MAKU 7 - Disambi Dipyadipya

¹ YI baFalixi yi banga bafundi ba mikanda bakakokama kudiyi bamalwa ku Yelusaleme ;

² yi bakamona beyi banci banga batanadya bidya yi makaci amapinda, kulexi yi kutôya ene, atena makusula.

³ Bwalo bwa baFalixi yi bena Yuda boso, kutena bamakusula makaci abo dyendeli, kabasodya ; badi mu kunama muxiyilu ă bateteabo.

⁴ Yi pa kupifiana ku dibanca dia kisalu kabasodya kutena bamakwowa mai ; yi minga miesambu idiko mingi yamangatabo ndo kuyinama, bwalo bwa kukusula kwa mpamba yi mabungu, yi sala ya mwiyabolo.

⁵ Yi baFalixi yi bafundi ba mikanda bakamwapangusa ene, Kukai beyi bebe kabasokwenda yi muxiyilu ă babakulu ? kate badedya bidya yi makaci amapinda.

⁶ Yei akabapingasa ene, Esaya akadimusa sôsôlwo ku bwalo bwenu, bena mancanga, bea biakafundibwa ene, Bantu baba bangwanemeka ku milomo yabo, mo mucima ăbo udi kulekule yinami ;

⁷ kaninga bangwaxingila mo kanana, beyesa kweyesa kwabo kwa milangu ya bantu.

⁸ Nonu nwakadeya mulangu ă Ncembi yi nwanama muxiyilu ă bantu.

⁹ Yi akabatôyela ene, Sôsôlwo, nwamakwatola mulangu ă Ncembi binuxenama muxiyilu ěnu.

¹⁰ Bwalo bwakatôya Mosese ene, Nemeka tetebe yi mabebe ; yi ene, You atangola ndo tetenci ndo mamanci afwi.

¹¹ Mo nonu ene, Ndo muntu amatôyela tetenci ndo mamanci ene, Kidi Kôbana, (kulexi yi kutôya ene, Kiamalongebwa dilongi), ku bwalo bwa kintu kioso kixetetowa owe yinakio kundi ;

¹² nonu lolo kanusomusadidisa ndo tetenci ndo mamanci mudimo mwoso kabidi ;

¹³ nako nwamalengola diyi dia Ncembi ku muxiyilu enu unwamalongolañana ; yi nwencenca malo a noku mangi mangi.

¹⁴ Yi akabikila kimbukuma kabidi yi akabatôyela ene, Nungwombwi bungi bwenu ; yi nulembeteli.

^15-16 Kakuna kintu kidi kunci kwa muntu ndo kiamabwela munda mwanci kiamalubukwa kumupindisa ; kate bintu biabatuka munda mwanci, kabebi ndo biapindisa muntu.

¹⁷ Yi pakadi amancuka ku kimbukuma yi amabwela munda mwa ncibo, beyi banci bakamwapangusa bwalo bwa mwele ou.

¹⁸ Yi akabatôyela ene, Nonu kabidi nwasaka yi kilubukilu nako ? Kanusolembetela ene, kintu kioso kia kunci, aka kiamabwela munda mwa muntu kakibiyi kumupindisa,

¹⁹ bwalo butasobwelakio mu mucima ănci, kate mu difu dienci ; kiamakwelebwa kunci lolo, bwalo bwa kukupulula bidya bioso mbindu.

²⁰ Yi akatôya ene, Kintu kiamabatuka munda mwa muntu, kakieki ndo kiamapindisa muntu.

²¹ Bwalo bwa munda, mu mucima ă bantu ndo mwabatuka nkanyi mibi, madibi,

²² misaka, monda, mendela, xindilu, mabi, ncimi, nkolwa, disombo, mietangu, disasa, kiobe ;

²³ bungi bwa bintu bebi bibi ndo biabatuka munda, yi biamapindisa muntu.

²⁴ Yi akakwemana, yi akancuka koku kuya ku mbata ya Tile yi Xidono. Akabwela lolo mu ncibo umoumwe, akadi ene, muntu kalubukwi, kaninga kabiyi kusokokyebwa.

²⁵ Kate mwamukaxi akadi yi mwana mubende a babakaxi udi yi kidimu kia mbindu, pakakwombwayi mwoximo ănci, akalwa mangwoso, akapona ku makasa anci.

²⁶ Mwamukaxi lolo akadi muna Ngiliki, a bubila bwa Silia-Feniki. Yi akamulomba apaulipo kidimu munda mwa mwananci.

²⁷ Mo Yisu akamutôyela ene, Bana bokutixibwi buxi ; bwalo butasolelekyela, bidya bia bana kwangata kwela kudi yimbwa.

²⁸ Mo yei akapingasa yi akamwambila ene, Sôsôlwo Fumu ; isanga yimbwa idi muxi mwa mesa yidedya mangungu a bana.

²⁹ Yi akamutôyela ene, Ku bwalo bwa diyi dedi, yaka ; kidimu kiamabatuka munda mwa mwanebe.

³⁰ Yi akancuka kuya ku ncibo anci, yi akasañana mwana ulele pa ntangi, yi kidimu kiamapauka.

³¹ Yi akancuka kabidi ku mbata a Tile yi akalwa mu ncila a Xidono, pôi ku mai a Ngalili, pakacikaci pa mbata ya Dekapolo.

³² Yi bakacwala muna bicu kudiyi, muna kalangu ; yi bakamulomba abaki kianca kienci kulu kwanci.

³³ Yi akamuncula ku kimbukuma kuya ku dituku ; yi akabwesa ndembu yenci mu macu anci ; akakwela mati, akabaka ludimi lwanci kianca ;

³⁴ yi pakadi amasangola meso anci lwa diulu, akakabana, yi akamutôyela ene, Efata, kulexi yi kutôya ene, Dipudibwa dyendeli.

³⁵ Yi macu anci akadipudibwa mangwoso, yi musisa ă ludimi lwanci ăkasudibwa, yi akasakola kutôya loko.

³⁶ Yi akabalanga ene, kabambidi muntu mwoso ; mo pakalekolayi yi kubalanga, bobo biabo bakalekola yi kusakola bwalo,

³⁷ yi bakakama kukama kungi ene, Apwenca bintu bioso loko ; amakwombwesa isanga bena bicu, yi amatôyesa isanga bena bimeme.