NGALATIA 2 - Disambi Dipyadipya

¹ KUNYUMA lolo kwa dinamu dia mbula disangi yi inai, nakaximuna kabidi ku Yelusaleme yi Banabasa, yi nakacwala Tito yinami kabidi.

² Yi nakaximuna bwalo bwa kiebexelu, yi nakabalwandwadila losangu lunengela lunamakwambila kudi mabila, kaninga ku busoko kudi i bantu banene yinabo, ximbi ambeci ndi mu kusambola mbilu kanana, sungu ambeci nakasambola mbilu kanana.

³ Kate Tito kabidi akadi yinami, isanga muna Ngiliki, akadi kasobambibwa dibambu dia kwelebwa bwadi.

⁴ Nako ku mucwe ă bakunyi ba mancanga bakabwexebwa ku busoko, bakalwa ku busoko kulwa lengela bwana bwecu bwa bula bututani yinabu mu Kalistu Yisu, bixetupwesabo ku bupika ;

⁵ batutasokwedeyela diedya kumoni isanga ola umoumwe ; bixesala sôsôlwo a losangu lunengela yinenu.

⁶ Mo ku bwalo bwabo bwa bantu banene,—ndo bañani, kumoni bwalo bwamene, Ncembi kasodingila mumbidi ă muntu,—bobo bakadi bantu banene bakadi kabasongwambila kintu.

⁷ Kate pakamonabo ene, losangu lunengela lwa bena mwontonto lwakangupebwa meme, bea biakapebwa Pita losangu kudi bena bwadi ;

⁸ (bwalo you akakisañana mu Pita bwalo bwa butumibwi bwa bena bwadi akakisañana munda mwamene kabidi bwalo bwa mabila) ;

⁹ pakalembetelabo lolo lwoxixi lwakangupebwa, Yakobo yi Kyefasa yi Yoano bakakala bantu banene bea mitondo ya ncibo bakampa meme yi Banabasa bianca bia kidyo bia busangilañani ; coco kuya kudi mabila yi bobo kudi bena bwadi.

¹⁰ Kaninga tuxekwela bakombi lukanyi, lunakadi yi mulukutu ă kwela kabidi.

¹¹ Mo pakalwa Kyefasa ku Antioko, nakatanda yinanci ku mpala, bwalo buxebelebwayi.

¹² Bwalo bwakadyayi yi bena mabila buxi butaluli banga kudi Yakobo ; mo pakadi bamalwa, akaxibaxiba yi akadibalola, bwalo bwakacinayi bena bwadi.

¹³ Yi banga bena Yuda bakacimbacimba kabidi yinanci ; biakaputuludibwa isanga Banabasa kabidi yi mwocimbucimbu ăbo.

¹⁴ Kate panakamona ene, kabasokwenda yi nkwami bea bidi sôsôlwo a losangu lunengela, nakatôyela Kyefasa ku mpala yabo ya bungi bwabo ene, Aka owe, udi muna Yuda, wendenda yi miesambu ya bena mabila, kumoni bea bena Yuda, owe wabamba bena mabila dibambu dia kwendendenda luna bena Yuda beci ?

¹⁵ Coco badi ditonga dia bena Yuda, kumoni boni ba mabila,

¹⁶ bwalo butwalubukwa ene, muntu kasosuwixibwa ku makisa a bwadi, mo ku kwetabusa kwa Yisu Kalistu, isanga coco twamakwetabuxila Kalistu Yisu, bituxesuwixibwa bwalo bwa kwetabusa kwa Kalistu, kumoni ku makisa a bwadi ; bwalo butasosuwixibwa munyu mwoso ku makisa a bwadi.

¹⁷ Mo, bitwamapalala kusuwixibwa mu Kalistu, coco kabidi ndo twamasañanibwa boni, mbwôso Kalistu udi musadisañani a kutukixisa bubi. Ai, kumoni.

¹⁸ Ndo namakwabaka kabidi bintu bebi binakasasula, namaditeka mikyemi mwoni.

¹⁹ Meme lolo, ku mucwe ă bwadi, namafwa bwalo bwa bwadi, binxeakala yi môyo ku bwalo bwa Ncembi.

²⁰ Meme namakopekyebwa yi Kalistu. Yi kiena yi môyo nyô meme ; mo Kalistu udi yi môyo munda mwamene ; yi môyo undi yinau mu munyu, ngwakala yinau ku kwetabusa kudi kwa Mwana a Ncembi, akangunanga yi akadilongola mikyenci ku mucwe ămene.

²¹ Kisokwatola lwoxixi lwa Ncembi ; bwalo ndo nkwami yilolwa ku bwadi, Kalistu lolo akafwa kanana.