YOANO 11 - Disambi Dipyadipya

¹ KWAKADI lolo muntu amatata kusama, Lasalusu a ku Betani ; muna bula bwa Mali yi Mata mukulwanci.

² You ndo Mali akaxinga Fumu manyi a ncobo, akakupulula makasa anci yi nyonyi yenci, akadi yi mukulwanci Lasalusu muna kusama.

³ Mbwôso bangasananci bakatuma kudiyi ene, Fumu, you ananga Owe udi yi kusama.

⁴ Mo pakakwombwa Yisu, yei ene, Kusama koku kakuna pa lufu, kate bwalo bwa kinemu kia Ncembi, bixetumbixibwa Mwana a Ncembi kudiku.

⁵ Yisu lolo akananga Mata, yi mwakunyenci, yi Lasalusu.

⁶ Mbwôso pakakwombwayi ene, Udi yi kusama, akasala matuku abidi ku kikondo kieki ku kidi kiakadiyi.

⁷ Kunyuma lolo kwakatôyelayi beyi banci ene, Cuyi ku Yudiya kabidi.

⁸ Beyi bakamwambila ene, Labi, mo nkyekyu bena Yuda bamapalala kukuxipa mabwe ; uyeya koku kabidi ?

⁹ Yisu akapingasa ene, Ki ku munyinya kudi ola disangi yi ibidi ? Aka muntu endenda ku munyinya, kasopuma diya, bwalo bwamamonayi obo a loboko lolu.

¹⁰ Kaninga ndo muntu endenda ku butuku, amapuma diya, bwalo butasoakala obo munda mwanci.

¹¹ Malo aa noku ndo akatôyayi ; yi kunyuma akabambila ene, Lasalusu, kimbila kiecu, amalala tulu ; kate nceya kuya mubisa mu tulu.

¹² Biakamwambila beyi ene, Fumu, ndo amalala tulu, unapanda môyo.

¹³ Yisu pako akatôya dia lufu lwanci ; kaninga bobo bakakisa ene, amatôya dia kwomowa mu tulu.

¹⁴ Biakabasakolela Yisu dyendeli ene, Lasalusu amafwa.

¹⁵ Ngwaxekyelela ku bwalo bwenu bwalo buntakadi koku, binuxekwetabusa. Kaninga cuyi kudiyi.

¹⁶ Mbwôso Tomasa, abikilabo ene, Didimusu, akatôyela beyi, bena kwanci, ene, Coco cuyi kabidi, tufwi yinanci.

¹⁷ Yisu lolo, pakafikayi, akamusañana amalala nkyekyu mu lukita matuku anai.

¹⁸ Ku Betani pako kwakadi pepe yi Yelusaleme, ambeci “ stadia ” disangi yi itano,

¹⁹ yi bena Yuda bangi bakalwa kudi Mata yi Mali kulwa basambanina bwalo bwa ngasanabo.

²⁰ Mata lolo pakakwombwayi ene, Yisu utanalwa, akaya pomana yinanci ; kaninga Mali akaxikama mu ncibo.

²¹ Mbwôso Mata akakwambila Yisu ene, Fumu, ximbi Owe wakakala kunu, ngasanami kaxefwa.

²² Kate isanga nkyekyu, ngwalubukwa ene, kintu kiosô kinalomba Owe kudi Ncembi, Ncembi unakupakio.

²³ Yisu akamwambila ene, Ngasanebe unabika kabidi.

²⁴ Mata akamwambila ene, Ngwalubukwa ene, unabika kabidi ku kwombuluka kwa bafu, ku diba dia ku sula.

²⁵ Yisu akamwambila ene, Meme ndi kwombuluka kwa bafu, yi meme ndi môyo ; you amangwetabuxila meme, isanga uxefwa unakala yi môyo ;

²⁶ yi muntu mwoso utani yi môyo yi amangwetabuxila meme, kanafwa pô. Owe wapwetabusa noku ?

²⁷ Yei akamwambila ene, E, Fumu ; meme namakwetabusa ene, Owe udi Kalistu, Mwana a Ncembi, uxelwa ku loboko.

²⁸ Pakadi amatôya noku, akaya yi akabikila mwakunyenci Mali ku Dusoko, ene, Mweyexi apulwa, ukwabikila.

²⁹ Yei, pakakwombwayi noku, akakwemana mangwoso yi akalwa kudiyi.

³⁰ Mo Yisu akadi ukidi kaluli munda mwa bula, kate akadi ku kidi kiakalwa Mata kulwa pomana yinanci.

³¹ Mbwôso bena Yuda bakadi yinanci mu ncibo badi mu kumusambanina, pakamonabo Mali amakwemana mangwoso, amaya kunci, bakamulanda, bakakisa ene, Uyeya ku lukita kuya dila koku.

