1 Xota̱ Korinto̱ 6 - Xo̱jo̱n eén Néná

Bi̱ tsꞌén akóyá Pabloo̱ xikótsꞌèn ka̱mandajin ngo kjo̱a̱xti ngindyi̱ko̱n xota̱ na̱ngo̱xi̱i̱

¹ Kjiꞌanga ngo jún ko̱jo ingo ntsꞌiejnú xi tjínjnú ngo kjo̱a̱xti, míkjo̱a̱a̱ nga xota̱xá xi ti̱ kuijín ni sꞌijii̱n xikoó ñá xi mongínkatiejétꞌajnú, ngindiee̱ nga xota̱ tsjiee̱ Néná xi kongínkatiejétꞌajnúu̱.

² Axa̱ yàjínjnú nga xota̱ tsjiee̱ Néná xí ka̱tso̱yà tsi tjiín ko̱jo tsi jmí jéjiín xotaa̱ kui nga̱sondiee̱. Kó tsi jún boá xi kꞌuiyájnú tsi tjiín ko̱jo tsi jmíjiín jé xotaa̱ kui nga̱sondiee̱, kótsꞌèn nga ka̱májínjnú si̱ꞌandajinjnú ngo ndí ni xi chichí.

³ A yàjínjnú nga ngaskande ndítsjiee̱ Néná ñá xi tsoboána nga kꞌuiyá tsi tjiín ko̱jo tsi jmíjiín jé. Ja̱ kó míkjo̱a̱a̱ nga ka̱májínná si̱ꞌandajin ngo kjo̱a̱xti xi tjisákóná kui nga̱sondiee̱.

⁴ Kó kuíni nga, tsi kjo̱a̱xti tjínjnú kjo̱a̱a̱ nii̱ kui nga̱sondiee̱, míkjo̱a̱a̱ nga xota̱ xi yandikónjín ngi̱jii̱n xota̱ na̱ngo̱xi̱i̱ xi ndyi̱mongínchonjnú nga sa̱ꞌíndajin kui kjo̱a̱xtii̱.

⁵ Xiyà an kui nii̱ tsi̱ꞌe̱ nga soboá ka̱majnú: A nde ngojínjnú xi kjínkónjnú xi ka̱maa̱ sa̱ꞌíndajin ngo kjo̱a̱xti xi tjiín já ntsꞌie.

⁶ Tsi ngo ntsꞌie skjánjo̱ xi ingo ntsꞌiee̱. Míkjo̱a̱a̱ nga ki̱a̱ kongínjnú ngindyi̱ko̱n xota̱ xi sꞌijinjiín Néná tsi̱ꞌe̱ nga sa̱ꞌíndajin kui kjo̱a̱xtii̱.

⁷ Ja̱ je ndajínkjiꞌi nga ti̱ juún tjínjnú kjo̱a̱xti, ta̱nga, ánní nga ta̱sájín niꞌánchíkjo̱a̱jnú nga tjín xi ndajínkjiꞌi ni xi sa̱ꞌínjo̱jnú. Ánní nga ta̱sájín boeꞌéndièjnú nga tjín xi sa̱ꞌínchejéjnú.

⁸ Ta̱sá ti̱ juún ndajínkjiꞌi ni xi ndyi̱niꞌánjnú kó ngaskande ti̱ juún niꞌánchejéjnúu̱ ntsꞌiejnú.

⁹ A yàjínjnú nga xota̱ xi kixi̱jín síndo ngindyi̱ko̱n Néná, sa̱kójiín nga Néná xí ko̱tíxomaa̱. Ngata̱ chꞌíṉcha̱jojínjnú yojojnú, sa̱kójiín nga Néná xí ko̱tíxomaa̱, xota̱ xi tondo̱, xota̱ xi ndyi̱tsꞌéndíkón a̱sie̱én ngo ne xi tsꞌénda xotaa̱, xota̱ xi ndyi̱tsꞌèntꞌaa̱ kjo̱a̱ xkjín, já xí xonda, ko̱jo jáxíꞌín xi xi̱ꞌin xkjín foyojojo̱,

¹⁰ ko̱jo xota̱ xi chejé, xota̱ xi xki̱ꞌá ni, xota̱ xi chꞌi̱, xota̱ xi chꞌo a ko̱jo xota̱ xi ꞌboṉcha̱jo xotaa̱ sꞌe̱ foaꞌáxiín to̱o̱n, ngayeje xota̱ xi bo̱a̱ ndyi̱tsꞌe̱én sa̱kójiín nga Néná xí ko̱tíxomaa̱.

