Actes 15 - Mofa New Testament

¹ Ndohi ngiƋè ta shkè te kokwar Judée, a ta slebda ta kramamhai: Aman kin ngél ngwon azɓai, ara man Moise a gaƌa, kin slaha a kin mbél kinè azɓai.

² Aman ta gu ma a Paul, a Bamabas, a ta vursl ma kumba a nda tenga'a. A ta basla gèƋ ta, aman Paul a Bamabas a ndohi ngiƋè te kokwar Antioche ta Ƌè a kokwar Jérusalem a sam ndohi sak a ndohi nhala'a, a ta geƋè, a ta jhèƋ ma haha.

³ A mpi ndohi Zhiklè ta fèda ta ma a civèƋ, a ta bozl ndev kokwar Phénicie a Samarie, a ta ngreda, ara man ndohi nte deɓa ta ngwodko ndav ta a sam Bi Zhiklè. A ndohi Zhiklè te pa tèlèba ta wuffè a géƋ ma haha.

⁴ Aman ta shkè a kokwar Jérusalem, mpi ndohi Zhiklè a ndohi sak a ndohi mɓer ndohi Zhiklè ta ce ta. A ta ngreda skwi tèleba man Zhiklè a gau a nda tenga'a.

⁵ A ndohi ngiƋè te va ndohi pharisie, man ta co Yèsu a ndav ta, ta slambaƋa, a ta gaƋa: Sèi ta ngél ngwon, a ta gi skwi tèlèba, ara ma kita Zhiklè man Moise a va nga, a gaƋa.

⁶ A ndohi sak a ndohi nhala'a ta ɓica va, a ta tsomma a géƋ ma haha.

⁷ Aman ta tsama ma kumba ma, Pierre a nslambaƋa, a ngaƋa ta: Dalahimam ga, kin suna, n'nzi a zhè Zhiklè a nco ndo auda te ndev kinè, a woya ndohi nte deɓa ta tsena ma mbela'a te ma ga, a ta cè a ndav.

⁸ A Zhiklè man a sun ndav ndohai, a ngu malwuƋai a sam tenga'a, a mva ta Mèzhèɓ Zhiklè lèmèlèmè ara man a nga,

⁹ a pèr ndo mpèrè ka ɓai, a mpana ndav tenga'a man ta co a ndav lèmèlèmè ara man a nga.

¹⁰ Kin jkeda Zhiklè èhèmè; kin woy a kin kelawa ta wof a da'ai a ndohi Yèsu, man ko bababhi nga, ko kinè, ta slaha ta zhüɓa ɓai.

¹¹ Aman nga co a ndav, nga mbel nga a géƋ pombi Bi Yèsu Kristi, tenga ba lèmèlèmè.

¹² Nhèy ndo tèlèba ta nza tètè, a ta tsena ma Paul a Bamabas, ara man ta ngreda nrkedihai a skwi kumba man Zhiklè a ngau a nda tenga'a a sam ndohi nte deɓa.

¹³ Te deɓa'a man ta gaƋa ma klèng ma, Jacques a ngaƋa:

¹⁴ Dalahimam ga, vatsena'a! Simon a n'ngra nga, ara man Zhiklè a baba ta ndohi nenga'a te va ndohi nte deɓa, aman ta cè nzlembaƋ na.

¹⁵ Gar haha ma ndohi nhadka ma, ma nzura'a, ara man ta windo te Ƌèlèwèr Zhiklè:

¹⁶ I woy a i shkè deɓa, a i rèm gi David za'a, man m'mbeƋ na hai. A i woya man i til njèkèƋia'a, a i zlatseda a pa za'a,

¹⁷ a ta jhèƋè ma Bi Zhiklè njèkèƋi ndohi herkeda tèlèba, a ndohi nte deɓa man i woy ta a ndohi ga.

¹⁸ Bi Zhiklè a goƋ ar haha, nenga'a man a gi skwi haha tèlèba, a ngreda auda n'nzi a zhè.

¹⁹ Gar haha i gaƋa: Da dzakaɓama ta gèƋ a ndohi nte deɓa, man ta ngwoda ndav ta, ɓai!

