MATEYO 15 - Disambi Dipyadipya

¹ KUNYUMA kwakalwa bafundi ba mikanda yi baFalixi ba ku Yelusaleme kudi Yisu ene,

² Ku bwalo kai beyi bebe baxipa muxiyilu ă babakulu ? bwalo butasokusulabo makaci abo padedyabo bidya.

³ Kaninga akabapingasa ene, Nonu kabidi, kukai nonu nwaxipa bwadi bwa Ncembi ku muxiyilu ěnu ă kalikali ?

⁴ Bwalo bwakatôya Ncembi ene, Nemeka tetebe yi mabebe ; yi you atangola ndo tetenci ndo mamanci, afwi lufu.

⁵ Mo nonu nwatôya ene, Muntu mwoso ndo unatôyela tetenci ndo mamanci ene, Kidi kincila, kintu kioso kixeangata owe kundi,

⁶ kananemeka tetenci pô ndo mamanci ; yi nwamapandisa diyi dia Ncembi ku muxiyilu ěnu ă kalikali.

⁷ Bena mancanga ! Esaya amatôya sôsôlwo ku bwalo bwenu ene,

⁸ Bantu baba bangwanemeka ku milomo yabo, mo mucima ăbo udi kulekule yinami ;

⁹ kaninga bangwaxingila mo kanana, badi mu kweyesa kweyesa kwabo kwa milangu ya bantu.

¹⁰ Yi akabikila kimbukuma kudiyi yi akabambila ene, Nwombwi yi nulubukwi ;

¹¹ kumoni kintu kiamabwela mu musuku kiamapindisa muntu ; kate kintu kiamabatuka mu musuku, kakieki ndo kiamapindisa muntu.

¹² Kunyuma beyi banci bakalwa mwambila ene, Walubukwa ene, baFalixi pa kwombwa diyi dedi bamanyungula ku micima ?

¹³ Mo yei akabapingasa ene, Muci mwoso utakuna Tetemi mu diulu unakondolebwa.

¹⁴ Nubalekyeli ; badi bafofo baxiya xiya bafofo ; mo ndo mufofo axiya xiya mufofo, banapona bubidi bwabo mu mulenda.

¹⁵ Yi Pita akamupingasa ene, Utusakoleli mwele ou.

¹⁶ Kaninga yei ene, Nonu kabidi nukidi kanusolubukwa ?

¹⁷ Kanusolembetela ene, kintu kioso kiabwela mu musuku kiamadika munda mwa difu, yi kiamapaudibwa kunci ?

¹⁸ Mo bintu biabatuka mu musuku bilolwa mu mucima, yi bebi noku biamapindisa muntu.

¹⁹ Bwalo bwabatuka nkanyi mibi munda mwa mucima, monda, mendela, madibi, misaka, ncimi ya kudimbidila bantu, mpolo,

²⁰ bebi ndo bintu biapindisa muntu ; mo kudya yi makaci atakusudibwa kakusopindisa muntu.

²¹ Yi Yisu akancuka koku, akaya ku mwanca ă Tile yi Xidono ;

²² yi mona, mwamukaxi, muna Kyenene, akabatuka mu mbata yei noku, akakwamena ene, Ungwombweli mwengo, Fumu, Mwana a Dafidi ; mwanami a babakaxi amakwacibwa kudi kidimu kibi.

²³ Mo yei kamupingaxili diyi. Yi beyi banci bakalwa mwapangusa ene, Umunculi, bwalo bwamatwabilayi.

²⁴ Mo yei akapingasa, ene, Meme kiatumibwa kutena kudi mikwakwa yamabungwa ya nkumbu ya Isalele.

²⁵ Yei lolo akalwa muxingila ene, Fumu, ungukwacisi.

²⁶ Kaninga akapingasa I ene, Kakuna yi nkwami ndo kwangata bidya bia bana kuya biela, kudi yimbwa.

²⁷ Mo yei akatôya ene, Mo nako, Idyanga ; bwalo budedya isanga yimbwa mangungu apona pona ku mesa a bafumu babo.

²⁸ Yisu lolo akamupingasa ene, Mwamukaxi, kwetabusa kwebe kudi kunene. Angata mwebe mwapunanga. Yi mwananci akapandixibwa pa ola you.

²⁹ Yi Yisu akancuka koku akalwa pepe yi mai a Ngalili, yi akabanda pa lupongo yi akaxikama papa ;

³⁰ yi bimbukuma binene biakalwa kudiyi, bakadi yi bena bitumbi, yi bafofo, yi bena bimeme, yi bena bikomo, yi banga bantu bangi, yi bakabela ku makasa anci ; yi akabapandisa ;

³¹ biakakama bimbukuma pakamonabo bena bimeme badi mu kutôya, bena bikomo badi bimpe, bena bitumbi badi mu kwenda, yi bafofo badi mu kumona ; yi bakatumbisa Ncembi a Isalele.

³² Mo Yisu akabikila beyi banci ene, Ngwombwela kimbukuma mwengo, bwalo bwamasalabo yinami nkyekyu matuku asatu, yi kabena yi kintu kia kudya ; kisoli kubapingasa yi ncala, ximbi baxepwangwa mu ncila.

³³ Beyi banci bakamwambila, ene, Ape tuxeangata mampa kupai mu kisobe, a kukuka kimbukuma bungi noku ?

³⁴ Yisu akabambila ene, Mampa adi yinenu anga ? Bakatôya ene, Sambwali ; yi tuyixi tubende twa nci.

³⁵ Yi akatôyela bantu ene, baxikami paxi ;

³⁶ yi akangata mampa sambwali yi yixi, akaxinga, yi akanyowa, yi akapa beyi banci ; yi beyi banci bakapa bantu.

³⁷ Yi bungi bwabo bakadya yi bakakwokuta ; yi bakakwongula bicini biakasala bisakwa sambwali tô tô tô.

³⁸ Yi bobo bakadya bakadi babalumi nkone inai, yi babakaxi yi bana matolo.

³⁹ Yi akancula bimbukuma, akakondela mu kibusu yi akalwa ku mbata ya Mangadana.