³² Mali lolo, pakalwayi kwakadi Yisu, yi pakamumonayi, akapona ku makasa anci yi akamwambila ene, Fumu, ximbi Owe wakakala kunu, ngasanami kaxefwa.

³³ Mbwôso pakamumona Yisu udi mu kudila, yi bena Yuda bakalwa yinanci badi mu kudila, akakabana kungi ku mucima ănci, yi akadixenga, yi akatôya ene, Kunwamamuteka kudi kupai ?

³⁴ Bakamwambila ene, Fumu, Iwaka lwa moni.

³⁵ Yisu akadila masonci.

³⁶ Mbwôso bena Yuda ene, Mona mwakamunangayi.

³⁷ Mo banga babo bakatôya ene, You muntu akalubukwa kudipula meso a bafofo, kiena akalubukwa kabidi kuximba muntu you, kafwi ?

³⁸ Yisu lolo akadi mu kukabana kungi munda mwanci kabidi, akalwa ku lukita. Lwakadi dina mu lubyenga yi dibwe diakakala padidio.

³⁹ Yisu ene, Nunculi dibwe. Mata mufu ngasananci, akamwambila ene, Fumu, utani nkyekyu mukufu, bwalo bwapwakalayi koku matuku anai.

⁴⁰ Yisu akamwambila ene, Ki napukwambila ene, Aka owe unakwetabusa unamona dikai dia Ncembi ?

⁴¹ Biakanculabo dibwe. Yi Yisu akasangola meso anci kulu, yi akatôya ene, Tete, nkwaxinga, bwalo bwapungwombwa.

⁴² Yi namalubukwa ene, ungwombombwa matuku moso ; kate ku bwaio bwa kimbukuma kunu ndo kunaputôya, bixekwetabusabo ene, Owe wakangutuma.

⁴³ Pakadi amatôya nako, akakwamena yi diyi dikola ene, Lasalusu, lwaka kunci.

⁴⁴ Mufu lolo akabatuka kunci, musuka makasa yi makaci yi mbuxa ya lukita, yi mpala anci akadingibwa kitambala. Yisu akabambila ene, Numusuli, numulekyeli.

⁴⁵ Mbwôso bantu bangi ba bena Yuda bakadi bamalwa kudi Mali, biakamonabo mwakakwencayi, bakamwetabuxila ;

⁴⁶ kaninga banga babo bakaya kudi baFalaxi, bakabambila biakakwenca Yisu.

⁴⁷ Makanda manene lolo yi baFalixi bakakokyeya kikokye yi bakatôya ene, Twenci beci ? bwalo bwencenca muntu you bilayixilu bingi.

⁴⁸ Ndo tunamulekyela noku, bantu boso banamwetabuxila, yi bena Loma banalwa ncula kidi kiecu yi bubila bwecu.

⁴⁹ Kaninga muntu abo umoumwe, Kayafa, akadi bokanda bunene ku mbula you, akabambila ene, Nonu kanusolubukwa pô,

⁵⁰ kanusokwela lukanyi ene, kudi loko ku bwalo bwenu, muntu umoumwe uxefwa ku bwalo bwa bantu baba, bitaxepya bubila buncimancima.

⁵¹ Kaninga akadi kasoditôyela bienci ; kate bwalo bwakakalayi bokanda bunene ku mbula you, akabadimusa ene, Yisu uxefwa ku bwalo bwa bubila bobu ;

⁵² yi kumoni ku bwalo bwa bubila bobu butupu, kate bixekokyeyayi kabidi bana ba Ncembi kibumbu kimokimwe bamacakana ca.

⁵³ Mbwôso pôi dituku dedi pakakwelañanabo nkanyi bixemuxipabo.

⁵⁴ Biakadi Yisu kasokwenda kabidi kunci kudi bena Yuda, kate akancuka koku ku mbata pepe yi mbata a kisobe, ku bula bwabikilabo ene, Efelaimi, yi akakala koku yi beyi banci.

⁵⁵ Mo Kidikixilu kia bena Yuda kiakadi pepe, yi bantu bangi bakaximuna ku Yelusaleme bamalwa mu mbata, buxi bwa Kidikixilu, bixedikusulabo mikyeabo.

⁵⁶ Mbwôso bakapalala Yisu yi bakatôyelañana pakakwemanabo mu tempeio ene, Nwakanyakanya beci ? yei kanalwa ku kituia ?

⁵⁷ Yi makanda manene yi baFalixi bakadi bamalanga mulangu ene, Aka muntu mwoso amamulubukwa kidi kidiyi, asakoli, bixemukwatabo.