MAKU 4 - Disambi Dipyadipya

¹ YI akabanga kabidi kweyesa pepe yi mai. Yi kimbukuma kinene kiakakokama kudiyi, biakakondelayi mu kibusu yi akaxikama ku mai ; yi kimbukuma kincimancima kiakadi ku mbata pepe yi mai.

² Yi akabeyesa malo mangi ku miele yi akabatôyela ku kweyesa kwanci ene,

³ Nwombwi ; mona, mukuni akabatuka kuya kuna.

⁴ Yi pakakunayi, mutongu umoumwe ăkapona ku dituku dia ncila, yi nyonyi yakalwa udya.

⁵ Yi munga ăkapona ku kidi kia mabwe kwakasakau loboko lungi, ăkamena mangwoso lolo bwalo bwakasakau yi loboko lungi ;

⁶ yi pakancuka diba ăkanyungula ; yi bwalo bwakasakau yi dicina ndo bwakakwomau.

⁷ Munga lolo ăkapona pakacikaci pa mieba, yi mieba yakalunda, yakaufina, yi ăkadi kausolelañana miebele.

⁸ Yi munga ăkapona ku loboko lunengela, ăkalelañana miebele ; ăkalunda yi ăkalekola bungi ; ăkalela umoumwe mitongu masangi asatu, umoumwe masangi asambomo, yi umoumwe nkama tô.

⁹ Yi akatôya ene, You udi yi macu a kwombwa, aombwi.

¹⁰ Yi pakadi utani mikyenci mutupu, bobo bakadi yinanci yi beyi disangi yi babidi bakamwapangusa dia miele yenci.

¹¹ Yi akabatôyela ene, Kwamanupebwa kulubukwa bwalo bwa bwisa bwa bufumu bwa Ncembi ; mo bwalo bwabo badi kunci, bintu bioso biamakwencebwa ku miele ;

¹² mbwôso pa kudingila baxedingila kutena kumona, yi pa kwombwa, baxekwombwa kutena kulembetela, ximbi ambeci baxekulumuka yi baxelekyelebwa.

¹³ Yi akabambila ene, Nonu kanusolubukwa mwele ou ? Ape nunalubukwa bungi bwa miele beci ?

¹⁴ Mukuni ndo akuna diyi.

¹⁵ Yi bantu ba ku dituku dia ncila kwamakunibwa diyi kababa ; panakala bamakwombwa diyi, palolwa Satana mangwoso yi amancula diyi diamakunibwa munda mwabo.

¹⁶ Mo nako bobo bamakunibwa ku bidi bia mabwe, panakala bamakwomba diyi, bamadiangata mangwoso yi kiango ;

¹⁷ yi kabena yi dicina munda mwabo ; kaninga badi bena kakondo kabende ; kunyuma, palolwa mpeya ndo kukolomonebwa bwalo bwa diyi, bamaponexebwa mangwoso.

¹⁸ Yi banga badi bantu bamakunibwa pakacikaci pa mieba ; baba ndo bantu bamakwombwa diyi ;

¹⁹ yi maxitu a mwociya ou yi lodimbu lwa bodidi yi xindilu ya binga bintu, biamabwela munda, biamafina diyi, yi kadisolelañana.

²⁰ Baba lolo bamakunibwa ku loboko lunengela badi bantu bombombwa diyi yi bamadiangata, yi balelañana ; umoumwe masangi asatu, umoumwe masangi asambomo, yi umoumwe nkama tô.

²¹ Yi akabatôyela ene, Mwinda ulolwa bixetekyebwau muxi mwa dikumbu ndo muxi mwa ntangi ? Ki bixetekyebwau kulu kwa muci ă mwinda ?

²² Bwalo butena bwalo bwoso bubucika butasokwebexebwa ; yi kakusosokoma bwalo bwoso butasomoneka kunyuma.

²³ Ndo muntu mwoso udi yi macu a kwombwa, aombwi.

²⁴ Yi akabatôyela ene, Nutebeli binwombombwa ; lwedi lwoso lunwamakwelekyesa nonu yinalu, lunanwelekyexebwa, yi binga bintu binanubodeyebwa.

²⁵ Bwalo muntu mwoso apwangata, yei unapebwa bintu ; yi you utasoangata, kudiyi kunancudibwa isanga bintu bidi yinanci.

²⁶ Yi akatôya ene, Bufumu bwa Ncembi budi nako, bea ndo muntu uxekwela mitongu ku loboko,

²⁷ uxelala tulu ku butuku, uxebika ku munyinya, yi yei kasolubukwa mwamena mitongu ndo mwalundayo.

²⁸ Loboko lwamalelenana masangu mikyelu ; ku buxi buxi malwa, kunyuma lolo difu dia masangu, kunyuma mitongu minene ku difu dia masangu.

²⁹ Mo panakala masangu amapya, yei ndo atuma mwele mangwoso, bwalo bwamafika kikondo kia kibukilu.

³⁰ Yi akatôya ene, Tunafwanisa bufumu bwa Ncembi yi luna kinani ? ndo tuxebwelekyesa ku mwele kai ?

³¹ Budi luna mutongu ă mutadi. Pakunibwau ku loboko, isanga ămafwila mitongu mioso bunya idi pa loboko,

³² kaninga pakunibwau, ămalunda lunda yi ămadika bidibwa bioso bunene, yi ămancula matamba manene bialubukwa nyonyi ya kulu kulwa xikama muxi mwa mudingidingi ănci.

³³ Yi ku miele mingi ya noku kwakabatôyelayi diyi, bea biakalubukwabo kwombwa ;

³⁴ yi kutena mwele ndo kutabatôyelayi ; mo ku busoko kwakasakolelayi beyi banci bintu bioso.

³⁵ Yi ku dituku dedi, pakalwa bwelu, akabatôyela ene, Tusabuki ku dixia dia yikwa.

³⁶ Yi pakadi bamancula kimbukuma bakamwangata yinabo bea biakadiyi mu kibusu. Yi binga bibusu biakadi yinanci.

³⁷ Yi ngiembi ya bubi yakalwa, yi diele diakakuma kibusu, biakadi kibusu kidi mu kwolubila mai.

³⁸ Yei lolo akadi ku ntôi a nyuma, udi mu kulala tulu ku kikidi. Yi bakamubisa yi bakamwambila ene, Mweyexi, kusodinyingisa, bwalo bututanafwa ?

³⁹ Akabika lolo, yi akalanga lupepele, yi akatôyela mai ene, Lekyela, ikala polo. Yi lupepele Iwakalekyela, yi kwakadi polo nya.

⁴⁰ Yi akabatôyela ene, Nuai yi bowa kukai ? Nukidi kanusoakala yi kwetabusa ?

⁴¹ Yi bakacina bowa bungi, yi bakatôyelañana ene, Ñani lolo muntu you, biamamwedeya isanga lupepele yi mai ?