YOANO 6 - Disambi Dipyadipya

¹ KUNYUMA kwa bintu bebi, kwakaya Yisu ku dixia dia kitelenena kia Ngalili, kidi kia Tibeliasa.

² Yi kimbukuma kinene kiakamulanda bwalo bwakamonabo bilayixilu biakakwencayi kudi batati ba masama.

³ Yisu lolo akabanda pa lupongo yi akaxikama papa yi beyi banci.

⁴ Mo Kidikixilu (kitula kia bena Yuda) kiakadi pepe.

⁵ Mbwôso Yisu akasangola meso anci, akamona kimbukuma kinene kilolwa kudiyi, yi akatôyela Filipi ene, Tunakwola mampa kupai, bixedya bantu baba ?

⁶ Mo akatôya noku ndo kumwelekyesa, bwalo bwakalubukwayi mikyenci bixekwencayi.

⁷ Filipi akamupingasa ene, Mampa a diso dia nkama ibidi ya denalio kasobakuka, bixeangata muntu mwoso isanga kicini kibende.

⁸ Umo mweyi anci, Andelo, Ximono Pita mwakunyenci, akamwambila ene,

⁹ Kunu kudi mwana a babalumi udi yi mampa atano a bali, yi tuyixi tubende, kate nako kudi beci bwalo bwa bantu bungi noku ?

¹⁰ Yisu ene, Nuxikiki bantu. Mu kidi kieki lolo mwakadi maxindi mangi. Mbwôso babalumi bakaxikama, lwedi lwabo Iwakadi pepe yi nkone itano.

¹¹ Yisu lolo akangata mampa, yi pakadi amaxinga, akakwabanyila bantu bamaxikama ; mo nako kabidi yixi, ku lwedi lwakadilabo.

¹² Yi pakadi bamakwokutixibwa, akatôyela beyi banci ene, Nukokyeyi bi cini biamasala, bitaxencimina kintu kioso kanana.

¹³ Mbwôso bakabikokyeya, yi bakakwolubisa bibata disangi yi bibidi tô tô tô bia bicini bia mampa atano a bali biakasala kudi bantu bakadya.

¹⁴ Mbwôso pakamona bantu kilayixilu kiakakwencayi, bakatôya ene, Sôsôlwo, you udi mudimuxi you ulolwa ku loboko.

¹⁵ Yisu lolo, pakalubukwayi ene, baxelwa mukwata ku ngulu ndo kumuteka fumu a mbata akancuka kabidi kuya ku lupongo, mikyenci mutupu.

¹⁶ Mo pakakwela butuku, beyi banci bakapweka ku mai ;

¹⁷ yi pakadi bamakondela mu kibusu, bakalekyeia mu kitelenena kuya ku Kapenaumu. Kwakadi lolo mwedima nkyekyu, yi Yisu akadi kasolwa kudibo.

¹⁸ Yi mai akatepa tepa bwalo bwa lupepele lukola lwakapupuya.

¹⁹ Mbwoso pakadi bamafuba “ stadia ” ndo masangi abidi yi itano ndo masangi asatu, bakamona Yisu udi mu kwenda kulu kwa mai, ulu kulwa pepe yi kibusu, yi bakadi yi bowa.

²⁰ Kaninga akabambila ene, Meme kayou ; kanucini.

²¹ Ndo biakanangabo kumwangata mu kibusu ; yi kibusu kiakafika nkyekyu nkyekyu ku mbata kwakayabo.

²² Mankyelo kimbukuma kiakakwemana ku dixia dia kitelenena bakamona kamo kabusu kakyenako katena kamokamwe, yi Yisu akadi kayili yi beyi banci mu kibusu, kate beyi banci bakancuka mikyeabo ;

²³ (kaninga tumo tubusu tubende twa ku Tibeliasa twakalwa pepe yi kidi kiakadyabo mampa pakadi Fumu amaxinga ;)

²⁴ mbwôso pakamona bantu Yisu kiena koku ndo beyi banci, mikyeabo bakakondela mu tubusu yi bakalwa ku Kapenaumu badi mu kupalala Yisu.

