Jean 16 - Mofa New Testament

¹ Ma haha i gaƋa kinè, skwa da slafaƋama kinè sak ɓai!

² Ta da dzar kinè auda te gihi njèngè ma Zhiklè tenga'a. Patsa'a a di a shkè, aman ndo staƋ staƋ tèlèba man a kede kinè, a hérè te ndav na, a ngu skwi man ambaba Zhiklè.

³ Skwi ar haha ta da gia'a, te man ta sun Bab ga ɓai, a ta senyè ɓai, cèw ba.

⁴ Aman ma haha i gaƋa kinè; te deɓa'a man a da gai, a haka kinè a gèƌ, a gu ara man i gaƌa kinè. I gaƌa kinè ma haha te va nasa ɓai, te man nga nza a nda kinè.

⁵ Aman antanta i Ƌè a sam nenga'a man a zlindekayè, ko ndo staƋ te ndev kinè a dzhadyè azɓai: Ka Ƌè ma?

⁶ Ndav kinè a kudai, a géƌ man i gaƋa kinè ma haha.

⁷ Aman i gaƋa kinè skwi nzura'a a vava: Dara man i Ƌè ga! Man i Ƌè ga azɓai, ar nenga'a man a nzaka kinè a deɓa a shkè a sam kinè azɓai. Aman i Ƌè, i da zlindkoƌi a sam kinè.

⁸ A nenga'a a shkè, a ngreda ta mali ta a ndohi herkeda, a ngizura'a, a kita.

⁹ Mali ta sa, aman ta da ciyè a ndav ɓai.

¹⁰ Ngizura'a sa, aman i Ƌè a sam Bab ga, a kin rkayè azɓai,

¹¹ Kita sa, aman ta ga na kita a géƌ a madzagai.

¹² Njèkèdi ma ga man i woy a i gaƋa kinè a zhè a vata. Aman antanta kin slaha kin cè di ɓai.

¹³ Aman nenga'a, Mèzhèɓ nzura'a nda shkè ma, a ngreda kinè ma nzura'a tèlèba. Aman nenga'a a gèƋè ma te gèƋ na azɓai. Aman ma man a tsena'a, a gèƋè'a; a ngreda kinè skwi man a di a shkè.

¹⁴ Nenga'a a da nzalyè, a skwi tèlèba a da cè a sam ga, a da ngreda kinè.

¹⁵ Skwi tèlèba man Bab ga a ngotso, skwi ga. Gar Haha i gaƋa, a cè te skwi ga, a da ngreda kinè.

¹⁶ A n'nzi kètè, kin da rkayè azɓai; te deɓa kètè kin da rkayè.

¹⁷ Te va golahi nenga'a ngiƌè ta goƌ a va ta: Ma mè, man a gaƌa nga: A n'nzi kètè, kin da rkayè azɓai. Te deɓa kètè, kin da rkayè, a i Ƌè a sam Bab ga?

¹⁸ A ta gaƌa: Naha mè, man a gaƌa: A n'nzi kètè? Nga sun ma man a gèƌè ɓai.

¹⁹ Yèsu a suna, ta woy a ta jhèƌè'a, a ngaƌa ta: Kin verslè a gèƌ man i gaƌa kinè: A n'nzi kètè, kin da rkayè azɓai. Te deɓa kètè, kin da rkayè, ƌè?

²⁰ A vava, a vava, i gaƌa kinè, kin da kuƌai, kin da gi wobau. Aman ndohi herkeda ta da wuffè. Kin da lèyè; aman nlèyè kinè a da ngwèƋè na a mwuffè.

²¹ Ngwoz man a yi kra, a si matakwan a gèƌè'a, te man pats nyi kra na ma. Aman te deɓa'a man a ye kra ma, a hér matakwan na asaɓai, aman a wuffè a géƌ kra man a yokoƌai.

²² Kinè ba, antanta kin lèyè te ndav kinè. Aman nga da ngècè va za'a, a ndav kinè a da wuffè, ndo ngiƌè a da cè mwuffè auda te ndav kinè azɓai.

²³ A pats nasa kin da jhèƌè ma ngiƌè a sam ga azɓai. A vava, a vava, i gaƌa kinè: Skwi ko mèmè kin jhèƌè te ri Bab ga, a da va kinè a nzlembaƌ ga.

²⁴ Ha nshkè na ma a mpatsna, kin dzhaƌa skwi a nzlembaƌ ga ɓai. Vodzhoƌo, a kin ngècè'a, a mwuffè kinè agijèlèlè'a.

²⁵ Ma haha i gaƋa kinè ara ngèlègèƋma. Patsa a di a shkè, aman i gaƌa kinè a ngèlègèƌma azɓai, aman i ngrèƌè ma a géƌ Bab ga auda tsaraya tèlèba.

²⁶ A pats nasa kin tsi ri a Zhiklè a nzlembaƌ ga, a i da gaƌa kinè: i tsi ri a Bab ga a géƌ kinè — asakaɓai.

²⁷ Aman Bab ga a ri na a woy kinè, a géƌ man kin woy iyè, a kin co a ndav kinè, i shkè te Bi Zhiklè.

²⁸ I shkè a sam Bab ga, a i shkèhi a herkeda. Anai i jèkeda herkeda za'a, a i Ƌè a sam Bab ga.

²⁹ A golahi Yèsu ta gaƋa na: Na haha, antanta ka pa a ma asaɓai, ka goƋ a ngèlègèƋma asaɓai.

³⁰ Antanta nga suna, ka sun skwi tèlèba, ko ndo ngiƋè a ndzhaƋ ka ɓai. Gar haha nga co a ndav nga, ka shkè te Bi Zhiklè.

³¹ Yèsu a ngaƋa ta: Antanta kin co a ndav kinè Ƌè?

³² Na haha patsa a di a shkè, ani a zhè ma, aman ta venda kinè gèƋ staƋ staƋ tèlèba, a kin jèkyè a géƋ ga. Aman iyè a géƋ ga ka ɓai. Nga a Bab ga.

³³ Na haha i gaƋa kinè. A kin gumi te iye. T'herkeda matakwan a ga kinè. Aman vagsa ndav kinè, i ngul herkeda.