TITO 1 - Disambi Dipyadipya

¹ PAULU, musadi a Ncembi, yi mutumibwi a Yisu Kalistu, bea bialelekyela yi kwetabusa kwa basungudibwi ba Ncembi, yi kilubukilu kia sôsôlwo kialelekyela yi mwosambu ă Ncembi

² mu mudingidilu ă moyo ă kô kô. Ncembi utabiyi kudimba akauxiyila kilaka, buxi bwa mieciya ya bikondo bia loboko ;

³ kate ku bikondo bienci mikyenci kwakakwebesayi diyi dienci ku mwobeki, ăkatekyebwa ku makaci amene, luna biakadi mulangu ă Ncembi Mupandixi ecu.

⁴ Kudi Tito, mwanami a sôsôlwo ku kwetabusa kwecu kwa betabuxi boso, lwoxixi yi polo kudi Ncembi Tete yi kudi Kalistu Yisu Mupandixi ecu.

⁵ Ku mucwe ou ndo kunakakuxiya mu Kulete, bixelungika owe bintu biamasaka, yi bixesungula owe babakulu mu bula bwoso, bea binakakulangila mulangu ;

⁶ ndo muntu mwoso kiena yi bwalo bubi, ndo udi muna mukaxi umoumwe, ndo udi yi bana bamakwetabusa batasosanyibwa bwalo bwa munyingu ndo bwa ntamu.

⁷ Bwalo buxeakala munami a kikokye kutena bwalo bubi, bea nkôngôlo a Ncembi, kumoni muna bwolemo, kumoni muntu ulolwa yi bisusu mangwoso, kumoni muna mulaku ă malufu, kumoni mukumi a bantu, kumoni muna kiloko kia bima ;

⁸ kate muntu amakwekyela yi kwangata kwa bena ngendo, munangi a bwalo bunengela, muna bweso, muna nkwami, muna babala, muna mulangu ;

⁹ amabamba diyi dia kibaku diamalelekyela yi kweyesa kwa Kalistu, bixelubukwayi yi kubondabonda ku kweyesa kwa loko, yi kutongola bapetodi ba mpeto.

¹⁰ Bwalo budiko bantu bangi, bena ntamu, batabakani yi bena ndimbu, yi bantu pako ba bena bwadi,

¹¹ baxekandibwa misuku yabo ; bantu bamaponesa nkumbu mincimancima, badi mu kweyesa malo ataxekweyexebwa, ku mucwe ă bima bia mbindu.

¹² Muntu abo mikyeabo, mudimuxi abo mikyeabo, akatôya ene, Bena Kulete badi bena ncimi matuku moso, nyama mibi ya bilei, mafu a bompoci.

¹³ Ntôbô yei idi sôsôlwo. Ku mucwe ou ubakami makamu yi ngulu bixeakalabo loko mu kwetabusa,

¹⁴ bitaxebakabo macu abo ku tufumu twa bena Yuda, ndo ku milangu ya bantu belela sôsôlwo nyuma.

¹⁵ Kudi bena babala, bintu bioso bidi babala ; mo kudi bantu badi yi lobindu yi batena yi kwetabusa, kakuna kintu kimokimwe kidi babala ; kate lukanyi lwabo yi kilubukilu kiabo bidi yi lobindu.

¹⁶ Bamasakola ene, bamalubukwa Ncembi ; mo ku makisa abo kumwanyañanabo, badi bena nyete, yi bena ntamu, yi ku bwalo bwa mudimo mwoso unengela badi basaluki batupu.