1 Timoo̱ 3 - Xo̱jo̱n eén Néná

Bi̱ tsꞌén akóyá Pabloo̱ kjo̱a̱a̱ ꞌyá xota̱ xi ka̱ma sa̱ꞌínxá ngi̱jii̱n xota̱ na̱ngo̱xi̱i̱

¹ Én xí maꞌniátakón boá xi̱ꞌbi̱: Tsi tjín xí mejeén nga kui xi ngito̱ko̱o̱ na̱ngo̱xi̱i̱ ka̱ma, ndakjíꞌí xá xí mejeén sa̱ꞌín.

² Ta̱nga chjiéngá bi̱ kon ka̱ma xi mejeén nga xota̱ xi ngito̱ko̱o̱ na̱ngo̱xi̱i̱ ka̱ma: Nga jmíjín xi chꞌo tsꞌén ku̱i̱chji̱a̱taꞌin, ko̱jo nga ta̱ ngo tsi chjo̱on tjiín, ko̱jo nga nda kjótsoꞌbájo̱ yojoo̱, ko̱jo nga nda sa̱ꞌínkjiín kon ni xi sa̱ꞌín, ko̱jo nga xcha̱ndikón, ko̱jo nga chjiéngá sa̱ꞌíntiee̱ xotaa̱ nga ki̱a̱ kꞌuíndo ndiꞌaa̱, ko̱jo nga chjiéngá ka̱maa̱ ko̱kóyá,

³ ko̱jo chjiénjín nga tsꞌatio kꞌuí bino̱, ko̱jo ka̱májín tamá ka̱ma, ko̱jo chjiéngá nda ini̱ma̱ ka̱ma, ko̱jo chjiéngá xió kjótsoꞌbá, ko̱jo jmí tsi xke̱éto̱n ka̱ma.

⁴ Chjiéngá nda ko̱tíxoma ndiꞌaa̱, ko̱jo nga ka̱maa̱ sa̱ꞌín chji̱ni̱e̱ ndií nga ku̱i̱ntꞌiéꞌén ko̱jo nga sku̱i̱e̱ndikón.

⁵ (Ngatꞌa̱ nda̱ xi májiín botixómaá ndiꞌaa̱, kótsꞌèn ka̱maa̱ skoón xota̱ na̱ngo̱xi̱i̱ Néná).

⁶ Jmí tsi ngo nda̱ xi sꞌe̱ tsi kisꞌijii̱n Néná, ngatꞌa̱ tsi ta̱ je ka̱maa̱ yojoo̱, kó xikótsꞌèn kamájeé xindajín ndiabloo̱ bo̱a̱ ka̱maa̱.

⁷ Ti̱ chjiéngá xcha̱ndikón ngi̱jii̱n xota̱ xi kji̱e̱ bejín Néná, tsi̱ꞌe̱ nga jmíjín xi chꞌo ka̱tso̱ kjo̱a̱a̱ kui, kó nga kꞌo̱kajinjín kjo̱a̱chꞌáṉchaa̱ xindajín ndiabloo̱.

⁸ Kó ti̱ bo̱a̱ tsꞌén já xí bosikójo já ngito̱ko̱o̱ na̱ngo̱xi̱i̱ chjiéngá já xí yandikón ka̱ma, ko̱jo xí ku̱i̱ꞌíndisojín, ko̱jo xi kꞌo̱tiójiín nga kꞌuí bino̱, ko̱jo xi jmí tsi ka̱mamejeén to̱n xi ndajín tsꞌén kasako.

⁹ Chjiéngá ꞌniú kꞌuíndojin kjo̱a̱sꞌijii̱n, kui ni xi ikꞌíjñáꞌma ngasꞌe̱, ta̱nga ngotꞌe̱ ꞌne̱, je tjisꞌíjñátsijen, ko̱jo nga tsjietsꞌén kꞌuijñá kjo̱a̱kjíntakoón.

¹⁰ Chjiéngá tjón mára stsitsíjen cha̱n cha̱n tsi nda tsꞌén síndo, kó tsi jmíjín xi ka̱maa̱ chꞌo tsꞌén ku̱i̱chji̱a̱taꞌin, ka̱ma xota̱ xi ko̱síko̱jo já ngito̱ko̱o̱ na̱ngo̱xi̱i̱ ka̱ma.

¹¹ Ti̱ bo̱a̱ ti̱ tsꞌén ínchjiín kui jaá, chjiéngá xcha̱ndikón, ko̱jo nga ku̱i̱ꞌíndisotaꞌinjín xota̱, ko̱jo nga nda tsꞌén kꞌuijñá kon, ko̱jo nga kui xi ka̱ma ka̱maꞌniátakón kjo̱a̱a̱ ngayeje nii̱.

¹² Nda̱ xi ko̱síko̱jo já ngito̱ko̱o̱ na̱ngo̱xi̱i̱, chjiéngá ta̱ ngo tsi chjo̱on kꞌuieé, kó chjiéngá nda ko̱tíxomaa̱ ndií, ko̱jo xota̱ xi síndo ndiꞌaa̱.

¹³ Ngatꞌa̱ nda̱ xi ko̱síko̱jo já ngito̱ko̱o̱ na̱ngo̱xi̱i̱ xi nda tsꞌén sa̱ꞌín xaá, yandikón kó tjiín kjo̱a̱ꞌniátakón nga chji̱a̱ kjo̱a̱a̱ nga sꞌijii̱n Kristo̱ Kjisoo̱.

¹⁴ Kui nii̱ tjítsꞌenꞌindoó, kó tsꞌénkoyàa̱ nga tsá kjuínkoón,

¹⁵ kó tsi kꞌo̱ndíyána, mejénna nga xchi̱e̱ ji kótsꞌèn ꞌbíndo xota̱ xi tsi̱ꞌe̱ Néná, kuí boá kui xotaa̱ xi na̱ngo̱xi̱i̱ Néná xi tikoón. Xota̱ na̱ngo̱xi̱i̱ kuí boá xi kjininkꞌá, ko̱jo xi tsja ngaꞌniuú én xí ja̱koxi̱i̱.

¹⁶ Kó tikón tsijen tsijen nga ta̱nisién je ni xi sꞌijinná, ni xi kisꞌijña ꞌma ngasꞌe̱, kó Néná je tsꞌénbokóná ngotꞌe̱, kuí ni xi̱ꞌbi̱: Néná akó yojoo̱ nga xota̱ kamá, A̱si̱énni̱xtjii̱n akó nga kui xi kixi̱, ndítsjiee̱ kamábe. Ikꞌíni̱jmi̱ì xota̱ na̱xi̱ńdá xí tjiín, kiniꞌánsꞌijin kui nga̱sondiee̱, kó kisꞌiee̱ kjo̱a̱je nga kijí ndiꞌakꞌajmii̱.