¹¹ Kó tjín jún xi kui nii̱ kiniꞌánjnú ngasꞌe̱, ta̱nga ngotꞌe̱ ꞌne̱ je kiniꞌántsjiejónjnú yojojnú, kó je tsjiejnú ko̱jo je xota̱ kixi̱jnú ngindyi̱ko̱n Néná, kó ngaꞌniuú Ndi̱a̱ná Jesukristoo̱ ko̱jo A̱si̱énni̱xtjii̱n Néná xí katsꞌén kui nii̱.

Bi̱ tsꞌén akóyá Pabloo̱ nga Néná xí tsi̱ꞌe̱ yojoná

¹² “Ngayeje nii̱ xi tsjandiè kjo̱a̱kitii̱ nga ka̱ma sa̱ꞌin an”, ta̱nga jmí tsi ngayeje nii̱ xi nda sa̱ꞌínna. “Ngayeje nii̱ xi tsjandiè kjo̱a̱kitii̱ nga ka̱ma sa̱ꞌin an”, ta̱nga tsjandièjín an nga ngo kui nii̱ xi sa̱ꞌínna tsi̱ꞌe̱ nga kui xi ko̱tíxomana.

¹³ Ni chiniee̱ tsi̱ꞌe̱ ndo̱ꞌo̱stsa̱ná boá, kó ndo̱ꞌo̱stsa̱ná tsi̱ꞌe̱ nichiniee̱ boá, ta̱nga nga jó kui nii̱ xi sa̱ꞌínkjié Néná. Ta̱nga yojoná jmí tsi katseꞌéná tsi̱ꞌe̱ nga tondo̱ ka̱ma ñá, ta̱sá tsi̱ꞌe̱ nga xaá Ndi̱a̱ná xi si̱ꞌán, ngatꞌa̱ yojoná tsi̱ꞌe̱ Ndi̱a̱ná boá.

¹⁴ Néná katsꞌénkjién ngaꞌniuú nga katsꞌénkjaꞌáꞌyaá Ndi̱a̱ná kó ti̱ bo̱a̱ ti̱ tsꞌén sa̱ꞌínkjaꞌáꞌyáná ñá nga.

¹⁵ Nga ngo nga ngojnú jún ki̱a̱ ndokjo̱a̱nijnú na̱ngo̱xi̱i̱, kó na̱ngo̱xi̱i̱ kuí xí yojoo̱ Kristoo̱. Kó nga ngo nga ngojnú Kristoo̱ ndokjo̱a̱nijnú, kuíni nga ndajínkjiꞌi nga ngo xi chji̱a̱ni kui yojoo̱ xi na̱masien ko̱e̱je̱ tsꞌéntsjàjo̱.

¹⁶ A yàjínjnú nga kjiꞌanga ngo nda̱ xi ko̱e̱je̱ tsꞌéntsjàjo̱ ngo na̱masien, je katsꞌéngo yojoo̱ kui ko̱jo kui na̱ masiee̱n. Ngatꞌa̱ bi̱ tsó xo̱jo̱n eén Néná: “Nga joó ta̱ ngo tsi yojo ka̱ma.”

¹⁷ Ta̱nga kui xota̱ xi ndyi̱tsꞌèngojo̱ yojoo̱ Ndi̱a̱ná, ta̱ ngo tsi A̱siénni̱xtjin ma nga joó.

¹⁸ Ti̱yójnúu̱ kjo̱a̱tondoo̱. Ngayeje kje̱ꞌe jé xi sa̱ꞌín ngo xota̱ jmí ni tsꞌénjiín yojoo̱, ta̱nga tsi ngo xi tondo̱, ti̱kuíní yojoo̱ xi tjítsꞌénkjátsón.

¹⁹ A yàjínjnú nga yojojnú na̱ngo̱xi̱i̱ A̱si̱énni̱xtjii̱n Néná boá. Néná xi katsjájnú A̱siénni̱xtjin xi tikónjinjnú. Júnjín xi tsa̱jún yojojnú.

²⁰ Ngatꞌa̱ Néná je tsꞌatsiejnú nga katsjá ngo chjí, kó kuíni nga ti̱ꞌankjiénjnú yojojnú tsi̱ꞌe̱ nga ko̱e̱ꞌéjnúu̱ kjo̱a̱je Néná.