²⁰ Aman sèi da winda ta ƌèlèwèr, aman ta jèkeda mbèh skwai, a mphömè, a skwi m'mets m'metsai, a ta si pombaz azɓai.

²¹ Daga zlèzlèa, ndohi Moise ta nju ma Moise te kokwar tèlèba, a ta jèngè'a te gi njèngè ma Zhiklè a pats nshèk va pèc pècèk.

²² A ndohi sak a ndohi nhala'a a mpi ndohi Zhiklè tèlèba ta hur amba, a ta por ndohi te va tenga'a, a ta zlinde ta a kokwar Antioche a verzi nda Paul a Bamabas: Jude, man nshibèn na Barsabas; a Silas, nsalsalhia'a te va kramamhi ta.

²³ A ta va ta Ƌèlèwèr a rai, aman mwinƋèa te pa: Ndohi sak a ndohi nhala'a, a sam kramamhi nga a civèƋ Zhiklè, te va ndohi nte deɓa te kokwar Antioche a Syrie a Cilicie: Vombali kinè!

²⁴ Aman nga tsena'a, ndohi ngiƋè te ndev nga, man nga nzlinde ta ka ɓai, to do, a ta dzakaɓama kinè gèƋ, a njèma tenga'a,

²⁵ nga basla gèƋ nga, tèlèba a ndav staƋ, a nga por ndohi man nga zlinde ta a sam kinè a verzi nda Bamabas a Paul, man nga woy ta,

²⁶ ndohi man ta pi ndav a mizlinè Bi Yèsu Kristi.

²⁷ A nga zlündo Jude a Silas, aman ta da menda kinè ma Ƌèlèwèr haha a ma ba.

²⁸ Ma Mèzhèɓ Zhiklè, a ma nga ba, aman nga fa kinè skwi mwuƋitpa ngiƋè a gèƋ azɓai, sèi skwi haha, man sèi kin gia'a nƋèzl:

²⁹ Vajèkeda n'ndi vrai, kin sau pombaz ɓai, kin ndau skwi m'mets m'metsi ɓai, a kin gu mphömè ɓai! Aman kin ɓir va kinè te skwi haha, kin gi amba. Vambali di mènè!

³⁰ Aman ta zlinde ta ma, to do a kokwar Antioche, a ta ɓic ta ndohi Zhiklè tèlèba, a ta va ta Ƌèlèwèr.

³¹ Aman ta jongo, ta wuffè a géƋ ma man ta bid ta a vna.

³² A Juda a Silas, tengahia ba ndohi nhadka ma, ta bid ta kramamhi ta a ma kumba, a ta va ta wuƋai.

³³ Aman ta nza a pa n'nzi kètè, kramamhi ta ta fèdoko ta ma a civèƌ, a ta men ta a deɓa a sam ndohi nzlinde ta.

³⁴ [Aman Silas, nenga'a a nhur amɓa man a nzi a pa, a kokwar Antioche.]

³⁵ A Paul a Bamabas ta nza a kokwar Antioche, ta senda ta, a ta njè ta ma Bi Zhiklè a nda ndohi ngiƋè kumba.

³⁶ Te deɓa kètè Paul a ngaƋa na Bamabas: Ngodokoy a deɓa a kokwar tèlèba, man nga nju ma Bi Zhiklè te pa, a nga da rka kramamhi nga, ta gu kè?

³⁷ Barnabas a woy a ta cè Jean, nshibèn na Marc, a nda tenga'a.

³⁸ Aman Paul a woya ɓai, a nhur ndo man a wuckaƋ na te kokwar Pamphylie, a n'nga mizlinè a ma ma a nda tenga'a ɓai, amba aman ta cè a a nda tenga'a ɓai.

³⁹ A ta vursl ma a géƋè'a kumba, a ta kezla gèƋ ta, a Bamabas a nco Marc, a mdo a Chypre a wurom.

⁴⁰ A Paul a nco Silas, a to do a vna, a kramamhi ta, ta pe ta a ri pombi Zhiklè.

⁴¹ A nenga'a a mbozl ndev kokwar Syrie a Cilicie, a mva ta wuƋai a mpi ndohi Zhiklè.