NGALATIA 4 - Disambi Dipyadipya

¹ KANINGA ngwatôya ene, Pakala muna mwokito ukidi mwamuki, kasoxiyañana yi musadi pô, isanga udi fumu a bintu bioso ;

² kate udi muxi mwa babungudi yi bankôngôlo pôi kikondo kiamalungikibwa kudi tete.

³ Mo nako coco, patwakadi babaki, twakabambibwa ku bupika muxi mwa bikoma bia loboko.

⁴ Kaninga pakakuka lwedi lwa kikondo, Ncembi akabatusa Mwananci amalelebwa kudi mwamukaxi, amalelebwa muxi mwa bwadi ;

⁵ bixepikulayi bobo badi muxi mwa bwadi, bituxeakala yi bwana.

⁶ Yi bwalo bunudi bana, ndo bwakabatusa Ncembi Mwoxixi a Mwananci akali munda mwa micima yecu, udi mu kwamena ene, ABA, TETE.

⁷ Mbwôso kuna kabidi musadi nyô, kate mwana ; mo ndo mwana, mbwôso muna mwokito kabidi kudi Ncembi.

⁸ Kate ku kikondo yikia kinwakadi kanubiyi Ncembi, nwakadi yi bupika ku bwalo bwabo batena bancembi ku butonga bwabo pô.

⁹ Mo nkyekyu, binwamalubukwa Ncembi,—ndo pako binwamalubukibwa kudi Ncembi,—nwapinana kabidi beci ku bikoma bia bubombu yi bia bokombi binwakyeba kabidi kwakala yi bupika bwabio ?

¹⁰ Nonu nwanama matuku, yi ngondo, yi bikondo yi mbula.

¹¹ Ngwacina ku bwalo bwenu, ximbi ambeci namakamba nkambi kanana ku bwalo bwenu.

¹² Meme nwaxengula bakunyi, nwakali bea bindi, bwalo bundi meme kabidi bea binudi. Kanwangukixila bubi pô.

¹³ Mo nwalubukwa ene, ku bubombu bwa munyu ndo kunakanwambila losangu lunengela ku buxi ;

¹⁴ yi kielekyexelu kiamene kiakadi mu munyu ămene, nonu nwakadi kanusokixeka yi kanusokiombwa xepete ; kate nwakangwangata bea mwangele a Ncembi, bea Kalistu Yisu.

¹⁵ Ape kulwangwasanibwa kwenu kwamaya kupai ? Bwalo bungwatôbôla ku mucwe ěnu ene, ximbi nwamalubukwa noku, nuxedipokola meso enu yi nuxempa meme.

¹⁶ Mbwôso namatulowa mutandanani yinenu bwalo bunamanwambila sôsôlwo ?

¹⁷ Banwapalala yi mulukutu, kate kumoni ă nkwami ; kanana, bakyeba kununcibika kunci binuxebapalala.

¹⁸ Mo kudi loko bwalo bunengela kupaladibwa yi mulukutu matuku moso ; kumoni ku kikondo kintani yinenu kutupu.

¹⁹ Bana bamene, bantani kabidi yi loenu ku micwe yenu binakala Kalistu amapebwa mumbidi munda mwenu ;

²⁰ ya, nxekyeba kwakala yinenu ku mpala nkyekyu, yi kukulumuna diyi diamene, bwalo bunamantunka ntunka ku bwalo bwenu.

²¹ Nungwambili, nonu bakyeba kwakala muxi mwa bwadi, nonu kanusokwombwa bwadi ?

²² Bwalo bwakafundibwa ene, Abalami akadi yi bana babidi ; munga kudi mupika a babakaxi yi munga kudi mwamukaxi, mwana a bula.

²³ Kate you a mupika a babakaxi akalelebwa muna munyu ; yi you a mwamukaxi, mwana a bula, ndo muna kilaka.

²⁴ Aa malo adi yi mwele munda, bwalo budi babakaxi baba luna masambi abidi. Dimodimwe dia lupongo lwa Sinai, dialelafiana bana ba bupika ; dedi ndo Angala.

²⁵ Bwalo budi Angala luna lupongo lwa Sinai mu Alabia, yi amalelekyela yi Yelusaleme a nkyekyu ; bwalo budiyi mu bupika yi bana banci.

²⁶ Mo Yelusaleme a kulu udi mwana a bula ; you ndo mamecu.

²⁷ Bwalo bwakafundibwa ene, Xekyelela owe kikuta kitasolela ; amena yi tôya, owe utasolubukwa loenu ; bwalo bwa bana ba you amakyenga bamadika bana bungi ba you udi yi bayenci.

²⁸ Mo coco bakunyi tudi bana ba kilaka luna biakadi Isaka.

²⁹ Kate bea biakakolomona you akalelebwa muna munyu you akalelebwa muna Mwoxixi, ndo bidiko nkyekyu.

³⁰ Mo mukanda ă Ncembi ămatoya beci ? Tenyeka mupika a babakaxi yi mwananci ; bwalo mwana a mupika kanakitafiana mwokito pô yi mwana a mwamukaxi, mwana a bula.

³¹ Mbwôso bakunyi, coco katuna bana ba mwamukaxi a bupika, kate ba mwamukaxi mwana a bula.