MATEYO 12 - Disambi Dipyadipya

¹ KU kikondo kieki kwakaya Yisu ku dituku dia sabado mu bibidi bia miebele ; yi beyi banci bakadi yi ncala, bakabanga kubuka mitongu yi kudya.

² Mo baFalixi pakamonabo bakamwambila ene, Mona, beyi bebe bencenca mutasolelekyela yi bwadi kwencebwa ku sabado.

³ Kaninga akabambila ene, Nonu kanwabala mwakakwenca Dafidi pakadiyi yi ncala, yi bobo bakadi yinanci ?

⁴ Mwakabwelayi mu ncibo a Ncembi, yi akadya mampa madisa ataxedibwa kudiyi, ndo kudi bantu bakadi yinanci, kaninga kudi makanda matupu ?

⁵ Ndo kanwabala ku bwadi ene, ku diba dia sabado kwonona makanda a mu tempelo sabado kutena kwona ?

⁶ Kaninga nwatôyela ene, kunu kudi muntu adika tempelo.

⁷ Mo ximbi nwamalubukwa diyi dedi ene, Ngwadila mwengo, kumoni dilongi, kanuxebela bantu batena yi kwona.

⁸ Bwalo budi Mwana a Muntu Fumu a sabado.

⁹ Yi pakancukayi koku, akalwa munda mwa kixindigilu kiabo, yi mona, muntu yi kianca kienci kiamakwoma.

¹⁰ Yi bakamwapangusa ene, Kwalelekyela yi bwadi ndo kupandisa ku sabado ? bixemusanyabo.

¹¹ Kaninga akabambila ene, Muntu kai utani yinenu, udi yi mukwakwa umoumwe, aka lolo you amapona mu dina ku sabado, unanyañana kumukwata yi kumwombulula kunci ?

¹² Ape muntu kiena apudika mukwakwa ? Mbwôso kwalelekyela yi bwadi ndo kwenca kunengela ku sabado.

¹³ Kunyuma akatôyela muntu ene, Xombola kianca kiebe. Yi akakixombola, kiakalwa kincimancima luna muna kwanci.

¹⁴ Kaninga baFalixi bakancuka, bakamwelañana nkanyi, muxemuxipabo.

¹⁵ Mo Yisu akalubukwa yi akancuka koku, yi bimbukuma binene biakamulandudila ; yi akabapandisa masama bungi bwabo ;

¹⁶ yi akabatôyela ene, kabamusakodi kunci ;

¹⁷ bixefikixibwa diyi diakatôyebwa kudi Esaya mudimuxi, ene,

¹⁸ Mona musadi amene unaputunga, munangibwi amene, unapuxekyelela ku mucima. Nakuteka Mwoxixi amene kulu kwanci, yi unasambola mabila malo.

¹⁹ Kanatanda, kanakwamena, muntu kanakwombwa diyi dienci ku miaka ;

²⁰ kananyowa muxembi mutapiki, kanancima kadilu katani kincimi ; binabatusayi lopelo ku bumanya ;

²¹ yi ku dina dienci kunadingidila mabila.

²² Kunyuma kwakacwadibwa kudiyi muntu amakwacibwa kudi kidimu kibi, mufofo yi muna kimeme, yi akamupandisa biakatôya muna kimeme, yi mufofo akamona.

²³ Yi bimbukuma bioso biakakama, yi bakatôya, ene, You ndo Mwana a Dafidi ?

²⁴ Kaninga pakakwombwa baFalixi, bakatôya ene, You apaula bidimu bibi kudi Belesebubu, fumu a bidimu bibi.

²⁵ Mo yei akalubukwa nkanyi yabo akabambila ene, Bufumu bwoso bwamadisambukila ndo budiaxipa dyendeli, yi bula bwoso ndo ncibo mwoso bwamadisambukila kabunasala.

²⁶ Aka lolo Satana amapaula Satana amatanda yi mikyenci, yi bufumu bwanci bunasala beci ?

²⁷ Meme ndo ngwapaula bidimu bibi kudi Belesebubu, bana benu babiapaula kudi ñani ? Mbwôso bobo banakala basambodi benu.

²⁸ Kaninga meme ndo ngwapaula bidimu bibi kudi Mwoxixi a Ncembi, bufumu bwa Ncembi lolo bwamalwa kunudi sôsôlwo.

