YOANO 13 - Disambi Dipyadipya

¹ MO buxi bwa kitula kia Kidikixilu Yisu akalubukwa ene, kikondo kienci kiamafika kixencukayi mu loboko kuya kudi Tete,—bwalo bwakanangayi bantu banci bakadi ku loboko, akabananga dyendeli pôi ku sula.

² Pa kitula, pakadi diabolo diamateka lukanyi nkyekyu mu mucima ă Yudaxi a Ximono, muna Ixikalioto, lwa kumwenga,—

³ Yisu lolo akalubukwa ene, Tete akalonga bintu bioso ku makaci anci, yi ene lolo, amabatuka kwa Ncembi yi uyeya kwa Ncembi,—

⁴ akakwombuluka ku kitula, akakwekyeya binkutu bienci, akangata kitambala yi akadidinga yinakio.

⁵ Kunyuma kwakakwelayi mai mu dilonga dinene, yi akabanga kwowesa makasa a beyi mai, yi kwakupulula yi kitambala kiakadingibwayi yinakio.

⁶ Akalwa lolo kudi Ximono Pita. Yei akamwambila ene, Fumu, Owe wakusula makasa amene ?

⁷ Yisu akapingasa yi akamwambila ene, Mungwencenca, owe kusolubukwa nkyekyu, mo unalubukwa kunyuma.

⁸ Pita akamwambila ene, Kunakusula makasa amene pô. Yisu akamupingasa ene, Ndo meme kisokukusula, kuna yinami bwalo bumobumwe.

⁹ Ximono Pita akamwambila ene, Fumu, kumoni ku makasa kutupu, kate ku makaci amene kabidi yi ku mucwe ămene.

¹⁰ Yisu akamwambila ene, You amakwowa mai dyendeli kiena yi bwalo butena bwa kukusula makasa anci, kate udi susu bya ; yi nonu nudi susu, kate bungi bwenu kumoni.

¹¹ Bwalo bwakalubukwayi uxemwenga ñani ; ndo biakatôyayi ene, Kanusoakala susu bungi bwenu.

¹² Mbwôso pakadi amakusula makasa abo, yi amangata binkutu bienci, yi amaxikama kabidi, akabambila ene, Nwalubukwa munapunwencela ?

¹³ Nonu nungwabikila ene, Mweyexi yi Fumu, yi nwatôya loko, bwalo bundi noku.

¹⁴ Ndo meme lolo, Fumu yi Mweyexi, amakusula makasa enu, nonu kabidi nuxekusulañana makasa enu,

¹⁵ bwalo bunapunuxiyila lwedi, binuxekwenca nonu kabidi bea binapunwencela.

¹⁶ Sôsôlwo, sôsôlwo, nwatôyela ene, musadi kasodika fumwanci munene ; mutumibwi lolo kasodika you munene amamutuma.

¹⁷ Ndo nwalubukwa bintu bebi, balwangwasanibwi nonu aka nubiakisa.

¹⁸ Kisotôya bwalo bwa bungi bwenu ; meme mbili bantu banakasungula ; kate bixefikixibwa diyi dia mukanda ă Ncembi ene, You udedya bidya yinami apungwombuludila dincinci dienci.

¹⁹ Pôi nkyekyu meme nwambila buxi butalulidio, binuxekwetabusa palolwadio, ene, meme ndi you.

²⁰ Sôsôlwo, sôsôlwo, nwatôyela ene, you amangata muntu mwoso ungwatuma, amangwangata meme ; yi you ungwangata meme amangata you akangutuma.

²¹ Pakamanayi bintu bebi kutôya, Yisu akadi yi buxitu ku mucima, yi akatôbôla yi akatôya ene, Sôsôlwo, sôsôlwo, nwambila ene, Muntu enu umoumwe unangwenga.

²² Beyi bakatebelañana, bakadi yi mbata bwalo bwa muntu akatôyelayi.

²³ Ku mesa lolo kwakadi mweyi anci umoumwe mu kiedi kia Yisu, akananga Yisu.

²⁴ Biakamusongela Ximono Pita kianca yi akamwambila ene, Apangusa dia nani diamatôyayi.

²⁵ Yei pako akakwengama nako ku kiedi kia Yisu akamwambila ene, Fumu, ñani you ?

²⁶ Yisu akapingasa ene, You noku ndo yei unamupa kicini, binamakitopesa. Yi pakadi amatopesa kicini, akakiangata yi akakipela Yudaxi a Ximono, muna Ixikalioto.

²⁷ Kunyuma kwa kicini, kwakabwela Satana munda mwanci. Biakamwambila Yisu ene, Bwalo bwencenca, ubwenci mangwoso.

²⁸ Kaninga ku mesa kakwakadi muntu umoumwe amalubukwa bwalo bwakamutôyelayi noku.

²⁹ Banga bakakisa ene, bwalo bwakadi Yudaxi yi mwosokye, ambeci Yisu amamwambiia ene, Ola bintu bituxeakala yinabio ku kitula ; sungu ambeci uxepela bakombi kintu.

³⁰ Yei pako, biakangatayi kicini, akaya kunci mangwoso ; yi kwakadi butuku.

³¹ Mbwôso pakadi amabatuka, Yisu ene, Nkyekyu Mwana a Muntu amatumbixibwa, yi Ncembi amatumbixibwa munda mwanci.

³² Ndo Ncembi amatumbixibwa munda mwanci, Ncembi unamutumbisa munda mwanci mikyenci, yi unamutumbisa nkyekyu nkyekyu.

³³ Bana, nkiasala yinenu mo kakondo kabende. Nonu nunangupalala ; yi bea binakakwambila bena Yuda ene, Kunceya, nonu kanubiyi kulwa, ndo binwambila nkyekyu nonu kabidi.

³⁴ Meme nupapa mulangu mupyamupya, ene, nunanganani ; byekyene binamanunanga, binuxenangañana kabidi.

³⁵ Nako bantu boso banalembetela ene, nudi beyi bamene ndo nwanangañana nyinga.

³⁶ Ximono Pita akamwambila ene, Fumu, kuyeya kudi kupai ? Yisu akamupingasa ene, Kunceya, owe kubiyi kungulandudila nkyekyu, kaninga unangulandudila kunyuma.

³⁷ Pita akamwambila ene, Fumu, ku bwalo kai meme kibiyi kukulandudila nkyekyu ? Nakukuladikila môyo ămene.

³⁸ Yisu ene, Unanguladikila môyo ěbe ? Sôsôlwo, sôsôlwo, nkwatôyela ene, Ntala kanakwela diyi buxi bunakala wamangunyañana manyafiana asatu.