ko̱n nga kꞌuijñákꞌán, kó tsi ka̱maa̱ ku̱i̱ꞌíꞌniuú yojoo̱, nda sa̱ꞌín tsi ku̱i̱xánjín.

³⁸ Kó kuíni nga xi je índa nga ku̱i̱xaa̱n, nda tjítsꞌén, kó kui xi kꞌuijñákꞌaán, nda ngase tjítsꞌén.

³⁹ Chjo̱ón xi je ixaán tji̱e̱nga tikón xi̱ꞌii̱n, chjiénjín nga ku̱i̱ꞌíjñá, ta̱nga tsi ko̱yà xi̱ꞌii̱n, kui chjo̱ón ka̱ma ku̱i̱xanjo̱ kje̱ꞌe xíꞌín xi mejeén, ta̱nga chjiéngá nga xota̱ xi sꞌijii̱n Néná xí ku̱i̱xanjo̱.

⁴⁰ Ta̱nga bee̱ko̱n an nga tsjá ngase tsꞌén kꞌuijñá tsi ngiti̱ ku̱i̱xánjín, A̱si̱énni̱xtjii̱n Néná boá xi tikónjinna kjiꞌanga bo̱a̱ tꞌíxián an.