MATEYO 24 - Disambi Dipyadipya

¹ YI Yisu akabatuka yi akancuka ku tempelo ; yi beyi banci bakalwa kudiyi kulwa mwebesa ncibo mioso ya tempelo.

² Yi yei akabambila ene, Nonu kanwamona bintu bebi bioso ? Nwatôyela sôsôlwo ene, Dibwe kadinaxiyibwa kunu kulu kwa dibwe, ditasoponexebwa paxi.

³ Yi pakaxikamayi ku lupongo lwa Olife, pakalwa beyi banci kudiyi ku busoko ene, Utwambilipo, bintu bebi binakala diba kai ? kinani lolo kidi kilayixilu kia kulwa kwebe yi kia ku sula kwa mwociya ou ?

⁴ Yi Yisu akabapingasa ene, Nutebeli, muntu kanuungixi.

⁵ Bwalo bunalwa bantu bangi mu dina diamene ene, Meme ndi Kalistu, yi banaungisa bantu bangi.

⁶ Yi nunakwombwa dia mbita yi ngindu ya mb ta. Nutebeli, kanunyingix bwi ; bwalo bunapona bintu bebi bioso ; kaninga kipwilu kikidi kakifikili.

⁷ Bwalo bunatombkoyela bubila bubila, yi bufumu bufumu ; yi nkombo ya ncala yinalwa yi matepa a loboko ku bidi binga.

⁸ Kaninga bintu bebi bioso bidi bubangabanga bwa loenu.

⁹ Kunyuma kunanulongolabo ku kukolomonebwa, yi bananuxipa ; yi nunanyananibwa kudi mabila moso ku mucwe ă dina diamene.

¹⁰ Kunyuma bantu bangi banaponexebwa, yi banakwengañana yi bananyañananana.

¹¹ Yi badimuxi bangi ba mancanga banakwemana banaungisa bantu bangi ;

¹² yi bwalo bunalelañana kwona, nyinga ya bantu bangi yinapola ;

¹³ kaninga you unakala amakwemana pôi ku kipwilu unapandixibwa.

¹⁴ Yi losangu lolu lunengela lwa bufumu lunakwambidibwa ku bungi bwa loboko, ndo kutôbôlela mabila moso ntôbô ; yi kunyuma kunalwa ku sula.

¹⁵ Mbwôso panunamona yangonye ya lusancu, yamatôyebwa kudi Danyele mudimuxi, yamakwemana mu kidi kia babala, (you abala alubukwi),

¹⁶ bobo lolo batani mu Yudiya bacini ku mpongo ;

¹⁷ you utani pelu pa ncibo kapweki munda ndo kuncula bintu mu ncibo ;

¹⁸ you utani mu kibidi kapinani kulwa angata kifunda kienci.

¹⁹ Kaninga mpeya kudibo badi yi mafu, yi kudibo banusa bana ku matuku yia.

²⁰ Nulombeli lolo ene, kicininu kienu kakiakadi ku ngondo ya maxika ndo ku sabado ;

²¹ bwalo bunakala mpeya mungi utalubukibwa pôi bubangabanga bwa loboko pôi nkyekyu, yi kanakala i nako kabidi nyô.

²² Kutena matuku yia amaxikixibwa, kakuxepandixibwa munyu mwoso ; kaninga ku mucwe ă basungudibwi kunaxikixibwa matuku yia.

²³ Ku kikondo kieki ndo muntu unanutôyela ene, Mona, kunu kudi Kalistu, ndo koku, kanwetabuxi.

²⁴ Bwalo bunakwombuluka baKalistu ba mancanga, yi badimuxi ba mancanga, banakwebesa bilayixilu binene yi bikamakama, bixeungisabo (ximbi bamalubukwa nako) isa basungudibwi mikyeabo.

²⁵ Mona meme namanudimusa buxi,

²⁶ Mbwôso ndo bananutôyela, ene, Mona yei udi mu mbata a kisobe, nonu kanubatuki ; mona, udi mu ngumbu munda, kanwetabuxi.