²⁹ Muntu unabwela mu ncibo a muna ngulu beci kuya sanca bima bienci, kutena amasuka muna ngulu buxi ? kunyuma kunasancayi ncibo anci.

³⁰ You utena yinami amatanda yinami, yi you utasokokyeya yinami amacakanisa.

³¹ Ku mucwe ou, meme nwatôyela ene, kwona kwoso yi kutangola kwoso kunalekyelebwa bantu, kaninga kutangola Mwoxixi kakunalekyelebwa bantu.

³² Muntu mwoso unakala amatôyela Mwana a Muntu diyi, dinamulekyelebwa ; kaninga muntu mwoso unatôyela Mwoxixi a babaia diyi, kadinamulekyelebwa, ndo ku mwociya ou ndo ku mwociya ulolwa.

³³ Panga muci kunengela yi mamoma anci kunengela ; ndo panga muci bubi yi bimoma bienci bubi. Bwalo bwamalubukibwa muci ku mamoma anci.

³⁴ Bana ba nkangi ; nonu badi bubi nunatôya bintu binengela beci ? Bwalo bwasakola musuku malo amakwolubilañana mu mucima.

³⁵ Muntu unengela ndo abatusa bintu binengela munda mwa ngombo anci unengela ; yi muntu mubi ndo abatusa bintu bibi munda mwa ngombo anci mubi.

³⁶ Mo nwatôyela ene, diyi dioso dia kanana diatôya bantu, banadisakola ku dituku dia lopelo ;

³⁷ bwalo bunasuwixibwa ku meyi ebe, yi ku meyi ebe ndo kunabelebwa.

³⁸ Kunyuma banga bena mikanda yi baFalixi bakakulumuna ene, Mweyexi, twakyeba kumona kilayixilu kudi.

³⁹ Mo yei akabapingasa ene, Mwociya mubi yi ă budibi ndo ăpalala kilayixilu, yi kilayixilu kakinaupebwa kitena kilayixilu kia Yona mudimuxi.

⁴⁰ Bea biakadi Yona mu difu dia yixi munene minyinya isatu yi matuku asatu, binakala Mwana a Muntu minyinya isatu yi matuku asatu mu mucima ă loboko.

⁴¹ Bena Ninefe banakwemana ku lopelo yi mwociya ou, yi banaubela ; bwalo bwakadibelabo ku diembi dia Yona ; yi mona, muntu adika Yona udi kunu.

⁴² Fumu a babakaxi a ku Sudu unakwombuluka ku lopelo yi mwociya ou, yi unaubela ; bwalo bwakalwayi ku sula kwa loboko ndo kwombwa bwinu bwa Solomono ; yi mona, muntu adika Solomono udi kunu.

⁴³ Mo panakala kidimu kia mbindu kiamabatuka munda mwa muntu, kiamakwenda mu bidi biomu, kiamapalala kwomowa kutena kumona.

⁴⁴ Kunyuma kiamatoya ene, Nakupinana mu ncibo amene unakabatuka momu ; yi palolwakio, kimwasañana kanana, mukomba, yi mubongesa.

⁴⁵ Kunyuma kuyeyakio kuya angata yinanci bidimu binga sambwali biamamudika mikyenci bubi ; biamabwela lolo, biamakala momu, yi mwakadilu ă muntu you ă kunyuma ndo ădika mwakadilu ă buxi bubi. Mo nako kunakala yi mwociya ou ă bubi kabidi.

⁴⁶ Mo pakadi ukiambila yi bimbukuma, mona, mamanci yi bana ba mamanci bakakwemana kunci bamapalala kwambilañana yinanci.

⁴⁷ Yi muntu akamwambila ene, Mona, mabebe yi bana ba mabebe bamakwemana kunci, batanapalala kwambila yinebe.

⁴⁸ Kaninga akapingasa muntu you akamutôyela ene, Mamami ndo ñiani ? yi bakunyi bamene ndo bañani ?

⁴⁹ Yi akaxombola kianci kienci kwakadi beyi banci, yi akatôya ene, Mona mamami, yi bakunyi bamene ;

⁵⁰ muntu mwoso unakwenca nyinga ya Tetemi udi mu diulu, you ndo mwakunyami, yi ngasanami, yi mamami.