MATEYO 8 - Disambi Dipyadipya

¹ PAKAPWEKAYI lolo ku lupongo, bimbukuma binene biakamulandudila.

² Yi mona, muna sudi akalwa muxingila ene, Fumu aka wamananga, ubili kungukusula.

³ Yi akaxombola kianca kienci, akamubaka kianca ene, Namananga ; kusuka. Yi kusama kwanci kwa sudi kwakancuka mangwoso.

⁴ Yi Yisu akamutôyela ene, Tebela, kwambidi muntu ; mo yaka ya diebesi mikyebe kudi bokanda, longa lolo dilongi diakatôya Mosese, ndo kubatôbôlela ntôbô.

⁵ Yi pakabwelayi mu Kapenaumu, kapalai ka masalai kakalwa kudiyi, kadi mu kumulomba

⁶ ene, Fumu, musadi amene amalala mu ncibo, muna mbôyaponde ; ombombwa kusama kungi.

⁷ Yi Yisu akamwambila ene, Meme nakulwa mupandisa.

⁸ Yi kapalai kakamupingasa ene, Fumu, kisolelekyela Owe kubwela muxi mwa samba amene ; kate tôyapo diyi ditupu, musadi amene unapandixibwa.

⁹ Bwalo bundi meme kabidi muntu muxi mwa bumanya, ntani yi masalai muxi mwamene ; ngwatôyela you ene, Yaka, kaya ; munga ene, Lwaka, kalwa ; kudi musadi amene, ene, Kisa nako, kakisa nako.

¹⁰ Pakakwombwa Yisu, akakama, yi akatôyela bantu bakalanda ene, Nwatôyela sôsôlwo ene, Kiamona kwetabusa wungi noku mu Isalele pô.

¹¹ Mo nwatôyela ene, bantu bangi banalwa kulolwa munyinya yi kuyeya munyinya, banaxikama ku mesa yi Abalami yi Isaka yi Yakobo mu bufumu bwa diulu ;

¹² kaninga bana ba bufumu banatenyekyebwa ku mwedima ă kunci ; koku kunakala bidilu yi kukuya kwa meno.

¹³ Yi Yisu akatôyela kapalai ene Yaka ; byekyene biapwetabusa, bia kali yinebe. Yi musadi akapandi xibwa pa ola you.

¹⁴ Pakafika Yisu ku ncibo a Pit ; akamona mukwanci a babakaxi uxe mbamini yi kusama kwa mudilu

¹⁵ akakwata kianca kienci, yi mudilu ăkamuxiya ; yei lolo akabika, aka musadila.

¹⁶ Yi pakakwela butuku, bakacwala kudiyi bantu bangi bamakwacibwa yi bidimu bibi ; yi akapaula bidimu yi diyi, yi akapandisa batati boso ba kusama,

¹⁷ bixefikixibwa mwakatôyebwa kudi Esaya mudimuxi ene Mikyenci akangata mabombu ecu yi akacwala masama ecu.

¹⁸ Yisu lolo, pakamonayi bimbukuma binene biamamudinga, akatôya pa kuya ku dixia.

¹⁹ Yi mufundi a mukanda akalwa mutôyela ene, Mweyexi, nakukulandudila kwoso kuyeya.

²⁰ Yisu akamwambila ene, Ngasama idi yi mbeto, yi nyonyi ya kulu idi yi maswa ; kaninga Mwana a muntu kiena yi kidi kia kuladika mucwe ănci.

²¹ Mo munga mweyi akamwambila ene, Fumu ungulekyeli, mbeyapo buxi kuya ncika tetemi.

²² Kaninga Yisu akamutôyela ene, Ungulandudili ; xiya bafu banciki bafu babo mikyeabo.

²³ Yi akakondela mu kibusu, yi beyi banci bakamulanda ;

²⁴ yi mona, diele diakatepa dingi ku ngiembi, biakancibikibwa kibusu yi diele ; kaninga yei akadi mu tulu.

²⁵ Yi beyi bakalwa mubisa ene, Fumu utupandisi, tutanafwa.

²⁶ Yi akabatôyela ene, Nwacina kukai, nonu bena kwetabusa kubende ? Akabika lolo, yi akakama mpepele yi mai, yi polo akalwa nya.

²⁷ Mo babalumi bakakama ene, Mwosambu kai ou ? biamamwedeya isanga mpepele yi mai.

²⁸ Pakasabukayi ku dixia ku mbata a baNgadala, bantu babidi bakapomanañana yinanci bamakwacibwa kudi bidimu bibi, batanabatuka mu kidi kia nkita, bamalekola yi bukitu, biakadi muntu kabiyi kudika pa ncila you.

²⁹ Yi mona, bakakwamena ene, Coco twakisa yinebe kai, Mwana a Ncembi ? Wapulwa kunu buxi bwa kikondo kulwa tutatisa ?

³⁰ Kulekule kwabo lolo kwakadi kibumbu kia ngulubi ya mbuxi, i yitanadya ;

³¹ yi bidimu bibi biakamuxengula ene, Aka utwapaula, ututumi kudi kibumbu kia ngulubi ya mbuxi.

³² Yi akabatôyela ene, Nuyi. Yi bakancuka yi bakabwela mu ngulubi ya mbuxi ; yi mona, kibumbu bungi bwakio kiakatuka mbilu ku lupongo tule lwa kuya ku mai, yakamafwa mu mai.

³³ Kaninga bobo bakayinama bakacina, yi bakaya ku bula, yi bakasakola bwalo dyendeli yi kipoma kiakaponena bantu bakadi bamakwacibwa kudi bidimu bibi.

³⁴ Yi mona, bungi bwa bena bula bakabatuka kuya pomana yi Yisu, yi pakamumonabo, bakamulomba ancuki ku mbata yabo.