²⁵ Yi pakadi bamamusañana ku dixia dia kitelenena bakamwambila ene, Labi, wapulwa kunu ku kikondo kai ?

²⁶ Yisu akapingasa yi akabambila ene, Sôsôlwo, sôsôlwo, nwatôyela ene, Nungwapalala, kumoni bwalo bunwakamona bilayixilu, kate bwalo bunwakadya mampa yi nwakakwokuta.

²⁷ Kanukambidi bidya biancimina, kate bidya biasala ku môyo ă kô kô, binanupa Mwana a muntu, bwalo bwamamutekyela Tete kilembetelu, isanga Ncembi.

²⁸ Mbwôso bakamwambila ene, Tunakwenca kai bituxekisa makisa a Ncembi ?

²⁹ Yisu akapingasa yi akabambila ene, Kunu kudi mudimo ă Ncembi, ene, nwetabuxili you amatumayi.

³⁰ Ndo biakamwambilabo ene, Kilayixilu kai kiencenca owe, bituxemona yi bituxekwetabuxila ? Wakisa kai ?

³¹ Batetecu bakadya “ mana ” mu mbata a kisobe, bea biakafundibwa ene, Akabapa bidya bia mu diulu kudya.

³² Mbwôso Yisu akabambila ene, Sôsôlwo, sôsôlwo, nwatôyela ene, kakwakadi Mosese akanupela bidya bia mu diulu ; kate Tetemi unupapa bidya bia sôsôlwo bia mu diulu.

³³ Bwalo budi bidya bia Ncembi bebi biapweka mu diulu, yi bipapa loboko môyo.

³⁴ Mbwôsô bakamwambila ene, Fumu, utupi bebi bidya matuku moso.

³⁵ Yisu akabambila ene, Meme ndi bidya bia môyo ; you ulolwa kundi kanakwombwa ncala nyô, yi you ungwetabuxila meme kanakwombwa nyota nyô.

³⁶ Kate napunwambila ene, nwamangumona kabidi yi kanusokwetabusa.

³⁷ Bungi bwa bantu bangupapa Tete banalwa kundi ; yi you ulolwa kundi, meme kinamupiya pô.

³⁸ Bwalo bunamapweka mu diulu, kumoni kukisa nyinga yamene mikyemi, mo nyinga ya you akangutuma.

³⁹ Yi kunu kudi nyinga ya you akangutuma ene, bintu bioso biakampayi, meme kixencimisa kintu kimokimwe, kate nxekibisa ku dituku dia ku sula.

⁴⁰ Yi kunu kudi nyinga ya Tetemi, ene, muntu mwoso amona Mwana, umwetabuxila, uxeakala yi môyo ă kô kô ; yi meme nakumubisa ku dituku dia ku sula.

⁴¹ Mbwôso bena Yuda bakamupindudila bwalo bwakatôyayi ene, Meme ndi bidya biamapweka mu diulu.

⁴² Yi bakatôya ene, Ki yei ndo Yisu, mwana a Yosefe, utwamalubukwa tetenci yi mamanci ? Ape yei atôya nkyekyu beci ene, Namapweka mu diulu ?

⁴³ Yisu akapingasa yi akabambila ene, Kanupindulanani.

⁴⁴ Muntu kabiyi kulwa kundi kutena Tete akangutuma amamuputa ; yi meme nakumubisa mu dituku dia ku sula.

⁴⁵ Ku mikanda ya badimuxi kwamafundibwa ene, Banakweyexebwa bungi bwabo kudi Ncembi. Muntu mwoso amakwombwa kudi Tete, yi amakweya, ulolwa kundi.

⁴⁶ Kakulexi yi kutôya ene, muntu amamona Tete ; you mutupu udi a Ncembi, yei amamona Tete.

