YOANO 15 - Disambi Dipyadipya

¹ MEME ndi muci ă finyo ă sôsôlwo, yi Tetemi udi munami.

² Ditamba dioso munda mwamene ditasokama mamoma, yei udiancula ; yi ditamba dioso diamakama mamoma, yei udiakupulula bixekamadio amo mamoma.

³ Nonu nudi susu nkyekyu bwalo bwa diyi dinamanutôyela.

⁴ Nusali munda mwamene, yi meme munda mwenu. Bea bitabiyi ditamba kudikamina mamoma mikyedio kutena diamasala mu muci ă finyo, ndo binutabiyi nonu kabidi, kutena nwamasala munda mwamene.

⁵ Meme ndi muci ă finyo, nonu nudi matamba. You amasala munda mwamene, yi meme munda mwanci, kayou akamañana mamoma mangi, bwalo bunutabiyi kwenca kintu kioso kutena meme.

⁶ Aka muntu kasosala munda mwamene, amakwelebwa mutu luna ditamba, amakwoma ; bantu lolo basangisa yi belela mu mudilu, yi alolwa kwoxebwa.

⁷ Aka nwamasala munda mwamene yi meyi amene amasala munda mwenu, nulombi mwoso munwananga yi munanukixidibwa.

⁸ Nako kwamatumbixibwa Tetemi, nonu kukama mamoma mangi, yi nunakala beyi bamene.

⁹ Bea biamangunanga Tete ndo binamanunanga kabidi ; nusali mu nyinga yamene.

¹⁰ Ndo nunanama milangu yamene, nunasala mu nyinga yamene ; bea binamanama milangu ya Tetemi, yi ngwasala mu nyinga i yenci.

¹¹ Namanwambila malo aa bixeakala kiango kiamene munda mwenu, yi bixekukixibwa kiango kienu.

¹² Kunu kudi mulangu ămene, ene, nunanganani bea binamanunanga.

¹³ Muntu kienako udi yi nyinga yadika yei wungi, muntu kuladika môyo ănci ku micwe ya bimbila bienci.

¹⁴ Nonu nudi bimbila biamene ndo nwencenca bintu binwalanga meme.

¹⁵ Kisonubikila basadi kabidi nyô, bwalo butasolubukwa musadi biencenca fumwanci ; kaninga namanubikila bimbila, bwalo bwa malo moso anamakwombwa kudi Tetemi, namanulubukisao.

¹⁶ Nonu nwakadi kanusongusungula meme, kate meme nakanusungula nonu, yi nakanuteka nonu binuxeya kama mamoma mangi, yi bixesala mamoma enu ; kintu kioso lolo kinuxelomba Tete ku dina diamene, uxenupakio.

¹⁷ Meme nwalanga malo aa binuxenangañana.

¹⁸ Ndo loboko lunwanyañana, nwalubukwa ene, lwakangunyañana buxi bwenu.

¹⁹ Ximbi nwapwakala bena loboko, loboko luxenanga bantu banci ; kaninga bwalo bunutena bena loboko, kate meme namanusungula mu loboko, ndo bwamanunyañana loboko.

²⁰ Nweli diyi nkanyi dinakanwambila ene, Musadi kasodika fumwanci bunene. Ndo bamangukolomona bananukolomona kabidi ; ndo bamanama diyi diamene, bañanama dienu kabidi.

²¹ Kate bananwencela bintu bioso bebi noku, ku mucwe ă dina diamene, bwalo butasolubukwabo you akangutuma.

²² Kutena namafwa bambila, kabaxeakala yi kwona ; kaninga nkyekyu kabena yi kisokokyelu kia kwona kwabo.

²³ You ungwanyañana anyañana kabidi Tetemi.

²⁴ Kutena namakwenca makisa kudibo atakwenca munga muntu nyô, kabaxeakala yi kwona ; kaninga nkyekyu bamamona yi bamanyañana yi meme yi Tetemi.

²⁵ Kate bixefikixibwa diyi diakafundibwa ku bwadi bwabo, ene, Bakangunyañana kutena bwalo.

²⁶ Kaninga binakala Musamunini amalwa, unatuma kunudi kudi Tete, Mwoxixi a sôsôlwo, abatuka kudi Tete, yei unangutôbôlela ntôbô ;

²⁷ yi nonu kabidi nwatôbôla ntôbô, bwalo bunwamasala yinami pôi bubangabanga.