MAKU 8 - Disambi Dipyadipya

¹ KU matuku yia, pakadi kimbukuma kidiko kinene kabidi, yi bakadi kabena yi kintu kia kudya, akabikila beyi banci kudiyi ene,

² Ngwombwela bantu baba mwengo bwalo bwamasalabo yinami nkyekyu matuku asatu, yi kabena yi kintu kia kudya ;

³ ndo nxebatuma kunci yi ncala, banapwangwa mu ncila bwalo bwamalwa banga kulekule.

⁴ Yi beyi banci bakamupingasa ene, Ku kidi kai kunalubukwa muntu kwangata bidya bia kwokutisa bantu baba kunu ku mbata a kanana ?

⁵ Yi akabapangusa ene, Nudi yi mampa anga ? Bakatôya ene, Sambwali.

⁶ Yi akatôyela kimbukuma ene, baxikami paxi. Akangata lolo mampa sambwali, yi pakadi amaxinga akanyowa, yi akapa beyi banci bateki ku mpala yabo ; yi bakateka ku mpala ya bantu.

⁷ Yi bakadi yi tunga tuyixi tubende ; yi pakadi amaxinga akatôya ene, bateki totu ku mpala yabo.

⁸ Yi bakadya yi bakakwokuta ; yi bakakwongula bicini binyoki biakasala bisakwa sambwali tô.

⁹ Yi bakadi bea nkone inai ya bantu ; yi akabatuma kunci.

¹⁰ Yi akakondela mu kibusu mangwoso yi beyi banci, yi akalwa ku mbata a Dalamanuta.

¹¹ Yi baFalixi bakalwa yi bakabanga kwelesa yinanci mbata, badi mu kukyeba kilayixilu kudiyi kia mu diulu, badi mu kumwelekyesa.

¹² Yi akakabana mu mucima ănci, yi akatôya ene, Mwociya ou ămapalala kilayixilu ku bwalo kai ? Nwatôyela sôsôlwo ene, Kilayixilu kakinapebwa mwociya ou pô.

¹³ Yi akabaxiya, akakondela kabidi yi akasabuka kuya ku dinga dixia.

¹⁴ Yi bakakwelwa kucwala bidya, kabakadi yi bidya bioso mu kibusu bitena dimpa dimodimwe.

¹⁵ Yi akabambila ene, Numoni ; nudimuki bwalo bwa kiolubixilu kia baFalixi yi kiolubixilu kia Elodo.

¹⁶ Yi bakakwelesañana mbata ene, Bwalo bututena yi bidya.

¹⁷ Yisu, biakalembetelayi, akabatôyela ene, Kukai nwelesa mbata bwalo bunutena yi bidya ? Nonu nukidi kanusolembetela ? Kanusolubukwa isanga nkyekyu ? Nonu nudi yi micima yenu kukola ?

¹⁸ Nudi yi meso ; kanusomona ? Nudi yi macu ; kanusokwombwa ? Yi kanusokwela nkanyi ?

¹⁹ Panakanyowela bantu nkone itano mampa atano, nonu nwakakwongula bibata binga bia bicini binyoki ? Bobo ene, Disangi yi bibata bibidi.

²⁰ Yi panakanyowela bantu nkone inai mampa sambwali, nwakakwongula bisakwa binga bia bicini binyoki ? Bobo ene, Sambwali.

²¹ Yei akabatôyela ene, Nonu nukidi kanusolubukwa ?

²² Bakalwa lolo ku Betesaida ; yi bakacwala mufofo kudiyi, bakamulomba ene, amubaki bianca.

²³ Yi akakwata mufofo ku kianca, akamufikisa kunci kwa bula ; yi pakadi amakwela meso anci mati, akabaka bianca bienci kulu kwanci ; yi akamwapangusa ene, Wamona kintu ?

²⁴ Yi akasangola meso anci yi akatôya ene, Ngwamona bantu, bwalo bumbamona bea luna mici, badi mu kwenda.

²⁵ Kunyuma akabaka bianca bienci kabidi ku meso anci, yi yei akamona sosonyi, akapingaxibwa meso, yi akamona bintu bioso loko loko.

²⁶ Yi akamutuma ku ncibo anci ene, Kubwedi mu bula pô.

²⁷ Yi Yisu akabatuka yi beyi banci kuya ku mala a Kyesalia-Filipi. Yi akakwapangusa beyi banci mu ncila ene, Bantu batôya beci ku bwalo bwamene, ndi ñani ?

²⁸ Bobo bakapingasa ene, Yoano Munumeyi ; yi banga ene, Eliya ; mo banga ene, Munga mudimuxi.

²⁹ Yei akabapangusa ene, Mo nonu nwatôya beci ku bwalo bwamene, ndi ñani ? Pita akamupingasa ene, Owe udi Kalistu.

³⁰ Yi akabalanga kabambidi muntu mwoso mwoximo ănci.

³¹ Yi akabanga kubeyesa ene, Mwana a muntu uxetata bintu bingi, yi uxenyananibwa kudi babakulu yi kudi makanda manene, yi kudi bafundi ba mikanda ; uxexipibwa, yi kunyuma kwa matuku asatu kuxebikayi kabidi.

³² Yi akatôya diyi dedi ku mpala ya bantu. Pita lolo akamwangata yi akabanga kumukama dikamu.

³³ Mo yei akakulumuka, yi pakamonayi beyi banci, akakama Pita dikamu ene, Ncuka kunyuma kwamene, Satana ; bwalo butasokwela bintu bia Ncembi lukanyi, kate bintu bia bantu.

³⁴ Yi akabikila kimbukuma yi beyi banci, yi akabatôyela ene, Muntu mwoso ndo akyeba kulwa kunyuma kwamene, adinyafiani mikyenci, aonguli nkulusu anci, angulandudili.

³⁵ Muntu mwoso uxekyeba kubumba môyo anci unauncimisa, mo muntu mwoso unancimisa môyo ănci ku bwalo bwamene yi bwa losangu lunengela, unaupandisa.

³⁶ Muntu unatetowa kinani ndo amangata loboko luncimancima yi amancimisa môyo ănci ?

³⁷ Muntu uxesumbanya môyo ănci ku kintu kai ?

³⁸ Muntu mwoso unangwombwela meme bundu yi meyi amene ku mwociya ou ă budibi yi ă bubi, Mwana a muntu unamwombwela bundu yei kabidi, palolwayi mu dikai dia Tetenci yi bangele ba babala.