²⁷ Bwalo bunakala kilulu kia Mwana a Muntu bea luna kapenya kadika kulolwa munyinya kalumuka kuyeya munyinya.

²⁸ Kwoso kutani nyama mufu, koku kunasangila mpungu ya kulu.

²⁹ Kaninga mo nkyekyu, kunyuma kwa mpeya a matuku yia, kunapindixibwa diba, yi ngondo kanateka mwexi ănci paxi, yi mitoto yinapona ku diulu, yi bikupu bia diulu binanyingixibwa.

³⁰ Yi ku kikondo kieki kunamoneka kilayixilu kia Mwana a Muntu mu diulu, yi bungi bwa mabila a loboko anadila lolo, yi banamona Mwana a Muntu ulolwa pa mabaxi a diulu yi ngulu yi dikai dingi.

³¹ Yi unatuma bangele banci yi diyi dinene dia mpungi, yi banakokyeya basungudibwi banci ku mpepele inai, pôi ku sula kwa diulu pôi ku sula kunga.

³² Mo nweyi mwele kudi kikuyi kia maxika. Panakala dibunca dienci diamalwa kulebela nkyekyu, yi ditanamena malwa, nwalubukwa ene, ngondo ya minyinya itani pepe.

³³ Mo nako nonu kabidi, panunamona bintu bebi bioso, nulubukwi ene, kudi pepe isanga ku mbelo.

³⁴ Nwatôyela sôsôlwo ene, Mwociya ou kaunadika buxi bunakala bintu bioso biamafikixibwa bebi noku.

³⁵ Diulu yi loboko binadika, mo meyi amene kanadika pô.

³⁶ Kaninga kakuna muntu amalubukwa dia dituku dedi ndo dia ola you, kumoni isa bangele ba mu diulu, mo Tete mutupu.

³⁷ Kaninga bea biakadi matuku a Noa, binakala kabidi kilulu kia Mwana a Muntu.

³⁸ Byekyene biakadibo ku matuku akadi buxi bwa muyi, bakadi mu kudya yi kunwa, bakadi mu kwangata mabakwa yi kupa mabakwa, pôi dituku diakabwela Noa mu kibusu,

³⁹ yi bakadi kabasolubukwa biakalwa muyi ăkabancula bungi bwabo ; mo nako kabidi kunakala kilulu kia Mwana a Muntu.

⁴⁰ Ku kikondo kieki kunakala babidi mu kibidi, umoumwe amancudibwa, munga amasala ;

⁴¹ babakaxi babidi banacwañana ku kinu, umoumwe amancudibwa, munga amasala.

⁴² Mbwôso nutebeli, bwalo bunutasolubukwa pa diba dinalwa Fumwenu.

⁴³ Kaninga nulubukwi ene, ximbi fumu a ncibo amalubukwa pa kilo kia tulu kixelwa mwefi, uxetebela, kaxelekyela ncibo anci ndo kutubudibwa.

⁴⁴ Mbwôso nonu kabidi nwakali loko, bwalo bulolwa Mwana a Muntu ku ola unutasokwela lukanyi.

⁴⁵ Ñani lolo udi musadi ou a kibaku yi lukanyi, amateka fumwanci kulu mu ncibo anci, ndo kubapa bidya ku kikondo ?

⁴⁶ Mulwangwasanibwi musadi you, unasañana fumwanci palolwayi, udi mu kwenca noku.

⁴⁷ Nwatôyela sôsôlwo ene, unamuteka kulu kwa bima bienci bioso.

⁴⁸ Kaninga ndo musadi mubi you unatôya munda mwa mucima ănci ene, Fumwami utanaxitaxita pa kulwa,

⁴⁹ yi unabanga kukuma bena kwanci, yi kudya yi kunwa yi bena nkolwa ya malufu,

⁵⁰ fumu a musadi you unalwa ku dituku ditasodingilayi yi pa ola utasolubukwayi,

⁵¹ yi unamukuma bongonco yi unamutambila kidi kienci yi bena mancanga ; koku kunakala bidilu yi kukuya kwa meno.