⁴⁷ Sôsôlwo, sôsôlwo, nwatôyela ene, You ungwetabuxila meme udi yi môyo ă kô kô.

⁴⁸ Meme ndi bidya bia môyo.

⁴⁹ Batetenu bakadya “ mana ” mu mbata a kisobe yi bakamafwa.

⁵⁰ Bebi noku bidi bidya biapweka mu diulu bixebidya muntu, yi bitaxefwayi.

⁵¹ Meme ndi bidya bebi bitani yi môyo biamapweka mu diulu ; aka muntu unakala amadya bidya bebi unakala yi môyo matuku moso ; mo bidya binapa bidi munyu ămene, bwalo bwa môyo ă loboko.

⁵² Mbwôso bena Yuda bakakwelesañana mbata, ene, Ape yei unatupa munyu ănci kudya beci ?

⁵³ Biakabambila Yisu ene, Sôsôlwo, sôsôlwo, nwatôyela ene, Kutena nunakala nwamadya munyu ă Mwana a muntu, yi nwamanwa maxi anci, kanuna yi môyo munda mwenu.

⁵⁴ You udedya munyu ămene, unonwa maxi amene, udi yi môyo ă kô kô, yi meme nakumubisa ku dituku dia ku sula.

⁵⁵ Bwalo budi munyu ămene bidya bia sôsôlwo, yi maxi amene adi mai a sôsôlwo.

⁵⁶ You udedya munyu ămene, unonwa maxi amene ndo asala munda mwamene, yi meme munda mwanci.

⁵⁷ Bea biakangutuma Tete a môyo, yi meme ngwakala yi môyo ku bwalo bwa Tete, ndo bidi you ungudedya meme, yei kabidi unakala yi môyo ku bwalo bwamene.

⁵⁸ Bebi ndo bidya biakapweka mu diulu. Kumoni bea biakadya batete yi bakafwa ; you udedya bidya bebi, unakala yi môyo kô ko.

⁵⁹ Malo aa noku ndo akatôyayi mu kixingidilu biakakweyesayi mu Kapenaumu.

⁶⁰ Mbwôso beyi banci bangi, pakakwombwabo, bakatôya ene, Diyi dedi didi kukola ; ñani ubili kudiombwa ?

⁶¹ Kaninga Yisu, akadi amadilubukila munda mwanci ene, beyi banci bamapindudila bwalo bobu, akabambila ene, Bwalo bobu bwamanuponesa ?

⁶² Ape ndo nuxemona Mwana a muntu udi mu kuximuna kwakadiyi kalikali ?

⁶³ Kudi Mwoxixi upapa môyo, munyu kausotetowa kintu ; meyi anamanwambila adi mwoxixi, yi adi môyo.

⁶⁴ Kate banga badi yinenu batasokwetabusa. Bwalo bwakalubukwa Yisu bantu pôi bubangabanga bakadi kabasokwetabusa, yi muntu you uxemwenga.

⁶⁵ Yi akatôya ene, Ndo binapunwambila ene, Muntu kabiyi kulwa kundi kutena kwamamupebwa kudi Tete.

⁶⁶ Pôi kikondo kieki pakapiñana banga beyi banci bangi, yi bakadi kabasokwenda yinanci kabidi.

⁶⁷ Mbwôso Yisu akatôyela disangi yi babidi ene, Nonu kabidi nwakyeba kuncuka ?

⁶⁸ Ximono Pita akamwambila ene, Fumu, tunaya kudi ñani ? Owe udi yi meyi a môyo ă kô kô.

⁶⁹ Yi coco twamakwetabusa yi twamalubukwa ene, owe udi Muntu a babala a Ncembi.

⁷⁰ Yisu akabapingasa ene, Ki nakanusungula disangi yi babidi ? yi umoumwe udi yinenu udi diabolo.

⁷¹ Akatôya lolo dia Yudaxi, a Ximono, muna Ixikalioto, bwalo buxemwenga you noku, muna disangi yi babidi.