MAKU 3 - Disambi Dipyadipya

¹ YI akabwela mu kixingidilu kabidi ; yi momu mwakadi muntu udi yi kianca kienci kiamakwoma.

² Yi bakamudingila ndo uxemupandisa ku Sabado, bixemusanyabo.

³ Yei lolo akatôyela muntu yi kianca kienci kiomu ene, Emana pakadkaci.

⁴ Yi akabatôyela ene, Kwalelekyela yi bwadi ndo kwenca kunengela ku Sabado, ndo kwenca bubi ? ndo kupandisa môyo ndo kuxipa ? Mo bakapudikila.

⁵ Yi akabatebela yi bituku, udi mu kwombwa buxitu bwalo bwa midma yabo kukola, yi akatôyela muntu you ene, Xombola kianca kiebe. Yi akakixombola, yi kianca kiend kiakapingaxibwa foko.

⁶ Yi baFalixi bakabatuka mangwoso, bakamuyila nkuku yi bena Elodo muxemuxipabo.

⁷ Yi Yisu akancuka yi beyi banci kuya ku mai ; yi kimbukuma kinene kia bantu ba mu Ngalili bakamulanda, yi ba mu Yudiya,

⁸ yi ba ku Yelusaleme, yi ba mu Idumea, yi ba ku dixia dia Yôdana ; yi bobo ba ku mbata a Tile yi Xidono, kimbukuma kinene, pakakwombwabo dia bintu biakakwencayi, bakalwa kudiyi.

⁹ Yi akatôyela beyi banci ene, kibusu kibende kixemusadila pepe bwalo bwa kimbukuma kia bantu, bitaxemufinabo.

¹⁰ Bwalo bwakapandisayi bantu bangi, biakamunyakabo kudi bantu boso bakadi yi masama, bamubaki bianca.

¹¹ Yi bidimu bia mbindu, ku kikondo kioso kiakamumonabio, biakapona paxi ku buxi bwanci, yi biakakwamena ene, Owe udi Mwana a Ncembi.

¹² Yi akabalanga langa milangu mingi, kabamusakoledi.

¹³ Yi akabanda ku lupongo, yi akababikila bakanangayi mikyenci kubabikila, yi bakaya kudiyi.

¹⁴ Yi akasungula bantu disangi yi bantu babidi bixeakalabo yinand, bixebatumayi kuya ambila diembi,

¹⁵ yi kwakala yi bumanya bwa kutenyeka bidimu bibi.

¹⁶ Yi akapa Ximono lunga lukumbu ene, Pita.

¹⁷ Yakobo lolo, mwana a Sebede, yi Yoano, Yakobo mwakunyenci ; yi akabapa lukumbu lwa Boanenge, kulexi yi kutôya ene, Bana ba dikongola ;

¹⁸ yi Andelo yi Filipi, yi Batolomo, yi Mateyo, yi Tomasa, yi Yakobo mwana a Alifayo, yi Tadayo, yi Ximono a Kyenene,

¹⁹ yi Yudaxi a Ixikalioto akamwenga kunyuma. Bakalwa lolo ku ncibo.

²⁰ Yi kimbukuma kiakasangila kabidi bitalubukwabo isanga kudya bidya.

²¹ Yi pakakwombwa bilungu bienci bakabatuka kuya mukwata, bwalo bwakatôyabo ene, Amakwancowa.

²² Yi bafundi ba mikanda bakapweka ku Yelusaleme bakatôya ene, Udi yi Belesebubu ; yi ene, Kudi fumu a bidimu bibi ndo kwatenyekayi bidimu bibi.

²³ Yi akababikila kudiyi yi akabatôyela ku miele ene, Satana ubili kutenyeka Satana beci ?

²⁴ Akali bufumu bwamadisambukila, bufumu bobu kabusolubukwa kusala.

²⁵ Yi ndo ncibo amadisambukila, ncibo you kasolubukwa kusala.

²⁶ Satana lolo ndo amatomboka ku bwalo bwanci mikyenci yi amadisambukila, yei kabiyi kusala, kate udi yi kipwilu kia kupwa.

²⁷ Kakuna muntu ubili kubwela mu ncibo a muna ngulu yi kusanca bima bienci kutena amasuka muna ngulu buxi ; kunyuma lolo unasanca ncibo anci.

²⁸ Nwatôyela sôsôlwo ene, Mabi moso analekyelebwa bana ba bantu, yi mietangu mioso yatangolabo mietangu ;

²⁹ kaninga muntu mwoso unatangola Mwoxixi a Babala kanakala yi kulekyelebwa kwa bubi bobu kô kô ; kate amasala yi lopelo lwa kwona kwa kô kô.

³⁰ Bwalo bwakatôyabo ene, Udi yi kidimu kia mbindu.

³¹ Yi mamanci yi bakunyi banci bakalwa ; yi bakakwemana kunci yi bakatuma kudiyi ndo kumubikila.

³² Yi kimbukuma kiakamudinga xika xika xika. Yi bakamutôyela ene, Mona mabebe yi bakunyi bebe bakwapalala kunci.

³³ Yei akabăpingasa ene, Ñani udi mamami ndo bakunyi bamene ?

³⁴ Yi akabatebela, kidinga kiabo kia bantu bamamudinga xika xika xika, ene, Numoni mamami yi bakuny ibamene.

³⁵ Bwalo muntu mwoso unakwenca nyinga ya Ncembi, you udi mwakunyami yi ngasanami yi mamami.